Almam apquilvalhoc apóstoles actemaclha apquiltimnaycam Pablo
1 Am alhta omyaclhac mocjam tingma Jerusalén acvocmo catorce años. Natamin alhta sicmiyaclho maa. Siclhalhma alhta actomjac ingyalhing Bernabé najan ingyalhing Tito. 2 Ellhicmosquic alhta Dios yoyam oyacsic tingma Jerusalén. Apcaneclhec alhta apquilimja apmamyi Jesucristo apmolhama. Altimnasquic alhta maa actemaclha alhta sillhicmoscama tasic amyaa nipyesicsa metnaja judíos. Altamjoc alhta oyasamcojo actemaclha sillhicmoscama alhta. Am alhta oltamjoc cotnejic alhto sillhicmoscama tasic amyaa. 3 Am alhta elhenacpoc Tito aptomja siclhalhma yoyam etingya asoc monquinatquiscama apyimpejic. Ayinyemaclha metnaja judío ingyalhing Tito. 4 Nasoc alhta apquilantalhningvactamo naysicsa ninganeyquiclhilha napocja ingilyalhinga apquilmopvan amyaa. Apquililtamjoc yoyam eltingyasquisic asoc monquinatquiscama apyimpeoc metnaja judíos. Apquilyilhacpoc alhta yoyam elyasamcojo actemaclha ningyamasma singanamaclha Moisés. Mongiltomja mocjam ningmomalhca ayinyema ninpasmeyquiclha Cristo Jesús. Apquililtamjoc alhta yoyam ongilyiplovcasojo actemaclha singanamaclha Moisés, yoyam ongiltimjic mocjam malha ningmomalhca. 5 Am alhta eyca ongilyajaclhac nincoo as enlhitaoc. Ningvascapquic alhta ningmasma tasic amyaa actomja nasoc anco yoyam coytic sat mataa quellhip.
6 Apcaneclhec alhta apquilimja apmamyi apquiltomja malha apquilyimtalhnamo. Am najan colhenac apvalhoc Dios actemaclha apquilvisay apquilyimtalhnamo. Am najan coo lha colhenac evalhoc apquilvisay apquilyimtalhnamo as enlhitaoc. Am alhta jeltimnasac apquilimja apmamyi alhnancoc singanamaclha najan singascamaclha. 7 Apquilyicpilcangvocmec alhta actomja siyanyomalhca ayinyema Dios, oltimnacsic tasic amyaa nipyesicsa metnaja judíos. Apnoc najan Pedro aptomja apcanyomap ayinyema Dios eltimnacsic tasic amyaa nipyesicsa judíos. 8 Dios apcasinaycam alhta Pedro yoyam etnejic apóstol apcapajasomap nipyesicsa judíos. Coo najan seyasinaycam Dios yoyam otnejic apóstol siyapajasomalhca nipyesicsa metnaja judíos.
9 Apquilyicpilcangvocmec alhta ingilyipmaa apquilimja apmamyi apquilvisay Jacobo najan Pedro najan Juan, actemaclha siyanyomalhca ayinyema Dios. Apquilmec alhta emic as ingilyipmaa, apquilmec alhta najan apmic Bernabé. Eycaso actemaclha alhta monquinatquiscama yoyam ongiltimjic sat ninpasmeyquiclha ningiltamjaycam. Nincoo yoyam ongiltamjam nipyesicsa metnaja judíos. Ingilyipmaa eyca yoyam eltamjam sat nipyesicsa judíos.
10 Apquililtamjoc alhta ingilyipmaa acvamlha lhama asoc, yoyam ongilpasmoc sat mataa Jesucristo apmolhama mepqui apquilnatam nipyesicsa judíos. Acyiplovcasquic coo mataa actemaclha alhta singanama.
Pablo aptomja apyamatsaycam Pedro tingma Antioquía
11 Acvitac alhta apvactamo Pedro tingma Antioquía. Acyimnatasquic coo sicpayvam sicpamejitsa Pedro naysicsa apsilhnanomap. 12 Appasmec alhta siclho Pedro aptoycaoc ingilyalhinga metnaja judíos. Lhama alhta apquilvaa ingilyipmaa judíos apquiltomja Jacobo apquilapajascama. Am alhta epasmac mocjam Pedro, ayinyemaclha incacoc apnenyic elvita ingilyipmaa judíos. 13 Apquilvajanamquic alhta najan napocja ingilyipmaa judíos actemaclha anit apvalhaoc. Apvajanamquic alhta najan ingyalhing Bernabé. 14 Acvitac alhta apquiltemaclha melyiplovquiscama tasic amyaa actomja nasoc anco. Actomjac alhta coo siyanya Pedro napatavo aplhamoclhojo: “Judío nac lhip. Apvajanamquic lhip apquiltemaclha ingilyalhinga metnaja judíos. Am eyiplovcasac lhip apquiltemaclha ingilyipmaa judíos. ¿Soctomja aptomja nac lhip apcayo apquiltemaclha judíos? Apcanama lhip elvajanamcoc ingilyalhinga metnaja judíos” —alhta actomjac coo siyanya.
Ningilvomsomalhca tap ayinyema mongyasquiyam
15 Nincoo ningiltomja judíos ayinyema ingilyapmayc apquiltomja judíos. Am ongnoc nincoo enlhitaoc lhalhma anco, moltimem mataa enlhit melyascalhma. 16 Ningyasamcoc nincoo, copvanquejec enlhit etnejic appeyvomo napato Dios ayinyema apquilyiplovquiscama singanamaclha Moisés. Apvanquic enlhit etnejic appeyvomo napato Dios, apvamlha aptomja meyasquiyam Jesucristo. Am ongilyascacmoc nincoo lha Jesucristo actemaclha sintimesquiscama ningilpeyvomo napato Dios. Eycaso ayinyema mongyasquiyam, cotnaja ayinyema ningyiplovquiscama singanamaclha Moisés. Ayinyemaclha copvanquejec enlhit etnejic appeyvomo napato Dios ayinyema apquilyiplovquiscama singanamaclha Moisés.
17 Ningiltamjoc sat ancoc ontimjic ningilpeyvomo napato Dios ayinyema ninpasmeyquiclha Jesucristo. Onlhojoc sat nincoo enlhitaoc lhalhma anco. Jingiltimjic sat nincoo lha ningilvisay mongilyascalhma. ¿Apquiltamjo ya Cristo ongyiplovcasojo actemaclha mongilyascalhma? Paj, am eltamjoc. Osilhnanalhcac sat ajanco. 18 Ayinyemaclha ayinimcasquic sat ancoc netin singanamaclha actomja alhta sicyamasma. Osilhnanalhcac sat ayinyema sinimcasquiclha netin. 19 Malha siyitsepma actomjac coo ayinyema singanamaclha. Oyiplovcasojoc sat actemaclha ayinyema Dios. 20 Malha siyitsepma lhama alhta Cristo asoc timyescama. Inmasquec actemaclha evalhoc nano. Cristo apnac evalhoc quilhvo. Yitnec coo acyimnatem enquenyic ayinyema moyasquiyam Dios Apquitca. Ayinyemaclha eyasicjavoc Dios Apquitca, apyinyovsomacpo apanco seyanmongam coo. 21 Am oltamjoc ovinam Dios apcaycaoc. Ningiltimesalhquic sat ancoc ningilpeyvomo napato Dios ayinyema ningyiplovquiscama singanamaclha, alhtoc sat cotnejic apquitsepma Cristo singyanmongam.
© © Biblia en Enhlet (Lengua Norte) © Paraguayan Bible Society, 1995.
