Bildad appayvam
1-2 ¿Lhip Job, ajolhe ya mocjam appayvam? Malha alhcajayam intomjac ninlingay lhip appayvam.
3 ¿Apcanayqui ya lhquip mepeyvomo Dios apyimtalhnamo, apyeycajasa apcanamaclha?
4 Yitnec apquilsilhnanomap apanco lhip apquitquic napato Dios, yiplovcoc apyanmongsayclha apquiltemaclha apancaoc.
5 Ilmalhna sat lhip Visqui apyimtalhnamo, yoyam ingyasicjiclhojo mocjam.
6 Epasingvotac sat Visqui ingac, apvita inlhojo mepqui apsilhnanomap apanco lhip. Etac sat lhip mocjam apquitquic, etac sat mocjam apquilnatam.
7 Etac sat lhip cascama apquilnatam, am colhno apquilnatam nanoc alhta.
8 Iyasingvom sat lhip apquiltemaclha ningilyeyjamcaa nano, iyiplovcasojo sat lhip.
9 Mepqui ningilyascamco nincoo ningilinyemac acnim alhta (nintiyaycamlha). Malha pisquisca intomjac ningileyvam as nalhpop.
10 Incaymalhquic lhip eyasingvomoc cotlaycaoc asoc apquiltemaclha ningilyeyjamcaa.
11 Inquictinquic mataa yamamoc najan tepó, payjoc acyitnamaclha yingmin.
12 Inyamamquic mataa, acyamaca inlhojo yingmin, am colhnoc mataa moc ayimjaclha.
13 Apquilyitsomacpo enlhit apquilmapsomcaa, alvoncayam Dios Visqui ingac. Mepqui mataa aljalhneycam apquilvalhoc.
14 Acyitsomalhca melyasquiyam apancaoc sovalac etin, mepqui acyimnatem.
15 Comalhquejec sovalac etin, am cotnajac ningilmaycam, mepqui acyimnatem.
16 Apquilyitsomacpo apquilmapsomcaa paat alyimseleycaoc, ayictingam lhalhma anco.
17 Yitnec ayquipmenaoc congne lhopactic, acvaycmo congne alyitnamaclha mataymong.
18 Incaptalhquic sat ancoc ayimjaclha, colvoncamoc sat ayinyemayaclha.
19 Apquilyitsomacpo apquilmapsomcaa, elvac sat apquilya'monquiscama poc ninga.
20 Elmiyovacpoc sat napato Dios, mepqui inlhojo apquilsilhnanomap apanco. Melmiyovacpejec sat mataa apquilmapsomcaa.
21 Dios Visqui ingac conyemac sat acpayjayclha apvalhoc lhip, najan apquitsovascama lhip.
22 Elmancangvomoc sat apquilinmelhaycam lhip. Enatovasacpoc sat tingma apancaoc enlhit apquilmapsomcaa — nic nat aptomjac Bildad.
© © Biblia en Enhlet (Lengua Norte) © Paraguayan Bible Society, 1995.
