Actemaclha ninlingaycamco acyimtalhnama
1 Actimec coo siyayo lhip Visqui ingac.
Nongyane nasa colhic sevennamcaa coo.
Jevomquis tap ayinyema aptemaclha lhip appeyvomo.
2 Ingyeylhojo sicpayvam, ipecjacsojo jepasmoc.
Itne sat malha mataymong acyimnatem najan malha sicyilhanmom, yoyam jevomsic tap.
3 Lhip aptomja malha mataymong acyimnatem najan malha sicyilhanmom.
Lhip aptomja selhicmoscama, malha seyantamayclha amay.
Innec ayaco lhip apvisay.
4 Jeliquis tama apquiljanma, apquilpicanma alhta seyinmelhaycam.
Lhip aptomja setamilquiscama.
5 Ima sat sicvanmoncama, etamilsic sat lhip.
Lhip aptomja nasoc anco Visqui ingac.
Lhip aptomja sevomquiscama tap.
6 Actanovquic coo aptomja apquilpayescamo quilaycmasquiscama acyitsomalhca Dios.
Actimec coo siyayo lhip.
7 Impayjeclhec evalhoc, ayitsovasoc anco sicvita aptemaclha lhip seyasicjayo.
Apvitac alhta lhip actemaclha siclingaycamco acyimtalhnama.
Apyasamcoc lhip actemaclha aclingaycamco evalhoc coo.
8 Emyovquic alhta yoyam jelmoc cotnaja emoc.
Etnimcasquic alhta acyivey'lhma.
9 Lhip Visqui ingac, jepasim coo naysicsa siclingaycamco acyimtalhnamo.
Inmasquec sicvitay'lhma, inmasquec acyimnaa evalhoc, inmasquec najan sicyimnatem.
10 Inmasquec sictiyascam ayinyema aclingaycamco evalhoc.
Ayovsec evalhoc ayamquitvaa nelha sictiyascam.
Inmasquec sicyimnaa ayinyema sicsilhnanomalhca ajanco.
Inmasquec alyimnaa elhquipcoc.
11 Evennam coo aplhamoclhojo cotnaja emoc.
Elyinyovquic mataa sicnaycamo'lhama najan enaymacoc.
Apquinyajamquic mataa seltajanyaa amay.
12 Am colhenalhcac mataa sicvisay, malha siyitsepma actomjac.
Malha yatingvalhva aptipilcomap actomjac coo.
13 Aclingac coo mataa aplhamoclhojo aptipsaycam sicvisay.
Avanjec anco siyay sicvita neyava coo.
Apquilpamejitsacpec mataa actemaclha yoyam jelajic.
14 Actimec coo mataa siyayo lhip Visqui ingac.
Intomjac mataa evalhoc coo.
—Lhip Dios aptomja Visqui ingac — intomjac mataa evalhoc.
15 Lhip apyasamcoc yavamlha jetnejic ningvamlha nac jay.
Jevomquis tap naysicsa selyamascama cotnaja emoc.
16 Jelhicmos sat aptemaclha apyimtalhnamo lhip, malha gloria apcapongmatem.
Jemyov coo ayinyema lhip apvisay singasicjayo.
17 Ayevam lhac lhip Visqui ingac.
Nongyane nasa colhic sevennamcaa.
Ingyane sat colhic alvennamcaa enlhit apquilmapsomcaa.
Elyinyovacpoc sat alyascamaclha ingjangaoc.
Elvanmamcoc sat maa.
18 Elvanmamcoc sat apquilmopvancaa amyaa.
Cayjec alhta apquilpayvam selinmelhaycam sictomja sicpeyvomo.
Apquiltemaclha alhta apquilyimtalhnesomap apanco najan selvennéycam coo.
19 Avanjec anco aptemaclha lhip singasicjayo.
Apquilvitac mataa apquiltomja apquilayo.
Apquilasicjavoc lhip aplhamoclhojo apquiltomja apquilayo lhip.
20 Apmasma aptomjac lhip naysicsa apquilinmelhaycam enlhitaoc.
Malha apposcama aptomjac lhip congne paat.
Apmiyovquic lhip apquiltemaclha apquilatingmomap.
21 Innec ayaco lhip Visqui ingac.
Avanjec alhta sepasmom sicma tingma apvanyam.
22 Intomjac alhta siclhoc evalhoc:
—Sictanovmalhca mataa napato visqui ingac — alhta intomjac evalhoc.
Inyiplovcoc alhta silmalhnancama.
Apjalhnoc alhta lhip sicpayvam, malha silpalhamaycam actomjac coo.
23 Quellhip enlhitaoc apquilpeyvomo, elasicjojo mataa Visqui ingac.
Sintamilquiscama aptomjac Visqui ingac ningiltomja mongilvatseycaoc.
Eyanmongsiclhac sat nintemaclha ningyimtalhnesomalhco inganco.
24 Elvascap sat, elyimnaticsojo apquilvalhoc quellhip apquiltomja apquiljalhneycam Visqui ingac.
© © Biblia en Enhlet (Lengua Norte) © Paraguayan Bible Society, 1995.
