1 Aptomjac alhta mocjam Visqui ingac: Coytic sat tingma Jerusalén actiyapmaclha yingmin, actomja ayalhnascama meyascalhma najan apquilsilhnanomap apanco David aptovana niptamin najan apnaycam tingma Jerusalén. 2 Omascoscomoc sat lhalhma anco acvisay quilaycmasquiscama, colhejec sat ayaco mataa. Omascoscomoc sat profetas apancaoc najan apquiltemaclha apancaoc acmasom. Naso coo sicpayvam sicvisay Visqui sicyimtalhnamo.
3 Aplingasquic sat ancoc amyaa enlhit malha profeta, (elnovsic sat) enovsacpoc sat ayinyema apyap najan inquin: ¡Ematong sat lhip ayinyema apmopvan amyaa aplingascama lhip, cotnaja Dios appayvam! — sat eltimjic. Eyiplhacpoc sat sovo apmaycam apyap najan inquin, ayinyema aptimesomap apanco profeta. 4 Elmancangvomoc sat as acnim profetas apanco, ellingacsic amyaa acvitay apquilvanmoncama. Copvanquejec sat profeta apmopvan amyaa etalhniclha apquilantalhnama yataay apva, yoyam elngacsic amyaa. 5 Ingyatingmojoc sat profeta: Jave coo profeta, chacarero coo. Sictemaclha eyitcoc mataa sictamjaycam amyip — sat etnejic. 6 Elmalhnacpoc sat mocjam: ¿So actema ningvita apquilyimsem apyimpejic lhip? — sat eltimjic. Ingyatingmojoc sat: Ayinyema selyimsascama enaymacoc — sat etnejic — nic nat aptomjac profeta.
Visqui ingac Dios
7 Eycaso appayvam ayinyema alhta Visqui ingac:
¡Sovo acvinatem cajic sat apquilancam nipquesic najan aplhalhma! ¡Ematong sat apquilancam, ingyilhpanic sat apnatoscama! ¡Olinmelham sat nipquesic apquitcavoc!
8-9 Inquitlhincasquic esovjacpoc apticyovam enlhitaoc, elaymacpoc sat napocja, malha tercera parte. Ongvapajacsic sat elmilanic talha as apquilaymomap. Ongvalhnasiclhac sat apquilvalhoc, acno ningalhnascama plata naysicsa talha najan actemaclha oro alyinmom. Jelilmalhnac sat yoyam opasmoc, coo eyca opasingvoclhac sat. Eltamjacpoc sat: Sicmolhama enlhit. Jeltimjic sat: Dios Visqui ingac — sat eltimjic. Naso coo sicpayvam sicvisay Visqui sicyimtalhnamo — alhta aptomjac.
© © Biblia en Enhlet (Lengua Norte) © Paraguayan Bible Society, 1995.
