Singvomquiscama tap
1 Visqui ingac aptomja seyitsasquiscamalhma najan sevomquiscama tap.
Mongvacyejec sat mataa coo.
Visqui ingac aptomja seyimnatescama.
Cotyemejec sat mataa evalhoc.
2 Jevocjac sat ancoc apquilmapsomcaa yoyam jelajic.
Apquilhyacmec sat ancoc selinmelhaycam najan cotnaja emoc.
Enatovasacpoc sat, malha apquiltolhnay sat cotnejic.
3 Cotyemejec sat evalhoc sicvita sat sevocjingvoy.
Coytic sat actamilaycam evalhoc sicvita sat seyimpocjay.
4 Yitnec coo lhama asoc yoyam olmalhnam mataa:
—Ingyane sat olhic mataa lhip tingma pac aclhamoclhojo acnim sictiyascam coo.
Altamjoc olanojoc mataa aptemaclha lhip singasicjayo, najan aptemaclha tingma apponquinomap.
5 Jecpocsic sat lhip tingma apponquinomap acvaa sat acnim acyimtalhnama.
Jetamilsic sat lhip congne tingma apponquinomap.
Jetnimsic sat netin mataymong.
6 Apyimnatasquic lhip evalhoc naysicsa sevocjingvoy cotnaja emoc.
Otnejic sat siyayo lhip, malha asoc macmescama congne tingma apponquinomap.
Otnejic sat siyayo lhip naysicsa sicminaycmascama najan sicpayvascama — intomjac mataa evalhoc coo.
7 Visqui ingac, ingyeylhojo actemaclha siyeveycam.
Jepasim coo, ingyeylhojo sicpayvam.
8 Inlhenquic evalhoc lhip aplhanma nano:
—Jelquitam coo — alhta aptomjac lhip.
Naso, ayitamquic coo mataa lhip.
9 Noyilhanim nasa lhip naysicsa siyitamsama.
Nojeyinyov nasa naysicsa aplom lhip.
Lhip alhta sepasmom.
Nojetvas nasa coo, nojeyinyov nasa.
Lhip Visqui, aptomja sevomquiscama tap.
10 Eyinyovquic tata coo najan meme.
Mejeyinyovejec mataa Visqui ingac, aptomjac semam tacja coo.
11 Visqui ingac, jelhicmos sat aptemaclha lhip, yoyam oyiplovcasojo amay.
Jeyantemiclha sat actemaclha acpeyvomo.
Elvitac sat cotnaja emoc.
12 Nongyane nasa jeltovacsic selinmelhaycam.
Elinmelham coo apquilmopvancaa amyaa.
Apquililtamjoc jeltovacsic coo.
13 Acyasamcoc coo, otac sat yoclhilhma alhnancoc, aptemaclha singasicjayo Visqui ingac.
14 Lhip emoc, iyiplovcasojo aptemaclha Visqui ingac.
Ivascap sat lhip.
Iyimnaticsojo sat apvalhoc.
Ilalh sat apvactamo Visqui ingac.
© © Biblia en Enhlet (Lengua Norte) © Paraguayan Bible Society, 1995.
