Eliú appayvam cuarto discurso
1-2 Aptomjac nic nat Eliú apcanya: Yejemec siclho, pac oyascasingvomoc sat lhip, olngacsic sat mocjam apvisay Dios Visqui ingac.
3 Avanjec coo sicyascamco, yoyam oyascasingvomoc lhip Dios Visqui apyimtalhnamo.
4 Jave sicmovan amyaa, coo eyca sicyascamco ajanco napato lhip.
5 Apmopvan apanco najan appeyvomo nac Dios, mevenacpejec mataa enlhit meyascamco.
6 Am emyavac mataa enlhit apquilmapsomcaa, aptomja apmasma enlhit mepqui asoc.
7 Apmiyovquic mataa Dios enlhit apquilpeyvomo, najan apquilviscaa, yoyam colhic ayaco.
8 Apquilmacpec sat ancoc, ellingamcojoc apquilpilhquetem cadenas.
9 Eyascasingvomoc sat Dios apquiltemaclha apquilsilhnanomap apanco najan actemaclha ayajamalhco apquilvalhoc.
10 Aplingasquic apcanamaclha Dios, apquilanyomap elvatsamcoc apquiltemaclha acmasom.
11 Apquilyajaclhoc sat ancoc maa, colpayjiclhac sat apquilvalhoc aclhamoclhojo acnim.
12 Am sat ancoc elilyajaclhoc, elitsapoc sat naysicsa mepqui apquilyascamco.
13 Ellovc sat apquilmapsomcaa, am elilmalhnac yoyam epasingvota Dios naysicsa apquilmomap.
14 Comascoc sat apquileyvam apquiltimem apquilyimnanic, elitsapoc sat maa.
15 Cotamiliclhac sat nintemaclha, ayinyema ninlingaycamco acyimtalhnama. Jingilyascasingvomoc sat Dios, ayinyema acmasca ingyimpejic.
16 Lhip Job aptomja apvomsomap tap naysicsa aplingaycamco acyimtalhnama, yoyam etyisam mocjam. Aplhocac lhip cotlaycaoc aptom actamila.
17 Eyicpilcacpoc sat lhip, yoyam etvasacpoc, elngamcojoc sat acyimtalhnama apno apmopvan.
18 Ingyavojo, noilov nasa lhip. Memyovacpejec sat lhip ayinyema apyamasma acyivey acyanmongam.
19 Comalhquejec sat lhip asoc apancaoc, memyovacpejec sat ayinyema oro najan apmopvan.
20 Nolalh nasa alhtaa, yavamlha elnatovasacpoc sat apyovoclhojo enlhit.
21 Ingyavojo sat lhip, notne nasa apmapsom, ayinyema aplingaycamco acmasca apyimpejic.
22 Quip ilanojo apmopvan apanco Dios apyimtalhnamo, aptomja singyascasingvoyam, am elhno enlhit apanco.
23 Paj comopvan enlhit ingyanic Dios, yavamlha etnejic. Mengyanyacpejec mataa Dios: Apsilhnanomap apanco lhip - paj.
24 Itne sat lhip apcayo Dios, apno enlhitaoc apquilayo naysicsa apquilminaycmascama.
25 Apquilvitac enlhitaoc aptomjaclha Dios, apquilvitac mataa apnaycam mocjay.
26 Mongvanquejec ongilyasamcojoc acvamlha apyimtalhnamo Dios, najan acvamlha años aptiyascam mataa Dios Visqui ingac.
27 Apcansaclhec mataa yipjopay netin, cotniclhac acmamay, copalamoc yingmin nalhpop.
28 Yipjopay ayinyema yingmin acmamay, acpalentama tacjaplhit aplhamoclhojo enlhit.
29 ¿Co laa ayinyema yipjopay? ¿Co laa ayinyema ayilhtingyavoyam? ¿Soc lha apyasamco?
30 Invitalhquic netin alyinmayam am eyca cotamalhcac coning yingmin acvanyam.
31 Aptimescasquic Dios, yoyam elvitac acyilhna eltovamcoc aplhamoclhojo enlhit.
32 Apmaycam Dios alyinmayam, etimsic sat tacja, cajic sat nalhpop acpayjoclha apcanama.
33 Ayilhtingyavoyam actomja monquinatquiscama acmamayaclha. (Cotalhcac sat aplom pac Dios.) Colvitac sat ninatoscama, yoyam comamac sat.
© © Biblia en Enhlet (Lengua Norte) © Paraguayan Bible Society, 1995.
