Singilpasmom Dios
1 Elminaycmas sat quellhip.
Eltime apquilayo Dios Visqui ingac.
Quellhip enlhitaoc apyovoclhojo as nalhpop.
2 Elminaycmas sat quellhip.
Colhic sat ayaco apvisay apanco.
Eltime sat apquilayo naysicsa apquilminaycmascama.
3 Eltime sat quellhip elanic Dios Visqui ingac:
—Aptamjaycam simpilapquiscama ayinyema lhip apmopvan apanco.
Eljalhic sat apyovoclhojo cotnaja ingmoc napato lhip.
4 Colhic sat ayaco lhip ayinyema enlhitaoc lhalhma anco.
Colhic sat ayaco lhip naysicsa apquilminaycmascama.
5 Elmiyama jilip.
Elanojo aptomjaclha Dios Visqui ingac.
Elanojo aptamjaycam simpilapquiscama nipyesicsa enlhitaoc.
6 Intomjaclhec nic nat lhopactic acyitnamaclha yingmin acvanyam.
Apquiljalhtipilhquitquic nic nat ningilyeyjamcaa mepqui lha yingmin.
Pac ongilitsovacsojoc sat napato Dios Visqui ingac. ,
7 Apmopvan innac Dios Visqui ingac cotningvoyam nelha.
Apquilanoc mataa actemaclha apquileyvam apyovoclhojo enlhitaoc.
Colapvanquejec mataa elinmelham enlhit apquilmapsomcaa.
8 Quellhip enlhitaoc apyovoclhojo.
Eltime sat apquilayo Dios Visqui ingac.
Eltime sat apquilayo naysicsa apquilminaycmascama.
9 Aptomja apyimnatescama ingnenyic.
Sintamilquiscama naysicsa ningileyvam.
10 Dios Visqui ingac.
Lhip aptomja singyicpilquemo apyipcona ingilvalhoc.
Lhip aptomja singiltamescama.
Acno singiltimesquiscama ningiltamila.
11 Lhip alhta aptimesquiscama yoyam ongmalhca (quiljanma).
Lhip alhta singilpatimquiscama onlingamcojo acyimtalhnama.
12 Am alhta emyavac lhip jingilinmelham enlhitaoc.
Ninlingamcoc alhta singiltovascama talha najan yingmin acvanyam.
Ingilvomcasquic alhta tap.
Inmasquec alhta ninlingaycamco.
13 Osantimsic sat macmescama lhip netin acvatnamaclha tingma apponquinomap.
Osavojoc sat siclhanma mepqui sicyeycajascaoc.
14 Siclhanma alhta naysicsa siclingaycamco acyimtalhnama.
15 Olmecsic sat lhip sicnatoscama apquiltamila apanco, yoyam colhic alvatna.
Sicnatoscama nipquesic najan yataay najan vayqui inquinavo ayitcoc.
16 Elmiyama jilip quellhip apquiltomja apquilayo Dios Visqui ingac.
Elaylhojo quellhip siclingascama amyaa setnesquiscama Visqui ingac.
17 Ayevam alhta Visqui ingac acyiplomo siyayo naysicsa sicpamejitquiscama.
18 Am sat ancoc cotamila evalhoc mengyeylhojoc sat Visqui ingac.
19 Apjalhnoc alhta silmalhnancama.
Ayinyema alhta actamilaycam evalhoc.
20 Gracias a Dios.
Aptasi nac Dios Visqui ingac.
Am alhta etanovac silmalhnancama.
Am alhta emyavac aptemaclha seyasicjayo.
© © Biblia en Enhlet (Lengua Norte) © Paraguayan Bible Society, 1995.
