Apvitay aptava Sansón
1 Apmiyaclhec nic nat Sansón tingma apvisay Timnat. Apvitac nic nat quilvana ayitcoc acmolhama co Filistea. 2 Aptajaclhec nic nat mocjam. Apquiltimnasquic nic nat apyap najan inquin actemaclha apvitay.
Aptomjac nic nat apcanya: —Jetingyasquis sat quilvana ayitcoc, sicvita alhta tingma Timnat. Quilvana ayitcoc acmolhama co Filistea. Otnejic sat etava coo — nic nat aptomjac Sansón.
3 Apcatingmavoc nic nat apyap najan inquin: —¿So actomja yi aptingyey lhip quilvana cotnaja nintemolhama filisteos, etnejic aptava? ¿Paj ya quilvana ayitcoc nipyesicsa ingnaymacoc, najan nipyesicsa nintemolhama israelitas? — nic nat aptomjac apyap.
Apcatingmavoc nic nat Sansón: —Inlicavoc evalhoc as quilvana ayitcoc. Jetingyasquis sat lhip, otnejic etava coo — nic nat aptomjac.
4 Am nic nat eyasamcoc apyap, am nic nat coyasamcoc inquin aptomjaclha Dios. Apquiltamjoc nic nat Dios eyanmongsiclha apquiltemaclha apancaoc filisteos. Malha apquilmomap nic nat israelitas nipyesicsa filisteos. 5 Apmiyaclhec nic nat tingma Timnat Sansón. Aplhalhma ilhnic nat apyap najan inquin. Apvoclhec nic nat ayimjaclha uva avjac tingma apvanyam. Apyitnocjac nic nat amay Sansón. Pilapcasquic nic nat apvita napato acyanca yamacmeyva ayitcoc. Impayvec nic nat siclho, yoyam cajic Sansón. 6 Apyimnatasquic nic nat espíritu apanco Dios. Apmeyjec nic nat Sansón, ingyajic yamacmeyva mepqui apquilmaycam. Malha nintipilquem yataay apquitcoc nic nat intomjac acmatnam yamacmeyva. Am nic nat eltimnasac amyaa apnaclha apyap. 7 Aplhinquic nic nat mocjam. Apvitac nic nat quilvana ayitcoc, apponcanma ilhnic nat siclho.
8 Nalhit acnim nic nat intomjac. Inlhenquic nic nat apvalhoc Sansón colyimjapoc quilvana ayitcoc. Aplhinquic nic nat. Apyitnocjac nic nat amay, elanojo mocjam yamacmeyva ápac. Apvitac nic nat yamyovjene avalhoc yamacmeyva ápac. 9 Apliquic nic nat yamyovjene. Aptovquic nic nat naysicsa aplhingam. Aptajanyeclhec nic nat apyap najan inquin. Apcamquic nic nat yamyovjene, yoyam coltovamcoc. Am nic nat elhenac ayinyemayaclha yamyovjene.
10 Apmiyaclhec nic nat apyap acnaclha quilvana ayitcoc. Apquillanac nic nat fiesta Sansón, apcansaclho quilyimnanic najan quilvana ayitcoc. 11 Apquilacac nic nat filisteos. Apnalantac nic nat treinta apnaymacoc elpasmoc fiesta.
12 Aptomjac nic nat Sansón apquilanya: —Pac oltimnacsic quellhip asoc acyilhamalhca. Apyasamcoc sat ancoc lhama nipyesicsa quellhip, jeltimnas sat covocmo inlhojo siete acnim. Omquesic sat apava moclhama quellhip, lhama nintalhnama netin najan poc apava aptamila apanco. 13 Am sat ancoc elyasamcoc quellhip, jelmesic sat apava coo. Lhama mataa nintalhnama netin najan lha poc apava aptamila apanco — nic nat aptomjac Sansón.
Apquilatingmavoc nic nat: —Jingiltimnas appayvam acyilhamalhca. Pac ongilaylhojo — nic nat apquiltomjac.
14 Apquiltimnasquic nic nat appayvam Sansón:
Asoc navjac ayinyema alhta nintom.
Asoc navjac acyimnatem ayinyema alhta acmasis ontoc — nic nat aptomjac.
Inquilquitamquic nic nat apquilvalhoc, - paj. Am nic nat elyasamcoc acvaycmo natqui acnim.
15 Invocmec nic nat cuatro acnim. Apquiltomjac nic nat apquilanya Sansón aptava: —Lhiya, coyasamcojo sat Sansón appayvam. Jingiltimnas, yoyam ongilyasamcojo nincoo lha. Am sat ancoc jingiltimnacsic lhiya, comatong sat lhiya, comyetic sat talha. Elmetic sat apquilmolhama inyap lhiya. Nasoc lhaja ningilanyomalhca ongiltasomoc fiesta, yoyam jingilnatamoc sat asoc inganco, ayinyema lhiya najan atava — nic nat apquiltomjac.
16 Inmiyaclhec nic nat quilvana ayitcoc apnaclha Sansón. Intomjac nic nat naysicsa acvinama: —Lhip aptemaclha mepqui seyasicjayo. Naso nac setanoncama lhip. Apquillingac alhta enaymacoc lhip appayvam. Paj oyasamcoc coo. Jeltimnas sat lhip mepqui apyilhasquiscama — nic nat intomjac.
Apcatingmavoc nic nat Sansón: —Paj oltimnasac mocjam tata coo najan meme. Moltimnacsejec sat lhiya acvisay acyilhamalhca — nic nat aptomjac Sansón.
17 Inquilinlhanacmec nic nat quilvana naysicsa acvinama apnaclha atava, acvaycmo siete acnim apquiltimem fiesta. Natamin nic nat aclinga quilvana acvisay aplhanma atava. Inquiltimnasquiclhec nic nat anaymacoc: 18 Invocmec nic nat siete acnim. Actalhnam nic nat apquiltomja apquilanya Sansón:
Sij anco yamyovjene, am colhno moc asoc.
Acyimnatem anco yamacmeyva, am colhno moc asoc navjac — nic nat apquiltomjac.
Apcatingmavoc nic nat Sansón:
Ayinyema alhta sictoscama vayqui altimnascama quellhip acvisay acyilhamalhca — nic nat aptomjac.
19 Apyimnatasquic nic nat espíritu apanco Dios, coytic apmopvan Sansón. Apmiyaclhec nic nat Sansón tingma Ascalón. Apquilnapquic nic nat treinta enlhitaoc filisteos. Apquiljalhyovasquic nic nat apquilantalhnama, esantimquisic enlhitaoc apquilyascamco acvisay acyilhamalhca. Aplovquic nic nat Sansón. Aptajaclhec nic nat elhic apyap tingma pac. 20 Inmaclhec nic nat poc atava, lhama nipyesicsa treinta apnaymacoc Sansón.
© © Biblia en Enhlet (Lengua Norte) © Paraguayan Bible Society, 1995.
