Noeltime nasa malha apquilmomap
1 Apmascosquic alhta Cristo actemaclha malha ningmomalhca. Ingilvatescasquic ningyiplovquiscama singanamaclha. Noeliltamjo nasa eliltimjic mocjam malha apquilmomap. Eltime sat mataa malha enlhit metnaja apquilmomap.
2 Quip elaylhojo. Actomjac coo silanya quellhip: Apquilyiplovcasquic sat ancoc quellhip apquiltemaclha judíos yoyam colhic asoc monquinatquiscama apyimpeoc, ayajemo sat cotnejic quellhip melyasquiyam Cristo. 3 Pac otnejic ongvanic mocjam quellhip: Apquilyiplovcasquic sat ancoc quellhip apquiltemaclha judíos yoyam colhic asoc monquinatquiscama apyimpeoc. Incaymalhquic elsavojoc apquilyiplovquiscama acyovoclhojo singanamaclha. 4 Apquililtamjoc sat ancoc quellhip elyiplovcasojo apquiltemaclha judíos yoyam colhic altimesa apquilpeyvomo napato Dios, comascoc sat quellhip apquilpasmeyquiclha Cristo. Mongvityejec sat najan actemaclha singimlaycmo Dios. 5 Apnec nincoo ingilvalhoc Espíritu apanco Dios ayinyema mongyasquiyam. Yitnec aljalhneycam ingvalhoc yoyam jingiltimesic ningilpeyvomo Dios. 6 Ningilanalhco ningiltomja ninpasmeyquiclha Cristo Jesús. Colhenalhquejec mataa asoc monquinatquiscama ingyimpejic najan mepqui asoc monquinatquiscama ingyimpejic. Incaymalhquic coytic mongyasquiyam naysicsa ningyiplovquiscama actemaclha ningasicjayo.
7 Actamila anco actemaclha apquilyiplovquiscama quellhip siclhoc anco. ¿Soc alhta ayinyema apquilvatseycaoc quellhip apquilyiplovquiscama actomja nasoc anco? 8 Jave ayinyema Dios actemaclha apquilvatseycaoc quellhip. Ayinyemaclha Dios aptomja apcanama quellhip, malha apquileyvoycam. 9 Elyasamcojo quellhip: “Ningincajac sat ancoc ayimpascaoc ayitcoc, eyaveclhac sat sepo yompac actomja acyelaquiscama apyovoclhojo”. 10 Am oyascacmoc coo sictomja sicpasmeyquiclha Visqui ingac yoyam melyiplovsejec quellhip moc actemaclha. Dios sat eyanmongsiclha aptemaclha enlhit aptomja apquillhinganimquiscama quellhip. Colhenalhquejec sat apvisay enlhit naysicsa apyanmongsayclha Dios.
11 Quellhip elyalhinga. Pac olhenic sictemaclha mataa sillhicmoscama: Apquilanayquic napocja ingilyalhinga sicmasma apquiltemaclha judíos yoyam coytic asoc monquinatquiscama ingyimpejic. Acmiyovquic sat ancoc, mejelyamacsejec sat mataa judíos. Meltanovejec sat mataa amyaa ayinyema asoc timyescama. 12 Incaymalhquic colhic actimesa yamquilvana enlhitaoc apquillhinganimquiscama. Ayinyemaclha apquilanama yoyam eltingya quellhip asoc monquinatquiscama apyimpeoc.
13 Quellhip elyalhinga. Dios aptomja apquilanama quellhip, malha apquevoycam yoyam eltimjic mepqui apquilmomap. Noelquinatquis nasa: Nocollhen nasa apquilvalhoc apquiltomja mepqui apquilmomap, yoyam elvajanamcoc mocjam ayitsepma apnenyaoc apquiltemaclha nano. Elpasim sat mataa poc nipyesicsa quellhip, naysicsa apquilyiplovquiscama actemaclha ningasicjayo. 14 Ingvanquic onsavojo singanamaclha naysicsa ningyiplovquiscama ayimja amamyi acvisay: “Ingyasicjojo sat poc, acno apcasicjamacpo apanco” —intomjac mataa singanamaclha. 15 Noeltime nasa quellhip actemaclha asoc navjac. Intaclhec mataa moc, intovquic najan. Innasipquic mataa moc. Noellov nasa quellhip, malha yoyam eltovc poc.
