Ingmeleyjac nincoo ayinyema mongyasquiyam, am ongnoc enlhit lhalhma anco
1 Am sat ancoc ongilyascacmoc Jesús aptomja singvomquiscama tap, ontimjic sat Dios apquitquic. Ningasicjavoc sat ancoc Dios Ingyapam, incaymalhquic ongilasicjojo najan lha ingilyalhinga apquiltomja Dios apquitquic. 2 Ningasicjavoc sat ancoc Dios, ningyiplovcasquic sat ancoc singanamaclha Dios, cotnatsalhquejec sat actemaclha ningasicjayo Dios apquitquic. 3 Ningasicjayo Dios actomja ninyiplovquiscama singanamaclha. Inquilhyevamoc anco ongyiplovcasojo singanamaclha Dios. 4 Nintimec sat ancoc Dios apquitquic, ongilyimnac sat. Am colhoyc sat apquiltemaclha enlhit lhalhma anco. Mongyasquiyam nincoo actomja acyimnatem, am colhno apquiltemaclha enlhit lhalhma anco. 5 ¿Soc enlhit aptomja apyimnatem, am colhno apquiltemaclha enlhit lhalhma anco? Apvamlha enlhit aptomja meyasquiyam Jesús aptomja Dios apquitca.
Singlingascama apvisay Dios Apquitca yoyam colhejec acyascacmo
6 Apvaac nat Jesucristo. Yitnec nat anit asoc monquinatquiscama apvoya: yingmin najan em pac. Jave acvamlha yingmin aclhenomalhca. Inlhenalhquic anit: najan yingmin najan em pac acyinquinomalhca. Espíritu apanco Dios eyca aptomja aplhanma yoyam colhejec acyascacmo. Espíritu apanco Dios apvisay aptomja nasoc anco. 7 Natqui altomja allhanma netin yoyam colhejec acyascacmo: Ingyapam najan Dios appayvam najan Espíritu Santo. Eyca as natqui aptomja malha lhama. 8 Natqui altomja allhanma as nalhpop yoyam colhejec acyascacmo: Espíritu apanco Dios najan yingmin najan em pac. Eyca as natqui actomja acno moc allhanma yoyam colhejec acyascacmo. 9 Am ongilyascacmoc mataa apquillhanma yoyam colhejec acyascacmo ayinyema enlhit. Inpeyvoc anco aplhanma Dios yoyam colhejec acyascacmo, am colhno ayinyema enlhit. Aptomjac nat aplhanma Dios yoyam colhejec acyascacmo apvisay Apquitca. 10 Am sat ancoc ongilyascacmoc Dios Apquitca, coytic sat ingvalhoc. Ningilyascacmec sat ancoc Dios, onganic sat apmopvan amyaa Dios. Ayinyemaclha ningyascacmec aplhanma Dios yoyam colhejec acyascacmo apvisay Apquitca. 11 Eycaso aplhanma Dios yoyam colhejec acyascacmo: Singmescama acyimnatem ingnenyic cotmongvoycamlha nelha ayinyema Apquitca. 12 Ningiltomjac sat ancoc ningyipitcayo Dios Apquitca, cotningvomejec sat nelha acyimnatem ingnenyic. Am sat ancoc ongiltomjac ningyipitcayo Dios Apquitca, colhejec sat ingvalhoc acyimnatem ingnenyic.
Actomjaclha nelha apquillhicmoscama Juan
13 Actalhoscasquic lhac quellhip apquiltomja melyasquiyam apvisay Dios Apquitca. Elyasamcojo: Quellhip acyitna acyimnatem apnenyaoc cotmongvoycamlha nelha.
14 Cotnajamejec sat ingvalhoc napato Dios. Ayinyemaclha apjalhnoc mataa ningilmalhnancama, ningilmalhna inlhojo asoc actemaclha apmayjayoclha Dios. 15 Ningyasamcoc nincoo: Dios aptomja apjalhenmo ningilmalhnancama. Ningyasamcoc najan lha: Ningillhocac alhta mataa asoc malmalhnaycam.
16 Ningvitac sat ancoc ingyalhing naysicsa aptamongvaycmolhma, ongilmalhnesquisic sat Dios yoyam emascocsic. Apsilhnanacpec sat ancoc coyoyam etvasacpoc, comascosalhcac sat aptamongvaycmolhma. Apsilhnanacpec sat ancoc yoyam etvasacpoc, comascosalhquejec sat. Mongilmalhnesquisejec sat Dios yoyam emascocsic aptamongvaycmolhma ingyalhing aptomja apsilhnanomap yoyam etvasacpoc. 17 Aclhamoclhojo nintemaclha almasomcaa acvisay nintamongvaycmolhma. Cotnaja aclhamoclhojo nintamongvaycmolhma acyiplomo acyanmongayclha ningiltovasomalhca.
18 Ningyasamcoc nincoo: Mongvanquejec ongiltamongvomjo olhma ningiltomja Dios apquitquic. Ayinyemaclha Dios Apquitca aptomja sintamilquiscama. Covanquejec somquic quilyicjamo jingilsilhnana.
19 Ningyasamcoc nincoo ningiltomja Dios apquitquic. Yitnec acmovan somquic quilyicjamo actomja avisqui nipyesicsa enlhitaoc lhalhma anco.
20 Ningyasamcoc najan: Apvaac nat Dios Apquitca yoyam jingilyascasingvomoc nincoo. Apquiltamjoc ongilyicpilcangvomoc Dios aptomja nasoc anco. Ningilpasmec mataa aptomja nasoc anco apvisay Jesucristo Dios Apquitca. Eyca as apvisay Dios aptomja nasoc anco najan apvisay apyimnatescama ingnenyaoc cotmongvoycamlha nelha. 21 Quellhip eyitquic, noelpasmiclha nasa somquic quilyicjamo, ayinyemaclha cotnaja Ingyapam nincoo somquic quilyicjamo. Amén.
© © Biblia en Enhlet (Lengua Norte) © Paraguayan Bible Society, 1995.
