1 Acvitac alhta lhama ángel apyimtalhnamo apquinyectamo netin. Acvitac alhta naysicsa yipjopay acyayajayam, lhama pimjit alhta tacjaplhit. Malha acnim alhta intomjac napaat. Malha yamit acmeta ayimja netin alhta intomjac apilhquipcoc. 2 Vaycajac ayitcoc alhta apmaycam apmic. Aptangvoctac alhta netin yingmin acvanyam actamilaclha apminic. Aptacmec alhta moc apminic insancalvelha netin lhopactic. 3 Apyimnatesquic alhta appayvam ángel, malha yamacmeyva acyilhvayvam alhta intomjac. Inyiplovcoc alhta quilhtingyovayam acvocmo siete. 4 Natamin apquilhtingyovayam alhta siltamjo otalhocsic aclhamoclhojo asoc. Pilapcasquic alhta siclinga lhama appayvam ayinyema netin. Intomjac alhta seyanya:
—Notalhos nasa. Iyilhacpojo sat actemaclha alpayvam siete quilhtingyovayam —alhta intomjac appayvam.
5 Acvitac alhta mocjam ángel apquinmamcaa, lhama apminic netin yingmin acvanyam najan moc apminic netin lhopactic. Apmiyaseclhec alhta netin apmic actamilaclha. 6 Aptomjac alhta aplhena ángel yoyam colhejec acyascacmo. Aplhenquic alhta apvisay Dios aptomja apquilmilaneycaoc cotmongvoycamlha nelha. Aptomja apquilantipquiscama nic nat netin najan aclhamoclhojo aleyvam netin. Aptomja apquilantipquiscama nic nat as nalhpop najan aclhamoclhojo asoc aleyvam as nalhpop. Aptomja apquilantipquiscama nic nat yingmin acvanyam najan aclhamoclhojo asoc aleyvam nayingmin. Aptomjac alhta ángel:
—Comascoc sat acvisay acnim najan acvisay alhtaa. 7 Comoc sat acnim yoyam comoc nelha aplhanmaclha Dios acyilhomalhca. Acno ilhnic nat aplingascama Dios nipyesicsa profetas apquiltomja Dios apquilancam. Sat cotnejic naysicsa appayvascama trompeta ángel apvocmo siete —alhta aptomjac.
8 Aclingac coo mocjam appayvam ayinyema netin sepamejitsa lhac. Intomjac seyanya mocjam:
—Noc, iyoclhojo sat ángel apquinmamcaclha netin yingmin acvanyam najan netin lhopactic. Ima sat lhip vaycajac ayitcoc apmaycam ángel —alhta intomjac appayvam.
9 Yejemoc alhta sicyocmo apquinmamcaclha ángel. Almalhnaquic alhta yoyam jimquesic vaycajac ayitcoc. Aptomjac alhta seyanya ángel:
—Ima, itov sat vaycajac ayitcoc. Sij sat cotnejic apatong malha yovjan, aptova sat vaycajac. Cas sat cotnejic acvocmo sat apvocmo, malha asiscoc ayingmenic —alhta aptomjac seyanya.
10 Acmec alhta vaycajac ayitcoc apmaycam ángel, actovquic alhta. Sij alhta intomjac ajatong sictova vaycajac, malha yovjan. Cas alhta intomjac evocmo, malha asiscoc ayingmenic. 11 Intomjac alhta siclingay:
—Incaymalhquic lhip elngacsic mocjam amyaa ayinyema Dios nipyesicsa enlhitaoc lhalhma anco, nipyesicsa aplhamoclhojo apquilmolhama najan aplhamoclhojo apquilviscaa najan aclhamoclhojo cotnaja ninpayvamo lhama —alhta intomjac siclingay.
© © Biblia en Enhlet (Lengua Norte) © Paraguayan Bible Society, 1995.
