Apvisqui apyimtalhnamo
1 Invitalhquic alhta aptamjaycam Dios apyimtalhnamo.
Apquilhpanec alhta cotnaja ingmoc.
Apquilinyajamquic alhta apquilinmelhaycam.
2 Malha etin acvonquepma intomjac apquilinyem.
Malha appayjayclha pápac naysicsa talha apquiltomjac apquilmapsomcaa.
3 Payjeclhec mataa apquilvalhoc enlhit apquilpeyvomo.
Elitsovacsojo napato Dios Visqui ingac.
Elnayoc sat naysicsa apquilitsovascama.
4 Elminaycmas sat acyiplomo apquilayo Dios Visqui ingac.
Eltime sat apquilayo aptomja apquinamtem netin yipjopay.
Colpayjiclha apquilvalhoc quellhip apvisay apanco Visqui ingac.
5 Apnec mataa Dios tingma pac apponquinomap.
Apvisay apquilyap apquilyeyjeycam.
Apvisay apyicpilquemo lhintampaa.
6 Aptingyascasquic apquilmaclha enlhit mepqui apquilmolhama.
Apmascosquic actemaclha apquilmomap enlhit yoyam eleyo mocjam.
Melyinyovejec sat yoclhilhma actamopeycaoc enlhit apquilmapsomcaa.
7 Dios Visqui ingac.
Apmamyi ilhnic nat aplhingam lhip.
Apnalaclhec nic nat lhip enlhitaoc yoclhilhma actamopeycaoc.
8 Inyovjam nic nat as nalhpop.
Inmamecac nic nat yingmin acpaliyam.
Inyovjam nic nat mataymong acvinatem acvisay Sinaí.
Apvisay Dios Visqui apancaoc Israel apquilmolhama. ,
9 Dios Visqui ingac.
Avanjec nic nat acmamay acpaliyam.
Apyesiscama nic nat lhip yoclhilhma acyamay lhopactic.
10 Apquilmaclhec nic nat lhip apnaymacoc apquilasicjayo.
Aptingyascasquic nic nat lhip asoc ayaymomalhca.
11 Aplingasquic nic nat Visqui ingac lhama amyaa.
Inlingalhquic nic nat amyaa quilvanaa alpayescama:
12 —Apquinyajamquic alhta apquilviscaa najan singilpilhtetemo apyovoclhojo — nic nat inquiltomjac.
Inquilsovjoc nic nat quilvanaa apquilnatam cotnaja ingmoc.
Inquilmilasquic nic nat natingma.
13 Am nic nat elvitacpoc quellhip apquilyilhanmeycam.
Valhaay aplhimpancoc alyitsomalhca plata asoc alyinmom.
Valhaay apva acyitsomalhca oro asoc alyinmom.
14 Apquinyajasquic nic nat Dios apyimtalhnamo apquilinyem apquilviscaa.
Aptiyacmec nic nat piyam netin inquilhe acvisay Acpasyam (Salomón).
15 Nitnoc anco mataymong apmaclha Dios (Basán).
Inlhamoc mataymong ayitsicsic.
16 Inquillhenalhquic mataymong ayitsicsaoc.
Altomja malha alyasipquiscama nicja mataymong apmaclha Dios.
Elhic sat maa Dios Visqui ingac mataa.
17 Malha millones carros apancaoc Dios, mongmovan ongilyipsitic.
Aptiyapma alhta inquilhe Sinaí apmiyantamo tingma apponquinomap.
18 Dios Visqui ingac.
Apquinamtec nic nat lhip nitno apnalayclha apquilmomap.
Aplhocac nic nat malmescama lhip nipyesicsa enlhitaoc.
Elpalhavotac sat enlhitaoc apquilinmelhaycam apnaclha lhip.
19 Innec ayaco lhip Dios Visqui ingac singvomquiscama tap.
Ingilpasmec mataa nincoo aclhamoclhojo acnim.
20 Dios Visqui ingac aptomja singvomquiscama tap.
Aptomja singmasma yoyam mongmasquingvomeje.
21 Elnapoc sat Visqui ingac aplhamoclhojo cotnaja ingmoc.
Elnapoc sat Visqui ingac aplhamoclhojo apquilsilhnanomap apanco.
22 Eycaso appayvam Visqui ingac:
—Otajicsojoc sat apnaycam inquilhe sicmaclha coo (Basán).
Otajicsojoc sat apmancaoc apquiltoyam acyivey empac cotnaja ingmoc.
23 Colyilhvasic sat apmancaoc apquiltoyam acyivey empac cotnaja ingmoc.
Coltovamcoc sat simjing acyivey em pac — nic nat aptomjac.
24 Lhip nac Dios Visqui ajac.
Colhic sat ayaco lhip apvisay congne tingma apponquinomap naysicsa apquilitsovascama.
25 Apquilmamyi apquillhinga apquilminaycmascama.
Niptamin apquillhinga apquilpayvascama.
Naysicsa allhinga quilvana ayitcoc alticpaycam tamborín (panderetas).
26 Eltime sat apquilayo Dios Visqui ingac.
Eltime sat apquilayo apyovoclhojo Israel apquilmolhama.
27 Aplhingam apmamyi apvisay Benjamín apsilhyo.
Niptamin apquillhinga apquilviscaa Judá apquilmolhama.
Poc apquillhinga Zabulón apquilmolhama najan Neftalí apquilmolhama.
28 Dios Visqui ajac.
Itasquis lhip apmopvan apanco.
Colhic sat mataa ayaco lhip aptamjaycam simpilapquiscama ningyesicsa.
29 Ayinyema lhip tingma pac apponquinomap Jerusalén.
Apquilsantimquiscama malmescama lhip ayinyema apquilviscaa.
30 Ilinmelham sat lhip co Egipto, malha asoc navjac aclom.
Ilinmelham sat lhip enlhitaoc apquilyitsomacpo vayqui inquilinava najan vayqui ayitcoc.
Inatovas acma apquilnatam nipyesicsa enlhitaoc.
Ingyilhpanquis sat enlhitaoc apquiltamjo inlhojo elnapacpoc.
31 Elvac sat co Egipto apquilasinancama.
Elvac sat co Etiopía acyiplomo apquilmescama nasa.
32 Quellhip apquilviscaa lhalhma anco.
Eltime sat apquilayo Visqui ingac.
Elminaycmas sat apquilayo Visqui ingac.
33 Apmaclha netin Visqui ingac cotmongvoycamlha nelha.
Quip elaylhojo appayvam apanco.
Acyimnatem anco appayvam.
34 Eltime apquilayo quellhip apmopvan apanco Dios Visqui ingac.
Apyimtalhnamo apanco nipyesicsa Israel apquilmolhama.
Apyimtalhnamo apanco netin yipjopay lhalhma anco.
35 Apyimtalhnamo apanco Dios apna tingma pac apponquinomap.
Dios Visqui ingac aptimesquiscama apquilyimnatem najan apquilmopvan enlhitaoc Israel apquilmolhama.
Innec ayaco Visqui ingac.
© © Biblia en Enhlet (Lengua Norte) © Paraguayan Bible Society, 1995.
