Actemaclha apquillhanma mepqui apquilyeycajascaoc
1 Aptomjac nic nat Moisés apquilanya apquilviscaa tribus israelitas: Eycaso singanamaclha Dios:
2 Yitnec sat ancoc enlhit aplhanma mepqui apyeycajascaoc napato Dios, incaymalhquic etnejic nasoc anco appayvam, etnejic sat acno aplhanma mepqui apyeycajascaoc.
3 Yitnec sat ancoc acpayvam quilvana ayitcoc acna inyap tingma pac, aclhanma mepqui acyeycajascaoc napato Dios. 4 Am sat ancoc emyavac inyap, aplinga inlhojo quilvana acpayvam napato Dios, incaymalhquic cotnejic nasoc anco acpayvam. 5 Apmiyovquic sat ancoc inyap, aplinga inlhojo quilvana acpayvam napato Dios, coymalhquejec cotnejic nasoc anco acpayvam quilvana ayitcoc, ayinyema apmasma inyap napato Dios.
6 Yitnec sat ancoc acpayvam quilvana ayitcoc colyimjapmaclha mocjam, aclhanma mepqui acyeycajascaoc napato Dios, malha aclhanma nasa, yiplovcoc alyimjapma. 7 Am sat ancoc emyavac atava, incaymalhquic cotnejic nasoc anco acpayvam. 8 Apmiyovquic sat ancoc atava, aplinga inlhojo quilvana acpayvam napato Dios, coymalhquejec sat cotnejic nasoc anco acpayvam, ayinyema apmasma atava napato Dios.
9 Yitnec sat ancoc acpayvam quilvana tampeyi, najan moc quilvana apyamasma, aclhanma mepqui acyeycajascaoc napato Dios. Incaymalhquic cotnejic nasoc anco acpayvam aclhanma napato Dios.
10 Yitnec sat ancoc acpayvam quilvana apma atava, acna atava tingma pac, aclhanma mepqui acyeycajascaoc napato Dios. 11 Am sat ancoc emyavac atava, aplinga inlhojo quilvana acpayvam napato Dios, incaymalhquic cotnejic nasoc anco acpayvam aclhanma napato Dios. 12 Apmiyovquic sat ancoc atava, coymalhquejec sat cotnejic nasoc anco acpayvam aclhanma siclho, ayinyema apmasma atava napato Dios.
13 Apvanquic mataa quilvana atava memyovejec acyiplovquiscama aptava actemaclha aclhanma napato Dios. Apvanquic quilvana atava emyoc actomjaclha aptava. 14 Am sat ancoc emyavac atava actomjaclha aptava aclhamoclhojo acnim, incaymalhquic cotnejic nasoc anco acpayvam napato Dios. 15 Apmiyovquic sat ancoc enlhit actomjaclha aptava, coymalhquejec sat cotnejic nasoc anco acpayvam quilvana, ayinyema apmasma atava napato Dios — nic nat aptomjac Dios.
16 Eycaso ilhnic nat singanamaclha Dios aplhoy nic nat Moisés. Inquillhenalhquic nic nat aptemaclha enlhit najan aptava, aplhenacpec nic nat enlhit najan quilvana ayitcoc, acna inyap tingma pac.
© © Biblia en Enhlet (Lengua Norte) © Paraguayan Bible Society, 1995.
