Actemaclha ningayo Visqui ingac
1 Visqui Apyimtalhnamo.
Tasic anco ontimjic gracias lhip.
Ontimjic sat ningayo lhip naysicsa ningminaycmascama.
2 Onlingacsic mataa alhtoo najan alhtaa aptemaclha singasicjayo najan singmasma.
3 Acyiplomo ningilmaycam nimpayvascama yatalhpong, najan arpa najan salterio.
4 Visqui ingac.
Lhip aptomja appayesayclha evalhoc, sicvita lhip aptomjaclha.
Payjeclhec evalhoc sicvita apquilantipquiscama lhip.
5 Visqui ingac.
Apmeyjec apanco lhip, sicvita alyivey aptamjaycam lhip.
Acyascamco anco apvalhoc lhip.
6 Paj elyasamcoc mataa enlhit acyeyjamelhma.
Paj elyasamcoc enlhit ayanem.
7 Apquilyitsomacpo apquilmapsomcaa, malha paat alyimseleycaoc najan ilhnamoc.
Enatovasacpoc sat cotmongvoycamlha nelha.
8 Visqui ingac.
Lhip apvamlha pac apyimtalhnamo netin cotmongvoycamlha nelha.
9 Visqui ingac.
Enatovasacpoc sat enlhit apquilinmelhaycam.
Comascoc sat apquileyvam cotnaja ingmoc.
Colhic sat ayilhpanquisa maa.
10 Lhip aptomja seyimnatescama, malha vayqui inquinavo acyimnatem anco.
Lhip aptomja seyitsovasquiscama, malha asoc masis seyatsisquiscama epatic.
11 Acvitac coo apnatovasomap cotnaja ingmoc.
Aclingac coo apquilpalhamaycam apquilmapsomcaa (yoyam eticyo).
12 Elmiyovacpoc sat actamilaycam apquilvalhoc.
Malha apquilictingam aptomjac.
Malha yamit alyivey cedro netin inquilhe Líbano intomjac apquilictingam.
13 Malha ayimjaclha intomjac congne Visqui tingma pac apponquinomap.
Malha yamit ilhnamoc intomjac payjoc Dios tingma pac apponquinomap.
14 Inquilhnec mataa acyilhna actomjayclho acvanyam yamit.
Alhnancoc mataa yamit, acyimnatem anco, mepqui ápac (enlhit appeyvomo).
15 Malha singlingascama intomjac: Visqui ingac semasma coo.
Appeyvomo apanco Visqui ingac.
Mepqui mataa apsilhnanomap apanco.
© © Biblia en Enhlet (Lengua Norte) © Paraguayan Bible Society, 1995.
