Singmasma Dios Visqui ingac
1 Dios Visqui ajac.
Jemyov coo napatavo selinmelhaycam (cotnaja ingmoc).
Jevomquis tap napatavo ticyovam yapmayc.
2 Jemyov coo napatavo apquilmapsomcaa.
Jemyov coo yoyam momatneje.
3 Apquilpasmacpec enlhit apquilyimnatem (apquilyimtalhnamo).
Apquilpamejitsacpec maa yoyam jelajic.
4 Visqui ajac.
Mepqui sicsilhnanomalhca ajanco.
Mepqui sictemaclha ajanco sicmasom.
Naso, apquilpecjam yoyam jelajic.
Jepasingvota quilhvo nac jay.
5 Lhip nac Dios Apyimtalhnamo, Dios Visqui apancaoc Israel (apquilmolhama).
Noc. Iyanmongsiclha apquiltemalcha apancaoc cotnaja ingmoc (enlhit ningyava).
Isavojo apquilnapma apyovoclhojo apquilmapsomcaa.
6 Apquilmiyantac mataa alhtaa.
Apquilyitsomacpo simjing aclom alpáyvam.
Apquilsovjam mataa apvalhoc tingma.
Malha simjing aclom apquiltomjac.
7 Somcoc mataa apquilpayvam.
Malha actiyapma aymanong simjing aclom.
Intomjac mataa apquilvalhoc:
—Paj lhama eyasamcoc nintemaclha — intomjac apquilvalhoc.
8 Lhip visqui ingac.
Lhip aptomja apcasmescama enlhit singinmelhaycam.
Lhip aptomja apvennéycam singinmelhaycam.
9 Dios Visqui ajac.
Lhip nac semasma coo.
Lhip aptomja seyimnatescama naysicsa semasma coo.
10 Epasingvoctac mataa Dios Visqui ajac.
Elhicmosquic mataa apquiltemaclha selinmelhaycam apquilinyem.
Acyispaquic mataa sicvita.
11 Nosavojo nasa apquilnapma quilhvo.
Colvoncamejec sat ingnaymacoc apquilvita.
Ingyilhpanquis sat ayinyema lhip apmopvan.
Visqui ingac aptomja singmasma nincoo.
12 Avanjec mataa apquilsilhnanomap apanco ayinyema apquilpayvam.
Ayinyema apquiltemaclha apquilyimtalhnesomacpo apanco.
13 Isavojo sat apquilnapma (naysicsa aplom).
Comascoc sat apquiltiyascam.
Elyasingvomoc sat actomja nasoc anco.
Dios apvisay Apvisqui apancaoc enlhitaoc Israel (apquilmolhama).
Elyasingvomoc sat lhalhma anco.
14-15 Apquilmiyantac mataa alhtaa.
Apquilyitsomacpo simjing aclom alpáyvam.
Apquilsovjam mataa apvalhoc tingma aptingyeycaoc nintom.
Somcoc mataa apquilpayvam melvitay nintom.
16 Coo eyca omnaycmacsic mataa secaseclha.
Olngacsic sat mataa lhip aptemaclha apmopvan najan singasicjayo.
Lhip nac semasma coo.
Sicyilhanmeycam mataa naysicsa siyay coo.
17 Dios Visqui ajac.
Otnejic sat siyayo lhip naysicsa sicminaycmascama.
Siyayo lhip ayinyema seyimnatescama najan semasma.
Lhip aptomja singasicjayo.
© © Biblia en Enhlet (Lengua Norte) © Paraguayan Bible Society, 1995.
