Quilaycmasquiscama acyitsomalhca Dios
1 Visqui ingac. Jave nincoo yoyam colhic singaco.
Colhic sat ayaco lhip apvisay.
2 Colhic sat ayaco ayinyema singasicjayo najan aptomja nasoc anco.
¿Soctomja singilvena nincoo cotnaja ningmolhama?
¿Jalhco apna Dios Visqui ingac? — apquiltomjac mataa.
3 Apnec netin Dios Visqui ingac.
Apquillanac nic nat aclhamoclhojo asoc apquiltamjoclha ellana.
4 Enlhit apanco apquillanay quilaycmasquiscama acyitsomalhca dios.
Oro najan plata alyinmom actomja allanomalhca quilaycmasquiscama.
5 Atong innac quilaycmasquiscama, mepqui acpayvam.
Ataoc innac quilaycmasquiscama, mepqui singvitay.
6 Ajaycaoc innac maa, eyca mepqui aclingay.
Avajic innac maa, eyca mepqui acticjanquiscama.
7 Ameoc innac maa, am eyca covanac copatjetic.
Amancoc innac maa, am eyca covanac colhong.
Paj cotepac acpayvam.
8 Innoc as quilaycmasquiscama enlhit apquillanay.
Innoc as quilaycmasquiscama enlhit apcayo.
9 Quellhip enlhitaoc Israel.
Eltime sat apquilayo Visqui ingac.
Aptomja mataa singilpasmom najan singmasma.
10 Quellhip Dios apquilancam.
Eltime sat apquilayo Visqui ingac.
Aptomja mataa singilpasmom najan singmasma.
11 Quellhip apquiltomja apquilayo.
Eltime sat mataa apquilyilhanmeycam.
Aptomja mataa singilpasmom najan singmasma.
12 Inlhanvocmec apvalhoc Visqui ingac ningilvisay.
Jingilpasmoc sat nincoo.
Epasmoc sat enlhitaoc Israel.
Epasmoc sat apquilancam sacerdotes.
13 Epasmoc sat apquiltomja apquilayo.
Epasmoc sat enlhitaoc najan apquitcaoc.
14 Elhamasiclhac sat Visqui ingac aptovana.
Elhamasiclhac sat quellhip najan apquitquic.
15 Epasmoc sat quellhip Visqui ingac.
Visqui ingac aptomja apquillanay netin najan as nalhpop.
16 Netin aptomja apancoc Visqui ingac.
Nalhpop aptomja aplhoy enlhitaoc.
17 Colapvanquejec eltimjic apquilayo Visqui enlhit apquilmasquingvaycmo nano.
Colapvanquejec eltimjic apquilayo apnaycaoc tacjalhpopayc.
18 Nincoo eyca ontimjic mataa ningilayo Visqui.
Quilhvo nac jay najan cotmongvoycamlha nelha.
Innec ayaco Visqui ingac.
© © Biblia en Enhlet (Lengua Norte) © Paraguayan Bible Society, 1995.
