Apquilpamejitsomap yavamlha eltimjic
1 Apcaneclhec nic nat apyovoclhojo israelitas tingma Mizpa napato Dios. Apquilinyemac nic nat tingma Dan acvaycmo tingma Beerseba najan tingma Galaad. Am nic nat ingyaymacpoc lhama. 2 Apcaneclhec nic nat apyovoclhojo enlhitaoc mayayo tribus Israel, najan maa apquilvisay apquilmolhama Dios, cuatrocientos mil enlhitaoc acma apquilmaycam. 3 Inlingalhquic nic nat amyaa nipyesicsa apquilmolhama tribu Benjamín, actemaclha apquilanayclha apquilmolhama Israel tingma Mizpa. Apquiltomjac nic nat israelitas apquilanya levita: —¿Co laa ayinyema alhta acmatnam? — nic nat apquiltomjac.
4 Apcatingmavoc nic nat levita, quilvana ayitsepma atava: —Acmiyaclhec alhta coo tingma apvanyam Gabaa, apquileyvomaclha tribu Benjamín. Siclhalhma alhta moc etava. Ningiltamjoc alhta onlhic alhtaa. 5 Pilapcasquic alhta apquilvaa enlhitaoc as tingma. Apquilvocjac alhta tingma sicnaclha coo. Apquililtamjoc alhta jelajic. Apnatovasquic alhta moc etava acvaycmo ayitsepma. 6 Acmec alhta ayitsepma, sicyatemena navayc alyiptetaclha. Ayapajasquic alhta navayc lhalhma anco apquileyvomaclha enlhitaoc Israel. 7 Quellhip enlhitaoc Israel, elyasamcojo yavamlha eltimjic quilhvo nac jay — nic nat aptomjac levita.
8 Apcaneclhec nic nat netin apyovoclhojo enlhitaoc, apquiltomja apquilanya: —Copvanquejec etajiclha tingma pac lhama ningyesicsa. 9 Ongilmoc sat (ontovacsic) sicas, ongilyasamcojo apquilvamlha apquilmolhama yoyam elimpocjac tingma Gabaa. 10 Lhama mataa ingyanyacpoc enlhit nipyesicsa diez apnaymacoc. Eltingyasquisic mataa nintom eltovamcoc apyovoclhojo enlhitaoc. Poc enlhitaoc elimpocjac sat tingma Gabaa, elyanmongsiclhac sat apquiltemaclha apancaoc acmasom nipyesicsa israelitas — nic nat apquiltomjac.
11 Apquicjingvocmec nic nat apyovoclhojo israelitas, am nic nat ingyaymacpoc lhama. Elimpocjac sat tingma Gabaa. 12 Apquilapajasquic nic nat apquilsoycam amyaa, elsavojo apquileyvomaclha tribu Benjamín, eliltimnacsic sat amyaa: —Apquiltemaclha apancaoc apquilmapsomcaa quellhip. 13 Elantipquis sat quellhip, yoyam ongilmoc as enlhit apquilmapsomcaa apnaycam tingma Gabaa. Eticyoc sat quilhvo nac jay, colhic sat acmascosa ningilsilhnanomalhca inganco ningilvisay Israel — nic nat intomjac amyaa.
Am nic nat eljalhnoc apquilmolhama Benjamín apquilpayvam apnaymacoc israelitas. 14 Apcaneclhec nic nat apyovoclhojo apquilmolhama Benjamín apnaycam as tingma Gabaa. Apquililtamjoc nic nat elinmelham israelitas, elnapacpoc sat maa. 15 Poc tingma apquilmolhama Benjamín apquilpasingvoctac nic nat malha veintiséis mil singilpilhtetemo. Paj nic nat mocjam malyacyescama tingma Gabaa acvaycmo setecientos singilpilhtetemo. 16 Apnam nic nat nipyesicsa maa, apquiltemaclha apquilmaycam sancalvelha, malha setecientos apquilyimnatem. Apvancaac nic nat yamvanteta, mepqui ilhnic nat apquiltaticpongam. 17 Apcaneclhec nic nat singilpilhtetemo israelitas cuatrocientos apquilyimnatem acma apquilmaycam.
