Apcapajasomap Pablo tingma Roma
1 Lhama alhta ningillhenalhco, yoyam ongilyacsic yoclhilhma Italia. Apnec alhta singilpilhtetemo apvisqui Julio, aptomja capitán apquinyema batallión de Augusto. Apcanyacpec alhta Julio enaliclha Pablo najan apquilpilhquetomacpo lhama. 2 Ningilquinamtec alhta barco ayinyema tingma Adramitio. Pac alhta colhong, yoyam coyacsic niyava yingmin yoclhilhma Asia. Ningillhinquic alhta nincoo. Ninlhalhma nintomjac Aristarco co Macedonia, tingma pac Tesalónica. 3 Moc acnim alhta intomjac ningilvoclho tingma (niyava yingmin) Sidón. Apquimlacmoc alhta Pablo capitán Julio. Apcavoc alhta, yoyam etyaningvoclhojo Pablo apnaymacoc, yoyam elhca aptom nalhit amay. 4 Ningilquimpaclhec alhta mocjam tingma Sidón. Ningilmiyaclhec alhta nicja inquilhe acvisay Chipre. Ninsancalvelha alhta inpejeveclha Chipre. Ayinyemaclha piyam (apyimnatem) alhta ningiltajanyaa. 5 Ningiltamacac alhta yingmin acvanyam acpayjo yoclhilhma Cilicia najan acpayjo yoclhilhma Panfilia. Ningilvoclhec alhta tingma Mira yoclhilhma Licia.
6 Apvitangvoclhec alhta capitán lhama barco ayinyema Alejandría, yoyam coyacsic yoclhilhma Italia. Yejemoc alhta ningilanyalhco ongilquinamtic barco. 7 Intamilsamcoc alhta aclhingam barco aclhamoclhojo acnim. Avanjec alhta ningiltamjaycam ninlhinquiscama. Ningilvoclhec alhta tingma Gnido. Ningiltajanyaac alhta mocjam piyam. Ningilyeycajangvoclhec alhta yoclhilhma Salmón. Ningilvoclhec alhta nicja acyayem inquilhe acvisay Creta. 8 Intamilsamcoc alhta aclhingam barco nicja acyayem inquilhe. Ningilvoclhec alhta lhama tingma apvisay Buenos Puertos, ningatoc tingma Lasea.
9 Acvoncaclho alhta ningillhingam. Ningilacac alhta, yoyam ongillhong yingmin acvanyam. Insovjalhquic alhta acnim singilmalhnesquiscama ingilyalhinga (actemaclha ningilmalhnancama mongmajay ontovamcoc). Yejemoc alhta apcasa Pablo aptomja apquilanya:
10 —Enaymacoc, acyasamco coo. Cotamilejec sat ningillhingam barco. Cotvasam sat barco najan asoc acpatmeycam. Ongitsilhnanalhcac sat nincoo lha, yoyam ongilvayvamcoc —alhta aptomjac.
11 Apyascacmec alhta capitán actemaclha aplhanma Pablo. Am alhta eyca eyascacmoc capitán aplhanma barco avisqui ac (aplhinquiscama barco). 12 Invocmec alhta invierno mepqui lha nintom. Am alhta ongvanac onlhic acvaycmo mocjitma. Apquilpecjam alhta aplhamoclhojo, yoyam ongilquimpiclha mocjam barco. Ongilvoclhojo sat tingma Fenice nicja acyayem inquilhe Creta. Intasic ongnaclhac maa tingma alyilhningvaclha piyam acvocmo mocjitma.
Yatipiyam naysicsa yingmin acvanyam
13 Yamapquilhcajayam alhta intomjac piyam. Apquilpecjam alhta ellhong mocjam. Apquilquimpaclhec alhta mocjam. Incamquitvoclhec alhta nicja acyayem inquilhe Creta. 14 Yejemoc alhta apquilhcajacmo yatipiyam apyimnatem. Apquiltimec alhta apvisay Noreste, apquinyema nicja nilhqueyja acpayjo tiyapmaclha acnim. 15 Apyingamquic alhta barco yatipiyam apyimnatem. Malha acmaycaoc alhta intomjac barco. Apquilvatasquic alhta yoyam elhingsic aptomja aplhinquiscama. Invayncamamquic alhta aclhingam. 16 Invocmec alhta barco ayapalhquilha acyayem inquilhe ayitcoc acvisay Claudia. Avanjec alhta ningiltamjaycam canoa actetomalhca atala barco. 17 Yejemoc alhta ningilyinyovasa canoa ningilyasquisa netin barco. Ningilpilhtetaclhec alhta barco tama ac. Incacoc alhta innenyic comamcoc barco lhopactic acvisay Sirte. Ningiljalhyovasquic alhta apava netin alanquiscama barco. Ningavoc alhta apsova barco yatipiyam. 18 Moc acnim alhta intomjac. Apquilhcajacmec alhta mocjam yatipiyam. Yejemoc alhta apquilquilha nayingmin asoc acpatmeycam barco. 19 Natqui acnim alhta intomjac. Yejemoc alhta apquilquilha nayingmin asoc apquilmaycam. 20 Am alhta ongvitac acnim najan apyova aclhamoclhojo acnim. Am emascac mocjam apquilhcajayam yatipiyam. Inlhenquic alhta ingilvalhoc, yoyam ongilvayvamcoc sat.
