Ningayo naysicsa fiesta
1 Aptasi nac Visqui ingac. Eltime sat gracias.
Avanjec mataa singasicjayo Visqui ingac.
2 Eltime sat quellhip Israel apquilmolhama:
Avanjec mataa singasicjayo Visqui ingac.
3 Eltime sat quellhip sacerdotes (Aarón apquilmolhama):
Avanjec mataa singasicjayo Visqui ingac.
4 Eltime sat quellhip apquilayo Visqui ingac:
Avanjec mataa singasicjayo Visqui ingac.
5 Ayevam alhta Visqui ingac naysicsa siclingaycamco selinmelhaycam.
Apjalhnoc alhta Visqui ingac.
Emyovquic alhta mocjam.
6 Mongvacyejec mataa coo.
Siclhalhma coo Visqui ingac.
Mejetvacsejec sat enlhit.
7 Epasmec mataa coo.
Siclhalhma Visqui coo.
Otac sat apticyovam selinmelhaycam.
8 Ongyiplovcasojo mepqui ningyasquiyam Visqui ingac.
Mongyiplovsejec apquiltemaclha apancaoc enlhitaoc.
9 Ongyiplovcasojo mepqui ningyasquiyam Visqui ingac.
Mongyiplovsejec apquiltemaclha apquilyimtalhnamo.
10 Elvocjac alhta aplhamoclhojo cotnaja ingmoc.
Alnapquic alhta coo, ayinyema sepasmom Visqui ingac.
11 Elvocjac alhta coo mocjam.
Epasmec mocjam Visqui ingac.
Elvocjac alhta coo mocjam.
Alnapquic alhta ayinyema sepasmom Visqui.
12 Malha yamyovjene alhta intomjac selvocjay (quimpocjacme).
Malha talha alnapma intomjac apquilvatescama apquillom.
Alnapquic alhta, ayinyema sepasmom Visqui ingac.
13 Elyingamquic alhta coo yoyam otyamoc.
Epasmec alhta Visqui ingac.
14 Actomjac coo siyayo Visqui ingac aptomja seyimnatescama.
Aptomja sevomquiscama tap.
15 Inlingalhquic amyaa ningiltomja ningilyimnatem nipyesicsa ingnaymacoc.
Yiplovcoc apquilminaycmascama natingma.
Apmopvan aptamjaycam Visqui ingac.
16 Apmopvan aptamjaycam simpilapquiscama Visqui ingac.
Apmopvan aptamjaycam Visqui ingac.
17 Momatnejec sat coo. Otyisam sat mocjam.
Olngacsic sat aptemaclha aptamjaycam Visqui ingac.
18 Eyascasquic alhta eyimpejic Visqui ingac.
Emyovquic alhta yoyam momatneje.
19 Ellic sat quellhip tingma apatong, tingma apponquinomap.
Otlhic sat coo. Otnejic sat gracias Visqui ingac.
20 Atong nac as'i, ningyoyam Visqui ingac.
Elantilhic apquilvamlha apquilpeyvomo.
21 Gracias lhip Visqui ingac, semasma coo.
Apjalhnoc alhta sicpayvam.
22 Mataymong apquilyamasma apquilaneycaoc tingma.
Impiquenalhquic tingma apvojac actajescamaclha.
23 Eycaso aptamjaycam apanco Visqui ingac.
Ingilpilapcasquic nincoo ningvita.
24 Eycaso ayinyema Visqui ingac acnim nac jay.
Copayjiclhac sat ingilvalhoc.
Pac ongilitsovacsojo.
25 Lhip Visqui ingac, jingilmiyov nincoo.
Jingilpasim nincoo.
Lhip Visqui ingac, ilhnata ningyesicsa (jingnaliclha).
26 Ningilayo aptomja apquilhyam apsoyam apvisay Visqui ingac.
Ningilayo quellhip, ayinyema Visqui ingac tingma pac apponquinomap.
27 Apyimnatem apanco Dios Visqui ingac.
Aptomja singitsasquiscama olhma.
Elsantimquis yamit actingaoc (elnalhimquis) acvaycmo acvatnamalhquilha.
Ongenojoc sat fiesta quilhvo nac jay.
28 Apyimnatem apanco lhip Dios Visqui ingac.
Gracias actomjac lhip.
Otnejic sat siyayo lhip Visqui ingac.
29 Aptasi nac Visqui ingac. Eltime sat gracias.
Avanjec mataa singasicjayo Visqui ingac.
© © Biblia en Enhlet (Lengua Norte) © Paraguayan Bible Society, 1995.
