Actemaclha appayvam Job
1-2 Aptipcasquic nic nat appayvam Job. Aptimescasquic nic nat acmasom acnim aptiyaycamlha.
3 ¡Somcoc anco as acnim sictiyaycamlha alhta! ¡Somcoc anco as alhtaa, sictimesomalhca avalhoc meme coo! — nic nat aptomjac.
4 Dios Visqui ingac, ingyane sat cotniclhac yatescamalhma as acnim sictiyaycamlha coo. Colhenalhquejec mataa as acnim, cotalhquejec sat mataa ayitsay.
5 Cotniclhac sat mocjam yatescamalhma as acnim, cajapvotac sat yipjopay acpasyam. Cotniclhac sat eclipse mongvitay acnim, cajancac sat maa.
6 Ingyane sat as alhtaa sictiyaycamlha covonquepoc naysicsa yatescamalhma. Colyipsatalhquejec sat mataa as acnim moclhama piltin, najan moclhama año.
7 Itnesiclha mepqui actamila as alhtaa, cotalhquejec sat mataa apquilitsovascama.
8 Apyojolhma sat etnesquisic acmasom alhtaa, apmopvan apanco ayinyema sinavocpo.
9 Ingyane sat metacpejec apyová apyivey, cotyepejec sat acmopayam congne, cotyepejec sat ayitsay.
10 Somcoc anco as alhtaa sictiyaycamlha coo, ayinyemayaclha siclingaycamco acyimtalhnama.
11 Tasic alhta inyicje ongvitsapoc avalhoc meme coo, tasic najan sictiyam ejápac coo.
12 ¿So actomja yi meme coo, selhnescama ayinlhaclha najan semquescama sictom neme ac?
13 Tasic alhta inyicje ongvitsepoc, yoyam oytic maa congne malhic tacjalhop, mepqui siclingaycamco acyimtalhnama.
14 Yoyam opalhavomoc apquilviscaa apquilmasquingvaycmo nano (copalhavomoc ejangaoc nipyesicsa apquiljangaoc apquilviscaa) apquillanay nic nat pirámides.
15 Yoyam copalhavomoc ejangaoc nipyesicsa apquiljangaoc yatapquilviscaa acma apquilnatam oro najan plata.
16 Tasic alhta ongvatoynalhcac coo, acno sicaa apac (ayitsepma) avalhoc inquin.
17 Mepqui mocjam aptemaclha apanco apmapsom enlhit congne malhic tacjalhop. Enlhit apquilyampay ellovsic sat apquilyampay congne malhic tacjalhop.
18 Apquilyitnama nasa (apquiljangaoc) enlhit apquilmomap, mepqui mocjam apquilapajascama apquilviscaa.
19 Apno poc maa, apquilyimtalhnamo najan mepqui apquilyimtalhnamo, najan poc mepqui apmomap mocjam, aptimesaycam siclho apvisqui pac.
20 Am emyavac Dios etyamoc siclho enlhit, acyiplomo aplingaycamco acyimtalhnama. ¿So actomja yi?
21 Alhto inyicje apquiljalhanma, yoyam ingyitsapoc. Apquitamquic inyicje apquitsepma, malha apquitamsama asoc acmamnave, paj eyca ingyitsepac.
22 Copayjiclhac sat apvalhoc as enlhit, apvita inlhojo malhic tacjalhop.
23 Paj oyasamcoc yavamlha oyacsic, ayinyema Dios apjalhtimquiscama neyava coo.
24 Actovquic coo sictom naysicsa siliclhangveycam, am comascac siliclhangveycam, acyitsomalhca ayinyema yingmin.
25 Aclingamcoc ayay evalhoc, pilapcasquic alhta sicvita, avanjec siclingaycamco acyimtalhnama.
26 Mepqui mataa actamilaycam evalhoc, mepqui siclovquiscama sicyampay. Avanjec mataa actamjaycam evalhoc, najan ayay evalhoc covac acmasom — nic nat aptomjac.
© © Biblia en Enhlet (Lengua Norte) © Paraguayan Bible Society, 1995.
