Actemaclha ningilmalhnancama
1 Visqui ingac. Lhip nac semasma coo.
Ingyeylhojo silmalhnancama.
Am sat ancoc ingyajalhnoc lhip, comascoc sat sictiyascam coo.
2 Ingyeylhojo siyevoycam sicpayvam acyimnatem yoyam jepasmoc.
Ingyeylhojo silmalhnancama sicmiyasquiclha netin emeoc payjoc tingma apponquinomap.
3 Nojetvas nasa lhip naysicsa apquilnapma lhip apquilmapsomcaa.
Nojetvas nasa lhip naysicsa apquilnapma lhip apquilyinimquiscama.
Apquiltemaclha apancaoc ellhenic acmasis apquilpayvam.
Acmasom anco apquilvalhoc as enlhitaoc.
4 Iyanmongsiclha sat lhip apquiltemaclha apquilsilhnanomap apanco.
Iyanmongsiclha sat lhip apquiltemaclha acmasom.
Iyanmongsiclha sat lhip apquiltemaclha apancaoc.
5 Am colhenalhcac nipyesicsa maa aptemaclha Dios Visqui ingac.
Am colhenalhcac nipyesicsa maa aptamjaycam simpilapquiscama Dios.
Enatovasacpoc sat ayinyema Visqui ingac.
Comascoc sat apquiltemaclha apancaoc.
6 Mayayo lhip Visqui ingac.
Apjalhnoc lhip silmalhnancama.
7 Visqui ingac aptomja semasma.
Epasmec coo ayinyema moyasquiyam.
Payjeclhec evalhoc coo.
Otnejic mataa gracias lhip naysicsa sicminaycmascama.
8 Dios Visqui ingac aptomja apyimtalhnamo nipyesicsa ingnaymacoc.
Dios aptomja apmasma najan aptamilquiscama visqui ingac.
9 Visqui ingac. Ilmiyov sat lhip ingnaymacoc.
Jingilpasim sat mataa aclhamoclhojo acnim.
© © Biblia en Enhlet (Lengua Norte) © Paraguayan Bible Society, 1995.
