Actemaclha ingvalhoc
1 Almalhnaquic alhta Dios Visqui ingac sicyimnatesa sicpayvam.
Ingyeylhojo sat silmalhnancama.
2 Ayitamquic coo Visqui ingac naysicsa acmayovsa evalhoc.
Acmiyaseclhec mataa netin emeoc silmalhnancama alhtaa.
Mepqui mactamilquisquiyam evalhoc coo.
3 Inyitnec ajatic lhip Dios Visqui ajac naysicsa sicvinama.
Inquitamquic mataa evalhoc naysicsa mepqui sicyimnatem.
4 Lhip Visqui ingac, mepqui sictiyanma coo.
Paj cotepac sicpayvam naysicsa actamjaycam evalhoc.
5 Inlhenquic evalhoc actemaclha nanoc anco.
Inlhenquic evalhoc actemaclha años nanoc nat.
6 Inlhenquic evalhoc sicminaycmascama alhtaa.
Intomjac evalhoc acpametamcaa.
7 ¿Naso ya jingiltovacsic sat mataa Visqui ingac?
¿Mepqui ya mocjam singasicjayo Visqui ingac?
8 ¿Invocme ya nelha aptemaclha singasicjayo Visqui ingac?
¿Invocme ya nelha aplhanmaclha mepqui apyeycajascaoc?
9 ¿Inquilvoncacme ya aptemaclha singasicjayo Visqui ingac?
¿Avanje ya aplom mepqui singimlayquiclho mocjam? — intomjac alhta evalhoc.
10 Inlhenquic evalhoc:
—Moc aptemaclha apanco Visqui ingac.
Avanjec aclingaycamco evalhoc.
11 Inyitnam ejatic aptamjaycam simpilapquiscama nanoc nat Visqui ingac.
12 Inyitnam ejatic aptemaclha lhip apyimtalhnamo.
13 Dios Visqui ingac.
Apyimtalhnamo apanco nac lhip.
Paj poc apyimtalhnamo apanco apno lhip.
14 Apvamlha pac lhip ayinyema aptamjaycam simpilapquiscama.
Apvitascasquic alhta lhip apmopvan napatavo enlhitaoc lhalhma anco.
15 Lhip ayinyema apquilvomsomap tap Jacob apquilmolhama najan José apquilmolhama.
16 Dios Visqui ingac.
Apvitacpec nat lhip - incacac nic nat yingmin acvanyam.
Apvitacpec nat lhip - impilhyinimquic nic nat ayaptovnilha yingmin.
17 Inmamecac nic nat ayinyema yipjopay.
Inlingalhquic nic nat ayilhtingyavoyam netin.
Invitalhquic nic nat alyinmayam najan actiyam tacja.
18 Inlingalhquic nic nat ayilhtingyavoyam nipyesicsa piyam.
Invitalhquic nic nat alyinmayam (tacja) najan acyovjeycam nalhpop.
19 Apmilanquic nic nat lhip yingmin acvanyam, malha lhip amay pac.
Am nic nat cotalhcac apminic apquillhingam.
20 Lhip nic nat apnalayclha enlhitaoc malha apnatoscama.
Apquiltamilquiscama nic nat Moisés najan Aarón. ,
© © Biblia en Enhlet (Lengua Norte) © Paraguayan Bible Society, 1995.
