Apquiltemaclha cotnaja ingmoc
1 Dios Visqui ingac.
Ninlingac alhta amyaa singiltimnascama ningilyeyjamcaa.
Inlingalhquic nic nat lhip apvisay.
Lhip aptamjaycam simpilapquiscama.
2 Apyinyovcasquic nic nat lhip apquilaoclha metnaja nimpayvomó lhama.
Apquilmesquic nic nat lhip as yoclhilhma apquillhoy ningilyeyjamcaa.
Apnatovasacpec nic nat apquiltomja siclho apquilaoclha.
Aplhamaseclhec nic nat lhip ningilyeyjamcaa.
3 Am nic nat conyemac apquilyimnatem ningilyeyjamcaa.
Lhip nic nat ayinyema apquilyimnatem.
Aptimesquiscama nic nat apquilyimtalhnamo.
Ayinyema ilhnic nat lhip apquilasicjayo.
4 Lhip nac Dios Visqui ingac quilhvo nac jay.
Ilane sat eltimjic mataa apquilyimnatem enlhitaoc Israel (Jacob apmolhama).
5 Lhip ayinyema singyimnatescama, yoyam ongminlhinam cotnaja ingmoc.
Lhip ayinyema singyimnatescama, yoyam ongnatovacsic singinmelhaycam.
6 Jave ayinyema ningilmaycam pilhpaalh ontimjic ningilyimnatem.
Jave ayinyema ningilmaycam sovo acvinatem ontimjic ningilyimnatem.
7 Lhip alhta ayinyema singyimnatescama yoyam ongminlhinam cotnaja ingmoc.
Lhip alhta apnatovascama apquiltomja singiltanoncama.
8 Innec mataa ayaco lhip Dios Visqui ingac.
Najan lhip apvisay cotmongvoycamlha nelha.
9 Quip ilanojo.
Singyamasma lhip quilhvo nac jay acyiplomo ningilmancactama.
Mepqui ninlhalhma mocjam lhip naysicsa ningilnapomalhca.
10 Ninginyajamquic mataa ningvita inlhojo cotnaja ingmoc.
Apquilpatmaoclhec ningilnatam apquiltomja singiltanoncama.
11 Ningilmalhquic mataa nincoo.
Malha ninatoscama yoyam onticyo.
Ingilhpancasquic nincoo lhip nipyesicsa metnaja nimpayvomó lhama.
12 Lhip alhta singyamasma acyanmongam ayitcoc.
Malha mepqui acyanmongam alhta singyamasma lhip.
13 Ningvénnalhquic nincoo napatavo enlhitaoc ningyava nincoo.
Ingilasmasquic nincoo enlhitaoc ningyava nincoo.
14 Ingilasmasquic nincoo metnaja nimpayvomó lhama.
Apquilyeyesam mataa apcatic singilano lhalhma anco.
15 Inlingamcoc ingilvalhoc apquiltemaclha almasomcaa.
Avanjec mataa acmancactama ingilvalhoc.
16 Ayinyema mataa sicvitay singiltanoncama najan singilasmescama.
Ayinyema mataa sicvitay apquiltemaclha asoc navjac aclom.
17 Ninlingamcoc nincoo mepqui ningilsilhnanomalhca inganco.
Am jingilvoncacmoc mataa lhip apmayjayoclha aplhanma mepqui apyeycajascaoc.
18 Am alhta ongyinyavac mataa lhip.
Am alhta ongilvatasac mataa.
Mepqui alhta ninlhinganyam naysicsa ningyiplovquiscama.
19 Singiltovascama lhip mepqui ningmaclha nincoo.
Ingilajapvaac nincoo acyivey yatescamalhma.
20 Lhip Dios Visqui ingac.
Am jingilvoncacmoc lhip apvisay.
Am ongilpayasoc mataa (quilaycmasquiscama) poc dios.
21 Lhip apvamlha pac apyascamco nintemaclha nincoo.
Ayalhnaclhojo ingilvalhoc napato lhip.
22 Lhip ayinyema moclhama acnim yoyam onticyo.
Malha ninatoscama yoyam eticyoc ningiltomja nincoo.
23 ¿Aptinqui ya lhquip Visqui ingac?
Ilhaticja. Ilhaticja.
Jingmiyov nincoo yoyam mongiltovasalhqueje.
24 ¿Apyilhanme ya lhquip?
¿Inquilvoncacme ya lhquip ninlingaycamco acyimtalhnama?
25 Inlingamcoc mataa ingilvalhoc acyiplomo ningmancactama.
Mepqui ningilyimnatem nincoo.
Mepqui acyimnatem ingilvalhoc.
26 Visqui ingac ilhing. Jingilpasingvota.
Jingilvomquis tap ayinyema lhip acyivey singasicjayo.
© © Biblia en Enhlet (Lengua Norte) © Paraguayan Bible Society, 1995.
