Actemaclha singillhicmoscama actamila
1 Iltimnas sat mataa lhip. Ilngas sat mataa amyaa. Ilhnasojo sat mataa lhip appayvam actemaclha singillhicmoscama actamila. 2 Ilane sat metnaja apquitcoc eltimjic mepqui acyeyjamelhma. Ilane sat colhic alaco najan eltimjic apquilyascamco. Ilane sat coytic melyasquiyam actamila najan apquilasicjayo najan actemaclha apquilinlhanyam. 3 Ilane sat najan quilvanaa cotnaja ayitcoc coltamilsalhcojo anco actemaclha ningayo Dios. Noelane nasa coltimjic allhamasomalhca. Najan mepqui acyinaycaoc anmin. Incaymalhquic coltimjic allhicmoscama asoc altamila. 4 Incaymalhquic collhicmocsic innaymacoc quilvanaa yoyam colasicjojo anatamcaa najan ayitquic. 5 Incaymalhquic coltimjic alyascamco anco najan actemaclha actamilaycam avalhoc. Incaymalhquic yoyam coltamjam mataa tingma ac. Incaymalhquic yoyam coltamilsalhcojo anco yoyam najan colilyejiclhojo anatamcaa. Yoyam cotanovalhquejec mataa Dios appayvam.
6 Ilane sat apquilyimnanic yoyam eltamilsacpojo apanco mataa. 7 Lhip Tito, ilhicmosacpojo apanco actemaclha ningyiplovquiscama actamila. Illhicmos sat nipyesicsa quilyimnanic tasic amyaa actemaclha actomja nasoc anco. 8 Illhicmos sat amyaa acpeyvomo yoyam colhejec acyascacmo apquillhicmoscama actamila, yoyam najan cotanovalhqueje. Elmancangvomoc sat apquiltomja apquilinmelhaycam. Colapvanquejec sat elantipsam ningilvisay.
9 Ilane sat apquilancam yoyam elilyejiclhojo apquilviscaa apancaoc mepqui apquilatingmoctamo. Elyispac sat mataa apquilviscaa. 10 Incaymalhquic apquilancam eltimjic mepqui apquilminyilhma. Sat eltimjic apquilpeyvomo apanco. Elyispac sat poc enlhitaoc elvita apquiltemaclha apquilancam. Colhic sat ayaco singillhicmoscama ayinyema Dios aptomja singvomquiscama tap.
11 Ingillhicmosquic Dios aptemaclha singasicjayo yoyam elvomsacpoc tap aplhamoclhojo enlhitaoc lhalhma anco. Eycaso actomja ayimja amamyi yoyam ongilyiplovcasojo. 12 Dios aptemaclha apcasicjayo aptomja singillhicmoscama yoyam ongitlhaoc nintemaclha acmasom najan actemaclha ayitsepma ingnenyic. Apquiltamjoc yoyam ongileyo as nalhpop actemaclha ningyascamco najan actemaclha ningilpeyvomo najan actemaclha yoyam ongilavojo Dios. 13 Apquiltamjoc yoyam ongilaylhic acnim yoyam ongvita Dios apyimtalhnamo najan Visqui ingac Jesucristo aptomja singvomquiscama tap. 14 Apyinyovsomacpo apanco yoyam ematong singyanmongam nincoo. Yoyam jingilvomsic tap naysicsa asoc almasomcaa. Yoyam ongiltimjic ningilalhnayo mepqui ningmasom. Yoyam ongiltimjic apquitquic yoyam ongilyiplovcasojoc actemaclha actamila.
15 Illhicmos sat lhip mataa as amyaa. Iltimnasiclhojo sat mataa najan ilyascasingvom, malha actemaclha ningyimtalhnamo. Nongyane nasa evinacpoc lhip nipyesicsa apnaymacoc.
© © Biblia en Enhlet (Lengua Norte) © Paraguayan Bible Society, 1995.
