Actamila appayvam Pedro apquiltimnascama Jesucristo apmolhama
1 Yitnec coo sicpayvam actamila yoyam oltimnacsic apquilimja apmamyi Jesucristo apmolhama. Ayinyemaclha coo najan sictimem siyimja emamyi. Sictomja najan sicvitaycamco aplingaycamco acmasca Cristo. Olhojoc sat lhama ayitsayoclhilhma Cristo apvactamo sat, sicno apquilimja apmamyi. 2 Eltamilquis sat quellhip Jesucristo apmolhama, malha quilancam nipquesic apquiltamilquiscama apnatoscama. Nocollhen nasa apquilvalhoc apquiltomja apquilanyomap yoyam eltamilsic. Eyca colcojo sat mataa apquilvalhoc yoyam eltamilsic naysicsa coyimtalhnamo ingvalhoc actemaclha apyisponcama Dios. Nocollhen nasa apquilvalhoc acyanmongam apquiltamjaycam yoyam ellhovac. Eltamilquis sat Jesucristo apmolhama acyiplomo apquilasicjayo najan acpayjayclha apquilvalhoc. 3 Noeltime nasa malha apquilviscaa apquiltomja apquilapajascama mataa. Elvitasquis sat apquiltemaclha quellhip yoyam elvajanamcoc Jesucristo apmolhama. 4 Apvoctac sat ancoc apquimja apmamyi apyimtalhnamo, ellhovamcoc sat quellhip acyiviy acyanmongam, am colhno catquin ava yoyam copalamoc.
5 Actomjac coo silanya quellhip quilyimnanic: Elilyejiclhojo sat mataa ingilyipmaa apquilvanyam. Actomjac coo silanya quellhip elyalhinga: Noelyimtalhnesacpojo apanco nipyesicsa. Elpasim sat mataa poc, malha apquilancam. Eycaso actomja actalhesomalhca:
Apquilyasquic mataa olhma Dios yoyam eyimtalhnesacpojo apanco enlhit.
Dios eyca epasmoc sat mataa enlhit aptomja meyimtalhnesomap apanco
—nic nat intomjac vaycajac.
6 Elangvoclha sat quellhip napato Dios apyimtalhnamo yoyam epasmoc sat acvocmo sat acnim. 7 Nocollhen nasa apquilvalhoc asoc yoyam cotnejic, ayinyemaclha Dios apquiltamjoc mataa elmeyvoc quellhip.
8 Eltamilsojo apquilvalhoc quellhip. Elantiyapmojo sat mataa. Ayinyemaclha innec cotnaja ingmoc acvisay diablo yavey. Actomja malha asoc navjac aclom. Intingyam mataa yoyam cajic. 9 Elyimnates quellhip actemaclha melyasquiyam malha apquilmaycam yoyam melacyejec sat quellhip. Apquilyasamcoc quellhip actemaclha apquillingaycamco acmasca ingilyalhinga apnaycam lhalhma anco, acno quellhip. 10 Apquillingamcoc sat ancoc acmasca quellhip acyavataclhojo. Dios sat elpenacsojo quellhip najan elyimnaticsojoc sat quellhip najan epasmoc yoyam elinlhanmojoc quellhip. Ayinyemaclha Dios aptomja singmescama cotlaycaoc singaycaoc. Apquiltamjoc yoyam ongnam sat lhama Jesucristo aptomja apyimtalhnamo cotmongvoycamlha nelha. 11 Yitnec apmopvan Dios najan apyimtalhnamo cotmongvoycamlha nelha. Amén.
Actomjaclha nelha appayvam Pedro.
12 Ingyalhing Silvano aptalhescama as vaycajac actemaclha coo sicpayvam. Ingyalhing appeyvomo aptomja Silvano. Ayapajascasquic quellhip actalhesomalhca acyavatem. Altamjoc ongvapajasquisic quellhip aso sicpayvam actamila yoyam elyasamcojo actomja nasoc anco Dios apcaycaoc apquillhoy quellhip. 13 Inquillhenquic apquilvalhoc quellhip Jesucristo apmolhama tingma Babilonia. Apquiltomja Dios apquilyacyescama, apquilno quellhip. Inlhenquic najan apvalhoc ingyalhing Marcos, aptomja malha sictamongvoyam. 14 Elpayvesap sat acyiplomo acpayjayclha apquilvalhoc ayinyema ningilasicjamalhco ningyesicsa.
Eltamilsojo apquilvalhoc quellhip apquiltomja apquilpasmeyquiclha Jesucristo. Amén.
© © Biblia en Enhlet (Lengua Norte) © Paraguayan Bible Society, 1995.
