Apquilyilhanmeycam moabitas
1 Apquilapajasquic nipquesic apquitcavoc apquilviscaa tingma Sela yoclhilhma actamopeycaoc, apquilvoyam Jerusalén.
2 Apquilyitsomacpo moabitas payjoc Arnón, malha nata ayitcavoc alantiyapma alhanaoc.
3 Apquilanyacpec maa co Jerusalén: ¡Jingilmiyov nincoo quellhip! Elpayes sat pisquisca tecjinlhit ingyitsicso acnim, colhojoc sat alhtaa aysicso. Jingilma sat tacja malha maycaa, elmiyovacpoc sat enlhitaoc apquilinyem.
4 Noelapajas nasa moabitas apquilyilhanmeycam nipyesicsa quellhip, elma sat tacja quellhip, meltovasacpejec sat, apvaa inlhojo singiltovascama — alhta apquiltomjac.
Comascoc sat mocjam aptovasomacpilha enlhitaoc, elvonquepoc sat apquiltomja singiltovascama.
5 Etnesacpoc sat apvisqui David aptavin niptamin. Cotalhcac sat actemaclha singamliyam. Etnejic sat singyicpilquemo mayayo, eyiplovcasojoc sat actemaclha acpeyvomo nipyesicsa enlhitaoc.
6 Ningyasamcoc nincoo apquiltemaclha moabitas apquilyimtalhnesomacpo apanco, actemaclha ayajamalhco apquilvalhoc, najan apquiltemaclha apquillhamasomap.
7 Apquilyapcalhquic maa apyovoclhojo co Moab, avanjec acmayovsa apquilvalhoc ayinyema mepqui aptoycaoc ayinyema tingma Kir-hareset.
8 Inquilyamamquic ayimjaclha uva payjoc Hesbón najan tingma Sibma, ayinyema apnatovascama apquilviscaa lhalhma anco. Inquilpayjeclhec alhta actengaoc acvaycmo tingma Jazer, acvaycmo yoclhilhma actamopeycaoc, najan acvaycmo yingmin acvanyam.
9 Avanjec sicvinama coo, aclhanma evalhoc ayimjaclha uva avjaoc tingma Sibma, najan tingma Jazer, najan aclhanma evalhoc tingma Hesbón najan Eleale. Apquilpalhamam alhta singilpilhtetemo cotnaja ingmoc naysicsa acnaclhamalhquilha acyilhna.
10 Comascoc sat apquilitsovascama amyip, mepqui sat apquilitsovascama ayimjaclha uva. Colanalhquejec sat mocjam uva ayingmenic payjoc ayajapsomalhquilha acyilhna, comascoc sat apquilitsovascama.
11 Impilhyinimquic coo evalhoc malha arpa nimpayvascama apquillhenacpo co Moab najan co Egipto tingma Zoán.
12 Elmiyaclhac sat co Moab netin inquilhe, elvascapoc sat apquililmalhnancama payjoc acyitnamaclha quilaycmasquiscama, alhtoc sat cotnejic — nic nat aptomjac profeta.
13 Eycaso appayvam apanco Visqui ingac apquillhenacpo ilhnic nat co Moab. 14 Aptomjac Visqui ingac quilhvo nac jay:
Mocjam tres años, acno ningiltamjaycam mataa acyovoclhojo año, colhic sat acvená mayayoclha co Moab. Mepqui mocjam enlhit appintalhnama, elaymacpoc sat apcanito, mepqui sat apquilyimnatem — alhta aptomjac — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
