Apquilimpocjay Sisac apnaymacoc nipyesicsa co Judá
(1~R 14.21-31)1 Aptomjaclhec nic nat apyimtlahnamo apanco apvisqui Roboam. Apquilvatasquic nic nat apyiplovquiscama singanamaclha Dios, apquilvatsamquic nic nat apyovoclhojo co Israel. 2 Apquillingamcoc nic nat acyimtalhnama ayinyema apquiltemaclha apquilvatseycaoc apquilyiplovquiscama. Vocmec nic nat cinco años aptimem apvisqui Roboam, apquilvaa apvisqui co Egipto najan apquillhalhmaa, yoyam elimpocjac tingma Jerusalén. 3 Mil doscientos carros apancaoc co Egipto najan sesenta mil nolhing apcapaoc, najan nalhapaoc enlhit appintalhnama, mongmovan ongilyipsitic. Apquilinyemac nic nat Egipto, apquillhalhmaa libios, najan suquienos, najan etiopes. 4 Apquilimpocjac nic nat tingma apquilyimnatem apquileyvomaclha Judá, apquilvocmo tingma Jerusalén.
5 Apmiyaclhec nic nat profeta Semaías apnaclha apvisqui Roboam najan apquilviscaa co Judá. Apquicjingvocmec nic nat tingma Jerusalén melimpocjay mocjam cotnaja ingmoc. Aptomjac nic nat apquilanya: —Eycaso Dios appayvam apquilanyacpo quellhip apquilyamasma Dios Visqui ingac: Elmacpoc sat quellhip apquilimpocja inlhojo apvisqui Sisac najan apnaymacoc — alhta aptomjac — nic nat aptomjac profeta.
6 Inmancaquic nic nat apquilvalhoc apquilviscaa apquillinga, apquiltomja apquilatingmavo: —¡Payjoc aplhanma Dios Visqui ingac! — nic nat apquiltomjac.
7 Apvitac nic nat Dios Visqui ingac mepqui ayajamalhco apquilvalhoc apquilviscaa, aptomja apcanyacpo profeta Semaías: Motvacsejec sat tingma apyovoclhojo sicvita alhta mepqui ayajamalhco apquilvalhoc maa. Metvacsejec sat tingma Jerusalén apvisqui Sisac najan apnaymacoc, aclhanma alhta inyicje evalhoc naysicsa siclom, yoyam colhic actovasa apyovoclhojo tingma. 8 Eltimjic sat apquiltimesaycam maa, elyasingvomoc sat actemaclha actamila seltimesaycam coo sicvisay Dios, najan moc apquiltemaclha apquiltimesaycam apquilviscaa cotnaja ingmoc — nic lhac Dios Visqui ingac — nic nat aptomjac profeta.
9 Apquilimpocjac nic nat apvisqui co Egipto apvisay Sisac najan apnaymacoc nipyesicsa tingma Jerusalén. Apsovjoc nic nat appatmaoclha asoc acmamnave acnaycaoc tingma apponquinomap najan apvisqui tingma pac. Apsovjoc nic nat apquilmaycam ningajapsomalhca allanomalhca oro, apquillanay nic nat apvisqui Salomón. 10 Apquillanac nic nat apvisqui Roboam apquilmaycam ningajapsomalhca allanomalhca bronce. Apquilanyacpec nic nat apquilviscaa guardia eltamilsic as apquilmaycam payjoc atong acyivey apvisqui tingma pac. 11 Apquilmec nic nat mataa apquilmaycam guardia, apquiltomja inlhojo apquillhalhmaa apvisqui, aptingyey tingma apponquinomap. Apquiltajavoc nic nat mocjam, apquiltajesa mocjam apquilmaycam acnaycamcolha apquilmaycam. 12 Inmasquec nic nat aplom pac Dios Visqui ingac, apvita inlhojo mepqui ayajamalhco apvalhoc apvisqui Roboam. Am nic nat etvasac tingma Jerusalén. Apquilvitacpec nic nat napocja co Judá apquiltomja apquilpeyvomo.
13 Inyangvocmec nic nat apyimtalhnamo apvisqui Roboam apna tingma Jerusalén. Invocmec nic nat aptiyascam Roboam cuarenta y un años aptimesacpo apvisqui. Aptimec nic nat apvisqui tingma Jerusalén acvaycmo diecisiete años, apvisay nic nat tingma Dios apquilyacyescama nipyesicsa tingma apquilvanyam co Israel. Roboam inquin nic nat acvisay Naama co Amón. 14 Somcoc nic nat aptemaclha Roboam, mepqui ilhnic nat apyiplovquiscama singanamaclha Dios Visqui ingac.
15 Yitnec nic nat mocjam amyaa actalhesomalhca aptemaclha Roboam, acvisay vaycajac crónicas apnatalhescama profeta Semaías najan profeta Iddo. Yitnec nic nat actalhesomalhca amyaa apquiltemaclha apquilmolhama.
16 Am nic nat comascac mataa apquilimpocjay apnaymacoc Roboam najan apnaymacoc Jeroboam. 17 Apquitsepquic nic nat Roboam, apcatoynacpec nic nat Tingma David, moc apvisay Jerusalén. Aptimesacpec nic nat apquitca Abiam, etnejic apvisqui apya'monquiscama apyap ninga.
© © Biblia en Enhlet (Lengua Norte) © Paraguayan Bible Society, 1995.
