Quilaycmasquiscama congne tingma apponquinomap
1 Vocmec nic nat cinco acnim, najan sexto piltin, najan sexto año ningilmomalhca cotnajaclha ningaoclha. Acnec alhta tingma ajac, apquillhalhmaa alhta apquilvanyam mayayo co Judá. Emongvavoc alhta apmic Visqui ingac. 2 Pilapcasquic alhta sicvita malha enlhit, payjoc niplhit acvaycmo apmancoc acyitsomalhca talha. Payjoc niplhit acvaycmo apyitsicsic acyitsomalhca oro alyinmom acyatictama. 3 Pilapcasquic alhta appatjeta eva epatic apvisay espíritu apanco Dios. Intomjac alhta acvitay sicvanmoncama, actemaclha sesovm nitno acvaycmo tingma Jerusalén. Elhnesquic alhta payjoc tingma apatong acyivey, payjoc nilhqueyja. Payjoc maa acyitnamaclha quilaycmasquiscama acyitsomalhca dios, aptanoncama Dios Visqui ingac. 4 Invitac alhta sicvanmoncama gloria mayayoclha Dios Visqui apancaoc israelitas. Acno alhta acvitay siclho sicvanmoncama payjoc amyip acyivey. 5 Aptomjac alhta seyanya: ¡Ingyinmelhojo payjoc nilhqueyja! — alhta aptomjac.
Alanoc coo payjoc nilhqueyja. Pilapcasquic alhta sicvita nicja atong acyivey nicja altar, lhama quilaycmasquiscama acyitsomalhca dios, aptanoncama Dios Visqui ingac.
6 Aptomjac alhta Visqui ingac seyanya: ¿Apvita ya lhquip apquiltemaclha israelitas apquillanay asoc acmasom, naysicsa selyamasma coo najan tingma ajac apponquinomap? Etac sat lhip asoc acmasom anco, am colhno aso — alhta aptomjac.
7 Eyantamaclhec alhta payjoc atong acyivey atrio. Yitnec alhta acyananma mataymong apjalhtam. 8 Aptomjac alhta seyanya: Iyansiclhojo sat lhip malamong apjalhtam — alhta aptomjac.
Acyansaclhec alhta malamong apjalhtam. Pilapcasquic alhta sicvita moc atong. 9 Aptomjac alhta seyanya: Itilh congne, etac sat lhip apquiltemaclha enlhit sictanoncama coo — alhta aptomjac. 10 Actalhnec alhta coo. Pilapcasquic alhta sicvita paredes alcajasomalhca asoc navjac, najan asoc altanovmalhca napato Dios, alvisay quilaycmasquiscama acyitsomalhca dios, apquilayo israelitas. 11 Apcanam payjoc maa setenta apquilvanyam mayayo. Yitnec apquilmaycam asoc acpayjem alvatnamalhquilha asoc acmasis, actiyapma etin as asoc payjem. Lhama alhta apvisay Jaazanías, Safán apquitca.
12 Aptomjac alhta seyanya Visqui ingac: ¿Apvita ya lhquip apquiltemaclha apquilvanyam israelitas payjoc acyitnamaclha quilaycmasquiscama? Apquiltemaclha apquilyilhanmeycam naysicsa apquilayo quilaycmasquiscama. Apquilvajanamquic mataa poc enlhitaoc natingma, apquilanem: Metay mataa Visqui ingac nintemaclha nincoo. Nasoc alhta singyamasma Visqui ingac — intomjac mataa apquilvalhoc. 13 Etac sat lhip mocjam apquiltemaclha apancaoc acmasom, am colhno siclho — alhta aptomjac Visqui ingac.
14 Eyantamaclhec alhta payjoc atong acyivey tingma apponquinomap, nicja nilhqueyja. Innam maa nicja quilvanaa, alyapcalhem ayinyema ayitsepma quilaycmasquiscama Tamuz. 15 Aptomjac alhta seyanya Visqui ingac: ¿Apvita ya lhquip? Etac sat mocjam apquiltemaclha acmasom, am colhno siclho — alhta aptomjac.
16 Eyantamaclhec alhta payjoc atrio congne tingma apponquinomap, payjoc atong aplhancoc apponquinomap, payjoc naysicsa vestíbulo najan altar apquilvatnamaclha. Apnam maa veinticinco enlhit apquilpaycomap, melaneyo congne aplhancoc apponquinomap. Apquiljalhec acpayjoclha actiyapmaclha acnim, acticlhicvocmo nalhpop payjaclha napataa, apquiltomja apquilayo acnim naysicsa actiyapma. 17 Aptomjac alhta seyanya: ¿Apvita ya lhquip? Apquiltemaclha apancaoc enlhit apquilayo quilaycmasquiscama lhalhma anco yoclhilhma Judá. Avanjec sictanoncama sicvita apquiltemaclha apancaoc as congne tingma apponquinomap. 18 Momyovejec sat mocjam sictemaclha siclom. Mongvasicjiclhejec sat mocjam. Jelilmalhnac sat inyicje naysicsa apquilpalhamaycam, mongvaylhoyc sat maa, oyanmongsiclhac sat apquiltemaclha apancaoc — alhta aptomjac Visqui ingac.
© © Biblia en Enhlet (Lengua Norte) © Paraguayan Bible Society, 1995.
