Apvoyctamlha sat Visqui ingac
1 Quellhip elyalhinga. Eycaso actomja anit vaycajac sictalhosayclho quellhip. Altamjoc alhta siclhoc lhama najan moc vaycajac oltimnacsic yoyam elyasingvoclhojo quellhip. 2 Elyasingvoclhojo quellhip actemaclha apquillhanma ilhnic nat profetas Dios apquilyacyescama. Elyasingvoclhojo apcanamaclha Visqui ingac aptomja singvomquiscama tap. Eycaso apquiltomja apquillhicmoscama apóstoles apquilapajasomap nipyesicsa quellhip.
3 Elyasamcojo siclhanma quilhvo nac jay: Covac sat actomjaclha nelha acnim. Elasmacsic sat enlhitaoc apquilmapsomcaa asoc alponquinomalhca alinyema Dios. Elvajaniclhojoc sat as enlhitaoc actemaclha ayitsepma apnenyaoc. 4 Sat eltimjic as enlhitaoc: “¿Co sat acvam cotnejic apvoyctamlha Visqui ingac, aplhanma alhta? Ayinyemaclha apquilitsepmec ningilyeyjamcaa. Innoc nanoc nic nat ayenmoclha apquilantipquiscama asoc najan as ningvamlha nac jay. Am ongvitayac moc actemaclha” —sat eltimjic mataa. 5 Am elyasamcoc as enlhitaoc actemaclha ilhnic nat netin. Najan actemaclha ilhnic nat nalhpop aptipquiscama yingmin Dios, ayinyema appayvam. Covanqueje am colhic yingmin as nalhpop. 6 Intovasquic nic nat as nalhpop yingmin acvanyam. Apsovjomacpoc nic nat apquilitsepma enlhitaoc. 7 Apquiltamjoc Dios yoyam colhic altamilsa netin najan nalhpop acvocmo acnim yoyam colmetic. Colmetic sat acvocmo sat acnim yoyam elyicpilcacpoc najan elnatovasacpoc sat enlhit apquilmapsomcaa.
8 Quellhip elyalhinga, nocolvonquim nasa: Lhama acnim napato Visqui ingac actomja malha mil años. Najan mil años napato Visqui ingac actomja malha lhama acnim. 9 Apquilanayquic napocja enlhitaoc: Yejemec mocjam comoc nelha aplhanmaclha Visqui ingac —apquiltomjac mataa. Paj inyicje. Ingiljalhnec nincoo Visqui ingac, ayinyemaclha apquiltamjoc siclho yoyam elyanmongsic apquilvalhoc aplhamoclhojo enlhitaoc yoyam metvasacpeje lhama enlhit.
10 Cotlapsic sat covac acnim apác Visqui ingac, malha enlhit apminyilhma yoyam evac alhtaa, sat cotnejic. Comascoc sat netin, malha ayilhtingyovam acyiviy sat cotnejic. Colmetic sat asoc netin najan asoc as nalhpop. Comyetic sat acyovoclhojo.
11 Colmasquingvomoc sat aclhamoclhojo asoc. Collhen sat mataa apquilvalhoc quellhip asoc yoyam colvac sat. Eltamilsacpojo apanco quellhip, elavojo sat mataa Dios Ingyapam. 12 Elalh sat quellhip Dios acnim apác acvanyam. Ayinyemaclha comyetic sat netin. Elmetic sat apyova, elpayjiclhac sat naysicsa talha. 13 Nincoo eyca ningiljalhnec ongvita netin alhnancoc najan nalhpop alhnancoc, actemaclha ilhnic nat aplhanma Dios. Ongvita sat maa acvamlha asoc alpeyvomo najan asoc altamila.
14 Quellhip elyalhinga. Ningiljalhnec inyicje asoc alyimtalhnamo yoyam colvac sat. Eltamilsacpojo apanco quellhip yoyam coytic actamilaycam apquilvalhoc napato Dios, najan mepqui apquiltamongvaycmolhma, malha mepqui alpaysameycaoc. 15 Elyasamcojo quellhip, ingiljalhnec nincoo Visqui ingac yoyam ongilvomsalhcac tap nincoo. Acno alhta aptalhesquiscama ingyimpa Pablo; yoyam elyipsitic quellhip. Apyascamco alhta innac Pablo ayinyema Dios. 16 Yitnec aclhanma as asoc vaycajac apnatalhescama Pablo. Yitnec najan asoc aclhanma vaycajac yoyam mongilyasingvomoc aclhanma. Eycaso ayinyema apquilyitnocjascama amyaa ingilyalhinga melinlhanyam najan melyascamco. Inyiplovcoc mataa apquilyasquiyam, elnatovasacpoc sat.
17 Quellhip elyalhinga. Apquilyasamcoc quellhip as asoc. Elavojo quellhip enlhitaoc yoyam ellhinganimsic quellhip naysicsa melyasquiyam. Apquililtamjoc elvatesquisamcoc actemaclha melyasquiyam quellhip.
18 Elyasingvom sat mocjam actemaclha singasicjayo Jesucristo Visqui ingac aptomja singvomquiscama tap. Pac ongiltimjic ningilayo Visqui ingac quilhvo nac jay acvocmo actamongvomlha nelha acnim. Amén.
© © Biblia en Enhlet (Lengua Norte) © Paraguayan Bible Society, 1995.
