Aptovasomap tingma apponquinomap
1 Dios Visqui ingac.
¿Cotningvomeje ya nelha singilyamasma lhip?
¿So actomja yi aplova nac lhip ningilvisay lhip apnatoscama nipquesic?
2 Coyit apatic lhip singilyacyescama nano.
Ontimjic sat lhip apnaymacoc.
Coyit apatic lhip inquilhe Sión, apmaclha lhip nano.
3 Quip ilanojo aptovasomap tingma apyovoclhojo.
Innec actovasa lhip tingma pac apponquinomap ayinyema cotnaja ingmoc.
4 Apquilpalhamam alhta cotnaja ingmoc congne tingma apponquinomap.
Apquilhnesquic alhta bandera apancaoc asoc monquinatquiscama.
5 Apquilmaycam alhta tava apancaoc.
Malha aptingyeycaoc alhpongja intomjac.
6 Apnatovasquic alhta apquilnatanma congne tingma.
Tava najan martillo alhta apquilmaycam.
7 Apquilvatnec alhta talha emetic tingma apponquinomap.
Apnatovasquic alhta lhip apmaclha.
Apsovjoc alhta apnatovascama.
8 Apquilpalhamam alhta:
—Onsavojoc sat ningilnapma — alhta apquiltomjac.
Apquilvatnec alhta talha ninganeyquiclhilha.
Apsovjoc alhta apquilmeta.
9 Mepqui asoc monquinatquiscama ningyesicsa ayinyema lhip.
Mepqui lhama profeta Dios aplingascama ningyesicsa.
¿Co sat acvam comascoc?
10 Dios Visqui ingac.
¿Co sat acvam comascoc singvenneycam ayinyema singinmelhaycam?
¿Co sat acvam comascoc apquilvenneycam lhip apvisay?
11 ¿So actomja yi apmiyova nac lhip apmopvan apanco?
¿So actomja yi apmiyova nac lhip apectengaoc yoyam jingilpasmoc?
12 Lhip Visqui ajac nanoc nat.
Aptamjaycam simpilapquiscama lhip as nalhpop.
13 Lhip nic nat apquilhpanquiscama yingmin acvanyam ayinyema apmopvan.
Lhip nic nat apnatovascama cotnaja ingmoc (co Egipto).
Apquilyitsomacpo asoc navjac aclom nayingmin.
14 Lhip nic nat apnatovascama apquilyitsomacpo sinavocpo.
Aptovcamquic nic nat enlhit apjápaoc asoc navjac yochilhma actamopeycaoc.
15 Lhip nic nat ayinyema actiyapmaclha yingmin najan vatsam.
Lhip nic nat ayinyema acyamasomalhca alvata mepqui lha yingmin.
16 Lhip apanco acnim najan alhtaa.
Appiquinquic nic nat acnim najan piltin.
17 Lhip nic nat apquillanay nelha as nalhpop.
Lhip nic nat ayinyema mocjitma najan piyam.
18 Quip ilanojo apquilvenneycam cotnaja ingmoc najan apquilmapsomcaa.
19 Nojingilvonquim nasa lhip.
Mepqui ningilyimnatem naysicsa ninlingaycamco acyimtalhnama.
Jingmiyov nincoo napatavo.
Apquiltomja malha asoc navjac aclom yoyam jingilnapoc.
20 Coyit apatic lhip aplhanma apmayjayoclha.
Yitnec apquilyilhanmomaclha lhalhma anco.
Apquilpecjam jingiltovacsic (jingilnapoc).
21 Noyinimquis nasa ingnaymacoc melyimnatem.
Colhic sat ayaco lhip apvisay.
22 Ingva. Dios Visqui ingac.
Imyov sat actomja apanco.
Ilinmelham sat apquiltomja apquilvenneycam.
23 Noncolvonquim nasa apquilpalhamaycam cotnaja ingmoc.
Noncolvonquim nasa apquilpalhamaycam aptomja apquilinmelhaycam.
© © Biblia en Enhlet (Lengua Norte) © Paraguayan Bible Society, 1995.
