Aptemaclha aplom apvisqui Saúl
1 Apcanyacpec nic nat David, yoyam ematong, ayinyema apcanama Saúl. Apquilanyacpec nic nat Jonatán najan apquilyimtalhnamo singilpilhtetemo. Avanjec nic nat apcasicjayo Jonatán emyoc David.
2 Aptomjac nic nat Jonatán apcanya David: —Tata coo Saúl apcanama ematong lhip. Iyilhanim sat lhip secaseclha alhtoo, metacpejec sat lhip. 3 Otnejic sat siclhalhma tata coo, onsovjam sat lhip amyip. Opamejitsalhcojoc sat tata coo aplhenacpo lhip. Natamin oyascasingvomoc sat lhip amyaa — nic nat aptomjac Jonatán.
4 Apquilpamejitsacpec nic nat Jonatán najan Saúl emyovacpoc David. Aptomjac nic nat Jonatán apcanya: —Lhip visqui apyimtalhnamo, copvanquejec lhip ingyinmelham apquilancam David. Am alhta ingyinmelham mataa David. Avanjec alhta apvascapma mataa David. 5 Am alhta emyovacpoc apanco ingyajic enlhit apvinatem filisteo. Aptomjac alhta David apquilvomquiscama tap apyovoclhojo enlhitaoc Israel. Apvitac alhta lhip visqui apyimtalhnamo, payjeclhec alhta apvalhoc lhip. Mepqui apsilhnanomap apanco David, ¿so actomja yi apcanem lhip ematong David? — nic nat aptomjac.
6 Aplingac nic nat Saúl actomjaclha appayvam. Apyimnatasquic nic nat appayvam: —Naso coo sicpayvam mepqui sicyeycajascaoc, mematnejec sat David — nic nat aptomjac.
7 Apquiltimnasquiclhec nic nat Jonatán apnaclha David. Innec nic nat acyantama David apnaclha apvisqui Saúl, etnejic mocjam apquilancam, acno siclhoc alhta.
8 Invocmec nic nat mocjam apquilimpocjay. Apquimpaclhec nic nat David apnalayclha apnaymacoc elnapacpoc filisteos. Apyimnatem apanco ilhnic nat David najan apquillhalhmaa. Appintalhnama ilhnic nat apticyovam filisteos. Apquilinyajamquic nic nat poc. 9 Apcapajasquic nic nat Dios somquic quilyicjamo cotlhic apvalhoc Saúl. 10 Apyinjac nic nat Saúl, ingyajic David. Apjalhec nic nat David. Innec nic nat acyiplha sovjeva tingma napocja. Apquinyec nic nat David. 11 Apcapajasquic nic nat Saúl elsovjam David, payjoc tingma pac. Apquilanyacpec nic nat eltamilsic tingma pac, yoyam elajic secaseclha.
Innec nic nat David aptava acvisay Mical, actomja ayanya: —Ivomsacpojo tap alhtaa nac jay, ematong sat lhip secaseclha — nic nat intomjac.
12 Intingyac nic nat tama Mical. Atong ayitcoc nic nat acvayvesantama coning David, apquinyec nic nat. 13 Intingyac nic nat quilaycmasquiscama Mical. Impiquinquic nic nat aptiyanmaclha David. Impiquinquic nic nat yataay apyimpejic aptiyanmeycaoc. Incalasquic nic nat manto. 14 Apquilvoctac nic nat Saúl apquilasinancama elmoc David. Intomjac nic nat Mical ayanya: —Ningmasquem incajac David — nic nat intomjac.
15 Innec nic nat alapajasa mocjam elmoc David. Apquilanyacpec nic nat: —Elpatmenta sat acyiplomo aptajanma. Ongvajic sat David — nic nat aptomjac Saúl.
16 Apquilantalhnec nic nat David tingma pac. Pilapcasquic nic nat apquilvita quilaycmasquiscama najan yataay apyimpejic aptiyanmaclha acyinyovmalhca.
17 Aptomjac nic nat Saúl apcanya Mical: —¿So actomja yi seyinimquisa nac coo? Lhiya alhta ayapajascama ingyinyejic David — nic nat aptomjac.
Incatingmavoc nic nat Mical: —Ayanyalhquic alhta omatong coo, otnajaclha siyanem ingyinyejic David — nic nat intomjac.
18 Apquinyec nic nat David. Aptiyaningvocmec nic nat profeta Samuel, apna tingma Ramá. Apquiltimnasquic nic nat acyovoclhojo amyaa aptemaclha alhta Saúl. Aplhinquic nic nat Samuel apyantamaclho David, elhnam sat tingma Naiot, profeta tingma pac. 19 Aplingac nic nat Saúl amyaa apnaclha David tingma Naiot de Ramá. 20 Apquilapajasquic nic nat Saúl elmoc David. Apquilvaac nic nat Saúl apquilapajascama. Apquilvitac nic nat apcanayclha napocja profetas apnaclha Samuel. Apquiltimec nic nat apquilayo Dios naysicsa apquiltaycam. Aptalhnec nic nat Dios espíritu apquilvalhoc malapajascama. Apquilvajanamquic nic nat apquilayo Dios naysicsa apquiltaycam.
21 Aplingac nic nat amyaa Saúl. Apquilapajasquic nic nat poc, yoyam elmoc David. Yiplovcoc nic nat acno moc apquilvajaneycaoc apquilayo najan apquiltaycam. Natqui ilhnic nat intomjac apquilapajascama Saúl, yoyam elmoc David. Yiplovcoc nic nat acno moc apquilvajaneycaoc. 22 Apmiyaclhec nic nat Saúl tingma Ramá. Apyipjongvocmec nic nat acyitnamaclha yingmin acvisay Secú. Apquiltamjoc nic nat Saul eyasamcojo tingma pac Samuel najan David. Payjoc maa tingma Naiot de Ramá — nic nat apquiltomjac. 23 Appeyvoc nic nat maa Saúl. Apvaac nic nat Naiot de Ramá. Pilapcasquic nic nat aptalhna apvalhoc Saúl espíritu apanco Dios. Apvajanamquic nic nat Saúl apquiltemaclha apquilayo Dios naysicsa apquiltaycam. 24 Apquiljalhyovasquic nic nat apquilantalhnama Saúl. Yiplovcoc nic nat appalhamaycam najan apquiltaycam napato Samuel, acnim anco najan alhtaa. Apcalhnayo ilhnic nat Saúl. Inlingalhquic nic nat amyaa lhalhma anco: ¿Naso ya Saúl aptomjayclho profeta? — nic nat intomjac amyaa.
© © Biblia en Enhlet (Lengua Norte) © Paraguayan Bible Society, 1995.
