Enlhit:
1 Lhiya eyalhing, lhiya sicponcanma. Acvoctac coo ayimjaclha ninganma. Acliquic coo yamit mirra najan asoc acmasis. Actovquic coo pa'pac yamyovjene. Acyinquic coo uva ayingmenic najan leche.
Coro:
¡Quellhip enaymacoc, eltovaoc sat quellhip, elyinaoc sat apquiltamjoclha elyinamcoc!
Cuarto canto ningminaycmascama
Quilvana:
2 Actinquic alhta inyicje, paj cotenac evalhoc coo. Aclingac coo seyevoycam sicponcanma, payjoc tingma apatong. ¡Lhiya eyalhing, lhiya sicponcanma, colic atong! Lhiya valhaay apquitcoc, inyesoc epatic coo ayinyema yalya alhtaa — alhta aptomjac seyanya.
3 ¡Aljalhyovasquic coo silantalhnama, incaymalhquic otalhniclha mocjam! ¡Acpenasquic coo sicyapascama yingmin emancoc, colpaysomoc sat mocjam!
4 Apvoctac sicponcanma, aptalhnesa apmic atong ayitcoc, elcoc sat atong acyivey. ¡Pilapcasquic alhta, intamjam evalhoc coo!
5-6 Aclhaticjac coo, yoyam olicsic atong sicponcanma. Insipquinquic asoc acmasis mirra sicmaycam emic, impalacmec netin apmic sicponcanma. ¡Aclingac coo appayvam, intiyacmec evalhoc coo, malha yoyam ongvitsapoc!
Acliquic alhta inyicje atong, paj, apvonquipqui. Ayevam alhta, paj alhta jeyatingmavoc. Ayitamquic alhta inyicje, paj coo oticlhac sicponcanma.
7 Acvitac coo guardia apquiltamilquiscama tingma, selmam alhta natingma. ¡Elyicpilhquitquic alhta, elyimsasquic alhta, elnatamquic alhta siyalomalhca, apquilvisay apquiltamilquiscama tingma apvanyam!
8 Quellhiya enaymacoc co Jerusalén. Inquilvitac sat ancoc quellhiya sicponcanma, coliltimnas sat sictemaclha coo alipvoyam evalhoc, malha yoyam ongvitsapoc.
Coro: (quilvanaa)
9 Lhiya ingmoc actamila anco, am colhno moc quilvanaa altamila: ¿Soc enlhit qui atamsama lhiya? ¿Soc enlhit qui, am elhno poc, yoyam ongiltimnacsic aclhanma lhiya?
Quilvana:
10 Yamacpasyam apva sicponcanma, moc actemaclha rubio. Apvamlha pac lhama nipyesicsa mil apnaymacoc.
11 Apcatic acyitsomalhca oro alyinmom, apva acyitsomalhca mama apva acpasyam.
12 Apataoc alyitsomalhca apcanit valhaay, apquilyapascama acyitnamaclha yingmin, malha congne leche apquilyapascama valhaay.
13 Apmalhimpancoc alyitsomalhca ayimjaclha ilhnamoc. Apatong acyitsomalhca ilhnamoc rosas, acyiplomo asoc acmasis mirra.
14 Apmeoc alyitsomalhca alnatanma oro, alyipitsomalhca mataymong acmamnave. Apyovoclhojo acyitsomalhca marfil, najan mataymong acmamnave zafiros.
15 Apilhquipcoc alyitsomalhca poste alimja mármol, avjac eyca oro. Apyitsomacpo apyovoclhojo, malha yamit cedro netin inquilhe Líbano.
16 ¡Sij anco apvalhoc apatong! ¡Aptamila apanco sicponcanma, am elhno poc!
Quellhiya enaymacoc co Jerusalén. Siclhanma lhac aptemaclha najan apyovoclhojo apanco sicponcanma.
© © Biblia en Enhlet (Lengua Norte) © Paraguayan Bible Society, 1995.