Apticyovam israelitas nipyesicsa apquilmolhama Benjamín
18 Apquilmiyaclhec nic nat tingma Betel israelitas. Elyasamcojoc sat napato Dios Visqui ingac apquilvisay apquilmolhama, yavamlha elimpocjac siclho apquilmamyi nipyesicsa apquilmolhama Benjamín. Aptomjac nic nat Dios Visqui ingac apquilanya: —Elimpocjac sat apquilmamyi apquilmolhama Judá. 19 Apnalhaticjac nic nat israelitas alhtooc anco, apquicjingvocmo ningatoc tingma Gabaa. 20 Apquiltimyesaclhec nic nat apyovoclhojo, elnapacpoc sat jilip tingma Gabaa, apquilantepa inlhojo apquilmolhama Benjamín. 21 Apquilantipquic nic nat tingma apvanyam apquilmolhama Benjamín. Apquilnapacpec nic nat. Apticyovquic nic nat as acnim veintidós mil israelitas. 22-24 Apquiltajavoc nic nat israelitas tingma Betel. Apquilyapcalhquic nic nat maa acyovoclhojo acnim napato Dios. Apquiltamjoc nic nat elyasamcojo mocjam apquilvisay apquilmolhama, yavamlha elimpocjac mocjam nipyesicsa apquilmolhama Benjamín. Apquilanyacpec nic nat ayinyema Dios Visqui ingac, yavamlha elimpocjac mocjam. Inquilmec nic nat apquilvalhoc apquillinga, apquilvascapquic nic nat mocjam. Moc acnim nic nat apquilmiyaclho mocjam, elhnasojoc sat apquiltemaclha acnim alhta, elnapacpoc sat apquilmolhama Benjamín, payjoc apquicjingvoycamlha acnim alhta. 25 Mocjam lhama apquilantepac nic nat apquilmolhama Benjamín tingma Gabaa, yoyam elnapacpoc. Apticyovquic nic nat dieciocho mil singilpilhtetemo israelitas. 26 Apquiltajavoc nic nat mocjam tingma Betel singilpilhtetemo israelitas najan apyovoclhojo apquillhalhmaa. Apquilyapcalhquic nic nat napato Dios Visqui ingac. Am nic nat eltovcamcoc acyovoclhojo acnim. Apquilnapquic nic nat apnatoscama macmescama Dios acyanmongam melyascalhma. Apquiltingyac nic nat moc asoc macmescama Dios, yoyam colhic ayasicjayquiclho mocjam napato Dios Visqui ingac.
27-28 Yitnec nic nat tingma Betel yamit aysicsic acyitnamaclha Dios appayvam. Sacerdote ilhnic nat apvisay Finees, Eleazar apquitca, Aarón aptavin niptamin. Apquilpamejitsacpec nic nat mocjam Dios Visqui ingac: —¿Intasi ya ongilimpocjac mocjam ningilmolhama tribu Benjamín? ¿Intasi ya onticyoc mocjam? — nic nat apquiltomjac. Apcatingmavoc nic nat mocjam: —Elimpocja sat mocjam quellhip, otnesquisic sat apquilyimnatem quellhip — nic nat aptomjac.
