Mayilhpanquiscama yoclhilhma apquileyvomaclha
1-7 Eycaso acnatalhesomalhca tribus apquilmolhama israelitas:
Ayenmo nicja payjoc nilhqueyja yingmin acvanyam Mediterráneo acyascama Hetlón, acvaycmo Hamat najan Hazar-enán, natamin payjoc nipiyam Damasco najan Hamat, cotnejic sat mataa apquileyvomaclha ayenmo actiyapmaclha acnim acvaycmo actalhningvamlha acnim: apquilvisay apquilmolhama Dan, najan Aser, najan Neftalí, najan Manasés, najan Efraín, najan Rubén, najan Judá.
8 Natamin coytic sat nicja yoclhilhma, ayenmo actiyapmaclha acnim acvaycmo actalhningvamlha acnim. Colyipsatalhcac sat acvamlha doce kilómetros y medio ancho, najan acvamlha acvinatem colhojoc sat moc apquileyvomaclha apnaymacoc. Payjoc naysicsa anco eytic sat tingma apponquinomap.
Visqui ingac yoclhilhma apanco acponquinomalhca
(Ez 45.1-6)9 Visqui ingac yoclhilhma apanco acponquinomalhca cotnejic acvamlha doce kilómetros y medio, najan diez kilómetros ancho. 10 Cotnejic sat nicja apquileyvomaclha sacerdotes, ayenmo nilhqueyja acvaycmo nipiyam acvamlha doce kilómetros y medio, najan actiyapmaclha acnim acvaycmo actalhningvamlha acnim acvamlha cinco kilómetros. Naysicsa maa eytic sat tingma apponquinomap apmaclha Visqui ingac. 11 Cotnejic sat acponquinomalhca apquileyvomaclha sacerdotes Sadoc aptovana, mepqui alhta selyamasma seltimesaycam mataa, naysicsa selyamasma levitas. 12 Naysicsa yoclhilhma acponquinomalhca acyitna nicja apquileyvomaclha levitas, cotnejic sat apquileyvomaclha sacerdotes amyip acponquinomalhca anco. 13 Napocja sacerdotes coytic sat apquileyvomaclha levitas acvamlha doce kilómetros y medio acvinatem najan cinco kilómetros ancho, colhojoc sat acvamlha yoclhilhma acponquinomalhca Visqui apanco (Dios apanco). 14 Actamila anco yoclhilhma, am colhno moc. Colapvanquejec mataa elyinyoc, colapvanquejec elyanmongsic moc, copvanquejec enlhit emiclha apanco, ayinyema actemaclha acponquinomalhca as yoclhilhma.
15 Moc nicja ayaymomalhca acvamlha doce kilómetros acvinatem najan dos y medio ancho cotnaja acponquinomalhca. Naysicsa maa eytic sat tingma Jerusalén, nipyava maa coytic amyip aleyvomaclha apnatoscama co Jerusalén. 16 Etnejic sat tingma Jerusalén acvamlha cuadrado dos mil doscientos cincuenta metros por lado. 17 Nipyava Jerusalén coytic sat amyip acvamlha ciento veinticinco metros ancho nipyava tingma. 18 Napocja tingma acyitna amyip payjoc yoclhilhma acponquinomalhca acvamlha acvinatem cinco kilómetros ayenmo actiyapmaclha acnim acvaycmo actalhningvamlha acnim. Cotnejic sat amyip apquilcaycaoc enlhit, elvitac sat acyilhna enlhit apquiltamjaycam tingma Jerusalén. 19 Moclhama apquilmolhama tribu apquilinyemayaclha enlhit apnaycam tingma apvanyam, elcaoc sat as amyip.
20 Acyovoclhojo apquileyvomaclha sacerdotes najan levitas najan apyovoclhojo tingma Jerusalén acyipitcay amyipayc maa, cotnejic acvamlha cuadrado doce kilómetros y medio por lado.
Amyip apanco apvisqui gobernante
(Ez 45.7-8)21-22 Coytic sat amyip apanco gobernante payjoc nicja apquileyvomaclha co Judá, najan moc nicja apquileyvomaclha co Benjamín. Moc acvisay lhama nicja najan moc nicja yoclhilhma acponquinomalhca, najan amyipayc nipyava tingma Jerusalén. Acvamlha doce kilómetros y medio ancho, ayenmo actiyapmaclha acnim acvaycmo actalhningvamlha acnim yingmin acvanyam. Naysicsa maa yoclhilhma apanco Visqui ingac najan tingma apponquinomap, najan maa levitas apancaoc, najan amyipayc nipyava tingma Jerusalén.
Yoclhilhma apquileyvomaclha poc tribus apquilmolhama
23-27 Nicja yoclhilhma nipiyam cotnejic sat apquileyvomaclha tribus apquilaymomap, ayenmo actiyapmaclha acnim acvaycmo actalhningvamlha acnim: apquilvisay tribu Benjamín, najan Simeón, najan Isacar, najan Zabulón, najan Gad.
28 Nicja apquileyvomaclha Gad payjoc nipiyam ayenmo Tamar acvaycmo tingma Meriba-cades najan vatsam acvisay Egipto, acvaycmo yingmin acvanyam Mediterráneo.
29 Ellhovamcoc sat israelitas as yoclhilhma actemaclha apquilmayclha moclhama tribu apquilmolhama, quellhip sat elmilascoc maa. Eycaso sicpayvam sicvisay Visqui apancaoc.
Tingma apatnaoc alyivey Jerusalén
30-34 Yitnec mataymong apjalhtam tingma nipyava maa, acvamlha dos mil doscientos cincuenta metros por cuatro lados. Moclhama muralla mataymong apjalhtam acnamco tres puertas, acno apquilvamlha tribus israelitas, payjoc nilhqueyja: Rubén, najan Judá, najan Leví. Payjoc actiyapmaclha acnim: José, najan Benjamín, najan Dan. Payjoc nipiyam: Simeón, najan Isacar, najan Zabulón. Payjoc actalhningvamlha acnim: Gad, najan Aser, najan Neftalí. 35 Acyovoclhojo mataymong apjalhtam acvamlha acvinatem alhta nueve mil metros. Apvisay tingma cotnejic sat mataa: Visqui ingac tingma pac — alhta aptomjac.
© © Biblia en Enhlet (Lengua Norte) © Paraguayan Bible Society, 1995.
