Apquilminaycmascama ciento cuarenta ya cuatro mil enlhitaoc
1 Acvitac alhta mocjam. Apyancac alhta Nipquesic Apquitcoc netin inquilhe acvinatem acvisay Sión. Apnam alhta enlhitaoc nipyava, malha ciento cuarenta y cuatro mil enlhitaoc. Yitnec alhta alcajasomalhca payjaclha napataa as enlhitaoc. Apvisay apanco Apquilyap najan apvisay apanco Nipquesic Apquitcoc alhta intomjac alcajasomalhca. 2 Yejemoc alhta siclinga netin acpayvam acyiviy, malha piyam apquilhtingyovam najan ayilhtingyovayam acyiviy. Aclingac alhta malha apquilpayvascama yatalhpong apyiviy. 3 Apquilminaycmasquic alhta ningminaycmascama alhnancoc acyitnaclha Visqui aptajanem najan alyancaclha cuatro asoc najan apnamcaclha apquilimja apmamyi. Paj lhama enlhit apyasamco actemaclha aclhanma as ningminaycmascama. Apquilyasamcoc apquilvamlha ciento cuarenta y cuatro mil enlhitaoc apquiltomja apquilvomsomap tap. Apquileyvam alhta nipyesicsa enlhitaoc lhalhma anco as nalhpop. 4 Am alhta elanoc quilvana as enlhitaoc, paj najan apquilyipitcaycam quilvana. Malha mepqui apnatamcaa as enlhitaoc. Apquilyiplaclhec mataa apyasaclha Nipquesic Apquitcoc. Apyinyovquic alhta acyanmongam Dios yoyam elvomsacpoc tap as enlhitaoc. Malha asoc amamyi macmescama Dios najan macmescama Nipquesic Apquitcoc alhta as enlhitaoc. 5 Am alhta colngalhcac mataa apquilmopvan amyaa as enlhitaoc. Am alhta elsilhnanacpoc napato Dios.
Actemaclha amyaa apquillingascama apnatqui ángeles
6 Acvitac alhta poc ángel apquimpay netin tecjelhit coo. Apsoycam alhta tasic amyaa comasquingvoyam, yoyam elngacsic nipyesicsa enlhitaoc lhalhma anco as nalhpop, nipyesicsa aplhamoclhojo apquilmolhama najan nipyesicsa cotnaja ninpayvamo lhama najan apnaycam aclhamoclhojo apquilaoclha. 7 Apyimnatesquic alhta appayvam ángel, aptomjac alhta:
—Elavojo sat Dios. Eltime sat apquilayo. Invocmec acnim nac jay yoyam elyicpilcojo Dios aplhamoclhojo enlhitaoc. Elpayicsojo sat quellhip Dios aptomja apquillanay nic nat netin najan nalhpop najan yingmin acvanyam najan aclhamoclhojo yingmin alinyajayam —alhta aptomjac ángel.
8 Apyiplovquic alhta mocjam poc ángel, apcanit alhta aptomjac. Aptomjac alhta apyimnatesa appayvam:
—Apyaninquic tingma apvanyam, apyaninquic tingma apvanyam apvisay Babilonia. Apquilpayesaclhec actemaclha apquilanatama lhalhma anco, malha anmin ataoc apquiltomja aplhamoclhojo enlhitaoc —alhta aptomjac ángel.