Nintemaclha nano najan actemaclha ningiltamilcasomalhco inganco ayinyema Espíritu apanco Dios
16 Actomjac silanya quellhip: Eltamilsacpojo apanco ayinyema Espíritu apanco Dios. Comascoc sat apquilvajaneycaoc apquiltemaclha nano. 17 Ayinyemaclha nintemaclha nano actomja ayinmelhaycam Espíritu apanco Dios. Najan lha Espíritu apanco Dios aptomja apquinmelhaycam nintemaclha nano. Inlhenquic mataa ingvalhoc nintemaclha nano najan aptemaclha Espíritu apanco Dios, malha alnapomalhca intomjac ingvalhoc. Colapvanquejec quellhip elyiplovsic apquilmayjayoclha apanco. 18 Apquililyajaclhoc sat ancoc quellhip apcanama Espíritu apanco Dios, comascoc sat apquilanyomap quellhip elyiplovsic singanamaclha actomja malha avisqui apancaoc.
19 Cotnatsalhquejec mataa nintemaclha nano: actemaclha ningilanatama najan actemaclha nintamongvaycmolhma najan actemaclha mongiltamilcasomalhco inganco. 20 Najan actemaclha ningayo quilaycmasquiscama acyitsomalhca Dios najan actemaclha nintimem apyojolhma najan actemaclha nintanoncama najan actemaclha ningilatingmoctamo najan actemaclha ningilmiyoycam intava najan actemaclha ninlom najan actemaclha ningiltemo ontimjic ningimja ingmamyi najan actemaclha colhno moc ingvalhoc najan actemaclha ningilhpansomalhca. 21 Najan actemaclha ningyasipquiscama najan actemaclha mongascama ongyinic anmin najan mongascama ontoc nintom najan acno moc aclhamoclhojo asoc. Altimnasquic alhta siclhoc quellhip, pac oltimnasiclhoc mocjam: Ningilvajanamquic sat ancoc as asoc, mongvanquejec ongilpalhavomoc Dios apquilnancascama.
22 Asoc altamila eyca, malha acyilhna ayinyema Espíritu apanco Dios acvisay: actemaclha ningasicjayo najan actemaclha acpayjayclha ingvalhoc najan actemaclha actamilaycam ingvalhoc najan actemaclha nintamilquiscamo ingvalhoc najan actemaclha acliclamo ingvalhoc najan actemaclha ningamliyam najan actemaclha mongilvatseycaoc ningyiplovquiscama. 23 Najan actemaclha mepqui ningyimtalhnesomalhco inganco najan actemaclha ningiltamilcasomalhco inganco. Am coyitnac lhama singanamaclha yoyam conmelham as asoc. 24 Apquilvatsamquic apquiltemaclha nano enlhitaoc apquiltomja apquilyipitcayo Cristo. Inmasquec actemaclha anco ingvalhoc nano. 25 Ningyiplovcasquic nincoo actemaclha ayinyema Espíritu apanco Dios. Espíritu Santo aptimesquiscama ingvalhoc yoyam ongyiplovcasojo.
26 Incaymalhquic mongilyiplovsic mocjam actemaclha ningilyimtalhnesomalhco inganco najan actemaclha ninglovquiscama ingmoc najan actemaclha ningyasipquiscama nipyesicsa ingnaymacoc.
© © Biblia en Enhlet (Lengua Norte) © Paraguayan Bible Society, 1995.