21 Acvoncaclho alhta mongilmajay ontovamcoc. Yejemoc alhta apquiningvoclho Pablo nipyesicsa. Aptomjac alhta apquilanya:
—Enaymacoc. Intasic alhta inyicje melyascomoc quellhip sicpayvam siclhena alhta, yoyam onlhic mocjam acyayem inquilhe Creta. Yoyam alhta mongitsilhnanalhqueje najan mongitsilhnanejec ningilnatam. 22 Actomjac coo siyanya quellhip: Elyimnaticsojo apquilvalhoc. Mongilmasquejec sat nincoo. Barco sat eyca covayvamcoc. 23 Acvitac lhac coo lhama ángel apquinyema Dios Ingyapam alhtaa lhcac. Aptomja Visqui ajac, coo eyca sictomja silancam. 24 Aptomjac lhac seyanya: “Nongya nasa Pablo. Incaymalhquic evoclhac sat lhip apnaclha apvisqui co Roma. Eycaso ayinyema, yoyam elvomsacpoc tap aplhamoclhojo apquillhalhmaa” —alhta aptomjac ángel Dios apcasinancama. 25 Quellhip enaymacoc. Elyimnaticsojo apquilvalhoc. Moyascacmoc coo Dios Ingyapam. Acyasamcoc najan, nasoc sat cotnejic actomjaclha lhac seyanya ángel Dios apcasinancama. 26 Incaymalhquic eyasquisic piyam apyeneycaoc barco nicja acyitnaclha acyayem inquilhe.
27 Anit semana alhta intomjac ningillhingam yingmin acvanyam acvisay Adria. Invayncamamquic alhta mataa apyeneycaoc piyam. Alhtaa aysicso alhta intomjac apquilanya elvitac inquilhe enlhitaoc marineros. 28 Apquilyipsatamquic alhta acvamlha congnoc yingmin. Apquilyipsatquic alhta treinta y seis metros. Apquillhinquic alhta mocjam tap. Apquilyipsatquic alhta mocjam lhama. Veintesiete metros alhta invocmoc mocjam. 29 Incacoc alhta apnenyaoc cotyengvomoc mataymong barco. Yejemoc alhta apquilhantamo atala barco cuatro apyamyeyquinta yingmin. Apquililjalhnec alhta, yoyam cotsac. 30 Inlhenquic alhta apquilvalhoc ingyinyajamcoc enlhitaoc marineros. Yejemoc alhta apquilvayvesantamo canoa nayingmin. Malha yoyam onquilhantac avajic barco apyamyeyquinta alhta apquiltomjac. 31 Aptomjac alhta Pablo apcanya capitán najan singilpilhtetemo:
—Am sat ancoc elhnam mocjam avalhoc barco as enlhitaoc, melvomejec sat tap quellhip —alhta aptomjac.
32 Yejemoc alhta apquilyatemena tama ac actetomalhca canoa singilpilhtetemo. Yejemoc alhta actiyacmo nayingmin canoa.
33 Inquitsacac alhta apquilanya Pablo eltovamcoc enlhitaoc:
—Invocmec quilhvo anit semanas mepqui apnatiyanma najan mepqui aptoycaoc quellhip. 34 Actomjac coo siyanya quellhip: “Eltovaoc sat, yoyam elvomoc tap quellhip. Cotyemejec sat lhama ava apcatcoc quellhip” —alhta aptomjac.
35 Natamin apquiltimnascama alhta Pablo apma quilpasmongam. Aptomjac alhta gracias Dios Ingyapam napatavo enlhitaoc. Yejemoc alhta apyapta. Aptovquic alhta. 36 Yejemoc alhta altamilaclho apquilvalhoc enlhitaoc. Aptovcamquic alhta najan. 37 Doscientos setenta y seis alhta apvocmoc enlhitaoc avalhoc barco. 38 Natamin aptoycaoc alhta apquiljalhyovasa motajap apactic. Apquilhaquic alhta nayingmin, yoyam colhyevayclha barco.
Barco acvayveycaoc
39 Lhama alhta ayitsaca. Am alhta elyicpilcac yoclhilhma. Apquilvitac alhta inyicje lhopactic niyava yingmin. Apquililtamjoc alhta elvoclhac maa. 40 Apquilyatemenquic alhta alhataoc apyamyeyquinta nayingmin, yoyam colvayvamcoc. Apquiljalhyovasquic alhta najan quilpilhtetem apquilpaycameycaoc. Apquilquilhnec alhta netin apava avajic barco. Incamquitvocmec alhta niyava acyayem inquilhe. 41 Invoclhec alhta barco actomjaclha acyapaleycaoc yingmin netin lhopactic. Inmamquic alhta barco. Inticlhicvocmec alhta avajic lhopactic. Am alhta colcalhca. Inquintec alhta atala barco. Alyayajayam alhta inquintasac. 42 Apquililtamjoc alhta singilpilhtetemo elnapiclha enlhitaoc apquilpilhquetomap. Incacoc alhta apnenyaoc elinquitic aptomja apmopvancaa elmoc yingmin. 43 Apmiyovquic alhta capitán. Apquiltamjoc alhta evomsic tap Pablo. Aptomjac alhta capitán apquilanya enlhitaoc:
—Elnilhting nayingmin apmamyi aptomja apmopvancaa elmoc yingmin. Elvoclhojo sat inquilhe niyava yingmin. 44 Alhayi sat elnilhtong poc nayingmin. Yamit nicjaa sat elpatjetic najan moc yamit, yoyam elimjamcoc apnaymacoc —alhta aptomjac capitán.
Apsovjacpec alhta enlhit apquilyipjongvoyam. Apquilvocmec alhta tap.
© © Biblia en Enhlet (Lengua Norte) © Paraguayan Bible Society, 1995.
