Apquiltajayclha apquilmomap nano
1 Elilmalhna sat yingmin acmamay, yoyam ingyapajacsic Visqui ingac. Memyovejec sat yingmin acvanyam, aptomja apquilantipquiscama alyinmayam. Aptomja apquictinquiscama ninganma.
2 Acmovan amyaa actemaclha quilaycmasquiscama acyitsomalhca dios. Acmovan amyaa ayinyema quiljangaoc inyap (apquilyascamco ingjangaoc). Alhtoc mataa apquillingascama apquilmopvancaa amyaa, alhtoc mataa apquiltamilquisquiyam apquilvalhoc apnaymacoc. Apquilhpanec alhta, malha nipquesic apquilhpansomap mepqui aptamilquiscama — nic nat aptomjac profeta.
3 Eycaso appayvam Visqui apyimtalhnamo:
Avanjec coo siclom sicvita apquiltamilquiscama. Oyanmongsiclhac sat apquiltemaclha apancaoc mayayo apquilimja apmamyi enlhitaoc — alhta aptomjac. Apvisqui apyimtalhnamo aptomja aptamilquiscama apnatoscama, apquilvisay apquilmolhama Judá. Etnesquisic sat co Judá eltimjic apquinamtem, yoyam ingyimpocjac cotnaja ingmoc.
4 Ingyinyemac sat maa apvisay Mataymong Actajescamaclha. Najan apvisay Yamit Estaca ningyipitquiscama carpa, najan apvisay Yanca Ningilmaycam. Elinyemac sat maa apquilviscaa.
5 Ellhojoc sat singilpilhtetemo apquiltoyam yelpa naysicsa apquilimpocjay. Elnapacpoc sat maa, aplhalhma mataa Visqui apyimtalhnamo. Elmancangvomoc sat nolhing apcapaoc cotnaja ingmoc — alhta aptomjac.
6 Aptomjac alhta Visqui apyimtalhnamo:
Otnesquisic sat apquilyimnatem co Judá, olvomsic sat tap apquilmolhama José. Otajicsojoc sat mocjam, eltajiclhac apquilaoclha, ayinyema siyasicjayo maa. Cotnejic sat malha metnaja apquilhpansomap nano. Coo sicvisay Dios Visqui apancaoc sicjalhenmo apquililmalhnancama.
7 Malha singilpilhtetemo eltimjic sat co Efraín. Copayjiclhac sat apquilvalhoc, malha ayinyema uva ayingmenic apyinaycaoc. Elitsovacsojoc sat apquitquic apquilvita apyapmayc. Eltimjic sat selayo naysicsa apquilitsovascama — alhta aptomjac.
8 Aptomjac alhta mocjam:
Ongvansiclhac sat as enlhitaoc, ayinyema sicvomquiscama tap alhta. Elhamiclhac sat mocjam, eltimjic appintalhnama, acno siclhoc nat.
9 Coo alhta ayinyema siyilhpanquiscama nipyesicsa enlhitaoc lhalhma anco. Colvoncamejec sat mataa apnaycam mocjay coo sicvisay. Eltajiclhac sat nalhit acnim, najan maa apquitquic.
10 Onalovsingvoclhac sat yoclhilhma Egipto najan yoclhilhma Asiria. Onaliclhac sat elhnam payjoc Galaad najan payjoc Líbano. Melhnamejec sat apyovoclhojo, am colhno amyipayc maa.
11 Elmilanic sat yingmin acvanyam Egipto, omascoscomoc sat yingmin alyayajayam. Oyamacsic sat vatsam Nilo, mepqui yingmin sat cotnejic. Omascoscomoc sat apquilyimtalhnesomap co Asiria, omascoscomoc sat apquilmopvan co Egipto.
12 Coo sat oyimnatesquisic enlhitaoc, eltimjic sat selayo. Naso coo sicpayvam sicvisay Visqui sicyimtalhnamo — alhta aptomjac — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