9 Apyiplovquic alhta mocjam poc ángel, apnatqui alhta aptomjac. Aptomjac alhta apyimnatesa appayvam:
—Elvitac sat apyanmongsayclha Dios apquiltemaclha enlhitaoc apquiltomja apquilpayescamo asoc navjac aclom najan quilaycmasquiscama anco. Enlhitaoc acyitna alhta alcajascama payjaclha napataa inlhoyqui laa alcajascama apmic. 10 Elvitac sat as enlhitaoc actemaclha Dios aplom. Elmesacpoc sat malha ingjaycoc aclaneyo Dios aplom yoyam elyinamcoc. Ellingamcojoc sat acmasca napatavo ángeles najan napato Nipquesic Apquitcoc. Ellingamcojoc sat acmasca naysicsa talha macpalhaquiscama azufre acpayesayclha talha. 11 Cotnamoc sat etin acmiyayclha netin cotmongvoycamlha nelha. Mepqui acmasquingvoyam mayasquiscama apyimpeoc as enlhitaoc acnim najan alhtaa. Ayinyemaclha apquilpayasoc alhta asoc navjac aclom najan quilaycmasquiscama anco najan acyitna alcajascama acvisay asoc navjac aclom. 12 Incaymalhquic elinlhanmojo Dios apmolhama apquiltomja apquilyiplovquiscama singanamaclha Dios najan apquiltomja melvatseycaoc melyasquiyam Jesús —alhta aptomjac ángel.
13 Yejemoc alhta siclinga appayvam ayinyema netin. Intomjac alhta seyanya:
—Italhos sat actema nac jay: “Apquilinyejemoc mataa enlhitaoc yoyam elmasquingvomoc naysicsa melyasquiyam Visqui ingac.” Aptomjac najan Espíritu apanco Dios: Naso, ellovsic sat apquilyampay apquilpenesa apquiltamjaycam. Colvoncamejec sat actemaclha apquiltamjaycam, covac sat acyanmongam —alhta intomjac siclingay.
Acnaclhomalhquilha acyilhna as nalhpop
14 Acvitac alhta lhama yipjopay acmopoy anco. Lhama enlhit alhta apma netin yipjopay, malha alhta enlhit apquitca. Oro asoc alyinmom alhta appocanma. Sovo acvinatem acjalhem alhta apmaycam acmajamtic. 15 Acvitac alhta poc ángel aptepa congne tingma apponquinomap. Apyimnatesquic alhta appayvam ángel. Aptomjac alhta ángel apcanya aptomja apma netin yipjopay:
—Imiclha sovo acvinatem acjalhem. Iyatemen sat yoyam conaclhalhca acyilhna as nalhpop. Incaymalhquic ongnaclhic quilhvo acyilhna, ayinyemaclha inyeycaac ningnaclhamaclha —alhta aptomjac ángel.
16 Yejemoc alhta apmacjesa sovo acvinatem as nalhpop aptomja apma netin yipjopay. Apnaclhec alhta acyovoclhojo acyilhna as nalhpop.
17 Acvitac alhta mocjam poc ángel aptepa tingma apponquinomap netin. Sovo acvinatem acjalhem alhta apmaycam acmajamtic. 18 Yejemoc alhta sicvita mocjam poc ángel aptepa acyitnamaclha acvatnamalhquilha asoc macmescama Dios. Apmopvan alhta innac ángel etipsic talha. Apyimnatesquic alhta appayvam. Aptomjac alhta as ángel apcanya aptomja apmaycam sovo acvinatem:
—Ima sovo acvinatem acjalhem. Iyatemen sat yoyam conaclhalhca acyilhna ayimjaclha uva as nalhpop. Ayinyemaclha mocjitquic uva acyilhna —alhta aptomjac.
19 Yejemoc alhta apmacjesa ángel sovo acvinatem as nalhpop. Apnaclhec alhta acyovoclhojo uva acyilhna as nalhpop. Apquilhaquic alhta acyilhna acyiviy alhancoc alyajapsomalhquilha acyilhna. Eycaso acyitsomalhca apyanmongsayclha Dios apquiltemaclha enlhitaoc. 20 Tap tingma apvanyam acyitna alhancoc acyiviy alyajapsomalhquilha acyilhna. Intipquic alhta ema alhancoc acyiviy. Inlanoc alhta ema netin lhop. Nitnoc alhta acyitnaclha ema, malha acpayjo apatong nolhing. Acvocmo trescientos kilómetros acyitnayam ema.
© © Biblia en Enhlet (Lengua Norte) © Paraguayan Bible Society, 1995.
