Quilvana:
1 Sicvisay ilhnamoc ayimja amyip acvisay Sarón, sicvisay ilhnamoc rosa ayimja payjoc alvata.
Enlhit:
2 Sicponcanma acyitsomalhca ilhnamoc rosa naysicsa yammeyac, acna sicponcanma naysicsa anaymacoc.
Quilvana:
3 Sicponcanma apyitsomacpo yamit acma acyilhna ayimja nalhma, apna sicponcanma nipyesicsa apnaymacoc.
¡Sas anco pisquisca, yoyam olhic apnaclha! ¡Sij anco acyilhna ayinyema sicponcanma!
4 Eyantamiclhac alhta congne alhancoc nintoycaoclhilha. Avanjec seyasicjayo sicponcanma naysicsa selaneyo coo.
5 Jelmesaoc sat tortas uva acyilhna, najan acyilhna manzanas, colhic sat mocjam sicyimnatem. Avanjec acliclamo evalhoc, malha yoyam ongvitsapoc.
6 Altamjo inyicje emamcoc lhama apmic coning epatic, jepatjetamcoc moc apmic.
Enlhit:
7 Quellhiya enaymacoc co Jerusalén, pac olhenic asoc navjac popyit najan yatepopyit, colhejec acyascacmo. ¡Noncollhaticjas nasa sicvanmoncama acliclamo avalhoc! ¡Cotyinic sat mocjam, colhaticjac sat anco, mepqui ninlhaticjascama!
Segundo canto ningminaycmascama
Quilvana:
8 ¡Apquilhyacme nac sicponcanma! ¡Aclingac coo appayvam! Aptomja apnilhtingaycam ayitsicsaoc inquilhe, apnilhtingayquinta netin inquilhe.
9 Apyitsomacpo sicponcanma popyit najan popyit apquitcoc. Apvoctac lhac tap tingma apatong, apquilaneyo atong ayitcoc, apquilaneyo reja atong ayitcoc.
10 Aptomjac sicponcanma seyanya coo: ¡Lhiya sicponcanma siyasicjayo, colhaticja! ¡Noc ongillhong!
11 ¡Colanojo lhiya! Inmasquec acmatsamangi najan acmamayaclha.
12 Invitalhquic lhalhma anco ilhnamoc. Inquilpayvec nata ayitcoc lhalhma anco najan sapop appayvam. Incaymalhquic nincoo lha ongilminaycmacsic.
13 Inyilhnec higo acyilhna netin yamit. Atsic anco acpaniyam uva ilhnamoc.
¡Lhiya sicponcanma, colhaticja! ¡Noc ongillhong!
14 Lhiya acyitsomalhca valhaay apyilhanmeycam mataymong alvinatem, avalhoc mataymong. ¡Jeyane sat olanojo naat lhiya, ongvaylhojo acpayvam lhiya! ¡Sas anco silaneyo lhiya! ¡Sas anco sicjalhenmo acpayvam lhiya!
Anaymacoc (quilvana najan enlhit):
15 Elpatjit sat maling najan maling ayitcavoc, acnatovasa inlhojo uva avjac, acnatovascama uva ilhnamoc.
Quilvana:
16 Coo ajanco sicponcanma, seponcanma alhta coo, sictomja sicponquinomalhca. Aptamilcasquic mataa apnatoscama ayimjaclha ilhnamoc rosas.
17 ¡Jeyota sat lhip sicponcanma, ayitsaca inlhojo acvoncapaycaoc pisquisca! Ilhnasojo aplhingam popyit najan popyit apquitcoc, payjoc ayitsicsaoc inquilhe.
© © Biblia en Enhlet (Lengua Norte) © Paraguayan Bible Society, 1995.