29 Apquilyilhanmec nic nat napocja singilpilhtetemo israelitas nipyava tingma Gabaa. 30 Poc nic nat apquilmiyaclho natqui acnim (tercer día), apquiltimyesaclho ningatoc tingma Gabaa, acno siclhoc alhta. 31 Apquilantipquic nic nat mocjam tingma apvanyam apquilmolhama Benjamín, yoyam elnapacpoc israelitas. Apquilnapquic nic nat treinta israelitas, payjoc amay najan amyip tingma Betel najan Gabaa. 32 Apquilanem nic nat apquinyajaycaoc israelitas, acno siclhoc anit apquinyajaycaoc. Malha apquilinyem nic nat siclho israelitas as acnim, apquilanem nic nat cotnaja ingmoc elminlhinam acvaycmo amay. 33 Apquiltimyesaclhec nic nat payjoc Baal-tamar, yoyam elnapacpoc. Pilapcasquic nic nat apquilantepa nipyava tingma apquilyilhanmomaclha singilpilhtetemo israelitas. 34 Apquilimpocjac nic nat tingma Gabaa. Apquilvamlha ilhnic nat diez mil enlhitaoc acma apquilmaycam israelitas. Apquilvascapquic nic nat apquilnapomacpilha, asilhtec nic nat apquilyimnatem apquilmolhama Benjamín. Am nic nat elyasamcoc maa. 35 Aptimescasquic nic nat Dios Visqui ingac eltimjic apquilyimnatem israelitas, am nic nat elhno apquilmolhama Benjamín. Apticyovquic nic nat as acnim veinticinco mil cien singilpilhtetemo tribu Benjamín. 36 Apquilyasingvocmec nic nat apquilaymomap actomjaclha nelha apquileyvam.
Apquiltemaclha ilhnic nat israelitas: Apquilinyajamquic nic nat siclho, oyam elimjamcoc cotnaja ingmoc. Inlhenquic nic nat apquilvalhoc apnaymacoc apquilyilhanmeycam, yoyam elimpocjac tingma Gabaa. 37 Pilapcasquic nic nat apquilimpocja tingma Gabaa. Apticyovquic nic nat apyovoclhojo tingma. 38 Apquilpamejitsacpec nic nat ellana asoc monquinatquiscama, cotyapoc sat etin acvanyam naysicsa apquilimpocjay tingma apvanyam. 39 Elpaycomoc sat mocjam israelitas apquilinyem, yoyam elnapacpoc apquilmolhama Benjamín.
Apticyovquic nic nat treinta israelitas apquilnapomap, apquilanem nic nat colhojoc sat apquilinyem siclhoc anco. 40 Pilapcasquic nic nat apquilvita etin acvanyam natingma. Apquilvitac nic nat apquilmolhama Benjamín talha acvanyam najan etin acvanyam, nitnoc anco. 41 Apquilpaycacmec nic nat yoyam elnapacpoc. Avanjec nic nat ayay apquilvalhoc apquilmolhama Benjamín. 42 Apquilinyajamquic nic nat napatavo israelitas amay payjoc yoclhilhma actamopeycaoc. Pilapcasquic nic nat apquiltajanyaa singilpilhtetemo apquilantiyapma tingma apvanyam. Apticyovquic nic nat maa apquilmolhama Benjamín. 43 Apquilvocjingvocmec nic nat israelitas nipyava apquilmolhama Benjamín. Apquilminlhinquic nic nat maa. Apticyovquic nic nat apquilmolhama Benjamín. Apquilminlhinquic nic nat maa. Apticyovquic nic nat apquilmolhama Benjamín, ayenmo Menúha acvaycmo Gabaa actiyapmaclha acnim.
44 Apticyovquic nic nat dieciocho mil singilpilhtetemo tribu Benjamín. 45 Poc apquilaymomap apquilinyajamco ilhnic nat yoclhilhma actamopeycaoc acyitnamaclha mataymong acvinatem Rimón. Apquilvitacpec nic nat cinco mil apquilitsepma nalhit amay. Apquilminlhinacpec nic nat mocjam, apquilvitacpo mocjam dos mil apticyovam. 46 Apticyovquic nic nat as acnim veinticinco mil enlhit apquilyimnatem apquilmolhama Benjamín. 47 Apquilinyajamquic nic nat yoclhilhma actamopeycaoc seiscientos apquilmolhama Benjamín. Apquilnaclhec nic nat cuatro meses payjoc mataymong acvinatem Rimón. 48 Apquilsovjoc nic nat israelitas apquileyvomaclha Benjamín. Apquilnapquic nic nat apyovoclhojo tingma najan apnatoscama. Apquilvatnec nic nat talha tingma apquilvanyam.
© © Biblia en Enhlet (Lengua Norte) © Paraguayan Bible Society, 1995.
