Actamongvamlha nelha apquileyvam
1 Aptomjac alhta Visqui ingac seyanya coo: 2 Ingyeylhojo sat lhip sicpayvam siltimnascama israelitas lhalhma anco apquileyvomaclha: Intamongvocmec nelha apquileyvam enlhit as yoclhilhma. 3 Vamlha intomjac apquileyvam quellhip israelitas. Elvitac sat quellhip siclom coo, actemaclha sicyanmongsayclha apquiltemaclha apancaoc quellhip. 4 Mongvasicjiclhejec sat mocjam quellhip. Oyanmongsiclhac sat apquiltemaclha quellhip apquilmapsomcaa, apquilayo quilaycmasquiscama. Jelyicpilcojoc sat sicvisay Dios Visqui apancaoc — alhta aptomjac.
5-6 Aptomjac alhta Visqui ingac: Intamongvocmec nelha apquileyvam enlhit, ellingamcojoc sat acyimtalhnama, coyangvomoc sat maa, comascoc sat apquileyvam quellhip. 7 Enatovasacpoc sat apyovoclhojo enlhit apquileyvam as yoclhilhma. Comascoc sat apquilitsovascama enlhit netin inquilhe. 8 Elvitac sat quellhip acyivey siclom quilhvo nac jay, sictemaclha sicyanmongsayclha apquiltemaclha apancaoc quellhip. 9 Mongvasicjiclhejec sat mocjam quellhip. Oyanmongsiclhac sat apquiltemaclha apancaoc quellhip. Jelyicpilcojoc sat quellhip, sicvisay Dios Visqui apancaoc, ayinyemayaclha acyanmongayclha — alhta aptomjac.
10 ¡Quilhvoc acvaa acnim! ¡Quilhvo nac jay! ¡Macnatovascama aclhamoclhojo asoc! Apquiltemaclha apancaoc enlhit apquilyimtalhnesomacpo apanco najan apquilmapsomcaa. 11 Inyangvocmec mataa apquiltemaclha apquilmapsomcaa. Comalhquejec sat maa, meltomja apquilyimnatem, acyitna inlhojo apquilnatam najan apquilpayvam apquilpalhamaycam. Mepqui apquilmopvan maa. 12 ¡Quilhvoc acvaa acnim! Copvanquejec ingyitsovacsojo enlhit apyamasma asoc apvitay acyanmongam. Copvanquejec enlhit apyamasma asoc coyovsic apvalhoc. Avanjec sat cotnejic siclom naysicsa sicyanmongsayclha apquiltemaclha apancaoc enlhit israelitas. 13 Enlhit apyamasma asoc, meteclhejec sat mocjam as asoc, acvocmo inlhojo año apmasmaclha Dios. Melmiyovacpejec sat mataa enlhit apquilmapsomcaa.
14 Colngalhcac sat apquilpayvascama trompeta, yoyam elimpocjac cotnaja ingmoc. Yitne inyicje apquilmaycam, paj eyca elpasmac apquilimpocjay. Oyanmongsiclhac sat apquiltemaclha apancaoc apquilyimtalhnesomacpo israelitas. 15 Tap tingma apvanyam elnapacpoc sat. Apvalhoc tingma elvitac sat ningmasquem ataoc najan mayic ataoc. Eticyoc sat apnaycam amyip, elitsapoc sat apnaycam apvalhoc tingma, ayinyema mayic ataoc najan ningmasquem ataoc. 16 Elinyajamcoc sat napocja netin inquilhe alvinatem, colhojoc sat apquiltemaclha apquilay valhaay. Ellingamcojoc sat acyimtalhnama, ayinyema apquilsilhnanomap apanco napato Dios. 17 Inmasquec alyimnatem apectengaoc najan aptapnaoc, ayinyema apquilay. 18 Eltingyac sat apquilantalhnama acmayovsa apquilvalhoc. Elpilhyinamam sat maa, elmancangvomoc maa, elsavojoc sat apquilyatemenma apva apyitsicsaoc. 19 Cotlhalhcac sat oro najan plata malha asoc ápac, comovan colvomsic tap enlhit naysicsa apyanmongsayclha Dios apquiltemaclha apancaoc. Colapvanquejec eltovamcoc naysicsa mayic ataoc, ayinyema oro actomja siclho acsilhnanoncama enlhit yoyam elsilhnanacpoc. 20 Insilhnanalhquic apquilvalhoc ayinyema asoc acmamnave, yoyam ellanac quilaycmasquiscama almasomcaa sictanoncama coo. Cotniclhac sat asoc ápac acyovoclhojo asoc acmamnave. 21 Ongvapajacsic sat metnaja israelitas elminyilhic sat asoc acmamnave, elnatamacpoc sat ayinyema enlhit cotnaja ingmoc, conatovasalhcac sat quilaycmasquiscama apancaoc. 22 Oyinyoc sat coo as enlhit. Colhic actovasa tingma ajac apponquinomap, malha asoc acmamnave ajanco, ayinyema apnatovascama enlhit apquilmapsomcaa.
23 Aptomjac alhta mocjam: Itingya sat cadena. Aplhamoc ticyovam yapmayc elnapoc sat enlhit. 24 Ongvapajacsic sat enlhit apquilmapsomcaa, enatovacsic sat tingma apancaoc. Comascoc sat apquiltimem apquilyimtalhnamo. Conatovasalhcac sat apancaoc alponquinomalhca, apquiltomja apquilayo. 25 Elangvomoc sat enlhit maa, apquiltingyac mataa yoyam elvomsacpoc tap, paj maa apquilvomquiscama tap. 26 Lhama apquillingaycamco acyimtalhnama acyipitcayclha moc, najan lhama amyaa acmasom acyipitcayclha moc. Apquiltingyac inyicje Dios appayvam ayinyema profeta, paj ellingac. Paj maa sacerdote, yoyam eyascasingvomoc, paj lhama apvanyam mayayo, yoyam eltimnacsic yavamlha eltimjic. 27 Eliclhangvoc sat apvisqui rey, colhic sat acmayovsa apvalhoc yatapvisqui, elpilhyinamoc sat enlhitaoc. Oyanmongsiclhac sat apquiltemaclha apancaoc, olhnasojoc sat apquiltemaclha apquilyicpilquemo poc, yoyam eticyoc. Jelyicpilcangvomoc sat coo, sicvisay Dios Visqui apancaoc — alhta aptomjac.
© © Biblia en Enhlet (Lengua Norte) © Paraguayan Bible Society, 1995.
