Avanjec aplingaycamco acyimtalhnama
1 Dios Apyimtalhnamo, Dios Apyimtalhnamo, ¿soctomja seyinyova nac qui?
Avanjec silpalhamaycam yoyam jepasmoc lhip.
Mocjay apnac lhip melngay sicpayvam.
2 Dios Apyimtalhnamo, ayevam lhip acnim anco.
Am jeyatingmavoc mataa lhip.
Ayevam lhip alhtaa, am otenac mataa coo.
3 Lhip aptomja apyimtalhnamo.
Innec ayaco lhip apvisay nipyesicsa enlhitaoc.
4 Apquiltimec nic nat apquilayo ningilyeyjamcaa.
Inyiplovcoc nic nat lhip apquilvomquiscama tap.
5 Apquililpalhamam nic nat ningilyeyjamcaa.
Inyiplovcoc nic nat lhip apmasma.
Apquiltimec nic nat apquilayo, am nic nat eyinyavac lhip.
6 Coo eyca sictomja malha ascoc, malha motnaja enlhit.
Sevennéycam mataa enlhitaoc, sictanovmalhca nipyesicsa enaymacoc.
7 Evennoc mataa enlhit selvita.
Apquilmayjac mataa selvita.
Apquilyeysam mataa apcatic.
Apquiltomjac selanya:
8 —Aptimec lhip apcanem emyoc sat Dios.
Ingyane sat emyoc quilhvo nac jay.
Apcasicjavoc sat ancoc Dios,
Ingyane sat evomsic tap — apquiltomjac selanya coo.
9 Visqui ingac ayinyema setimquiscama meme coo.
Lhip aptomjac sepcanvoycta avalhoc meme coo, yoyam otoc neme.
10 Ayenmo sictiyaycamlha aptomja seyayneycaoc lhip.
Ayenmo sictiyaycamlha aptomja lhip Visqui ajac.
11 Nojeyinyov nasa coo.
Incamquitvaac siclingaycamco acyimtalhnama.
Paj poc enlhit yoyam jepasmoc.
12 Malha vayqui inquilinava sevocjay coo.
Alyimnatem anco vayqui inquilinava alinyema yoclhilhma Basán.
13 Inquilmayjac mataa naysicsa aclom.
Acno aptemaclha niptana naysicsa aplom.
14 Coo sictomja malha yingmin acyanquinomalhca.
Inquilyitipquic acyovoclhojo elhquipcoc.
Ayovsec evalhoc coo, malha papac appayjayclha intomjac evalhoc.
15 Inmasquec sicyimnatem, malha asoc acyamay intomjac.
Inyimnaquic ajalhcoc coo.
Lhip aptomja sepcanvoyam ningitsepmaclha.
16 Evocjac coo simjing.
Evocjac coo enlhitaoc apquilmapsomcaa.
Apquilyancalhcatquic emeoc najan emancoc.
17 Acvitac coo acyovoclhojo elhquipcoc.
Elasmasquic selano naysicsa siclingaycamco acmasca.
18 Apquilmilascacpe nac silantalhnama.
Apnatovasquic sicas apmetsovjacpo sictalhnama.
19 Visqui ajac, jepasingvota coo.
Lhip aptomjac semasma apyimnatem.
Jevomquis tap coo.
20 Nongyane nasa oticpalhca sovo acvinatem.
Nongyane nasa jeltovacsic simjing aclom.
21 Jevomquis tap naysicsa yoyam jeyajic niptana.
Jevomquis tap naysicsa yoyam jelyiplha inquipitaoc vayqui navjac.
22 Olngacsic sat lhip apvisay nipyesicsa elyalhinga.
Otnejic sat siyayo lhip naysicsa ninganeyquiclha.
23 Quellhip elyalhinga, eltime sat mataa apquilayo Visqui ingac.
Quellhip Jacob aptovana niptamin, eltime sat mataa apquilayo Visqui ingac.
Quellhip enlhitaoc Israel, elavojo sat mataa Visqui ingac.
24 Am jingvennam mataa Visqui ingac naysicsa ninlingaycamco acyimtalhnama.
Ingilanam mataa Visqui ingac.
Apjalhnoc mataa naysicsa ningvíneycam.
25 Otnejic sat siyayo lhip naysicsa apcaneyquiclhilha aplhamoclhojo enlhit.
Nasoc anco sat otnejic actomjaclha siclhanma napatavo enaymacoc.
26 Eltovamcoc sat mataa actomja actamilaycam apquilvalhoc.
Elyipcanmoc sat.
Elpayicsojoc sat Visqui ingac apquiltomja apquilquitamsama siclho.
Colhic sat acyimnatem apnenyaoc cotmongvoycamlha nelha.
27 Elyasingvoclhojoc sat aptemaclha Visqui ingac aplhamoclhojo enlhitaoc.
Elyanmongsic sat apquilvalhoc enlhit lhalhma anco.
Elticlhoc sat aptapnaoc napato Visqui ingac aplhamoclhojo enlhitaoc as nalhpop.
28 Lhip Dios aptomja Apvisqui apyimtalhnamo.
Aptomja Apvisqui apancaoc enlhitaoc lhalhma anco.
29 Elticlhoc sat aptapnaoc napatoc lhip aplhamoclhojo apquilyimtalhnamo as nalhpop.
Elpayicsojoc sat lhip aplhamoclhojo apnaycaoc tacjalhpopayc.
Colhic sat co lha acyimnatem enquenyic.
30 Elpayicsojoc sat Visqui ingac etovana netamin.
Colngalhcac sat lhip apvisay nipyesicsa aptovana.
31 Elvac sat yoyam ellingacsic actemaclha acpeyvomo ayinyema lhip.
Ellingacsic sat nipyesicsa metyaycamlha mocjam.
Aptemaclha lhip ayinyema aclhamoclhojo asoc.
© © Biblia en Enhlet (Lengua Norte) © Paraguayan Bible Society, 1995.
