Acpayjayclha ingvalhoc
(Sal 57.7-11Sal 60.5-12)1 Dios Visqui ajac.
Inlhenquic evalhoc quilhvoc anco.
Omnaycmacsic napato lhip.
Quilhvoc anco aclhanma evalhoc.
2 Elpayvas quilhvoc anco arpa najan yatalhpong salterio.
Quilhvoc anco sec'a, acnim alhnancoc (alhtoo).
3 Otnejic sat siyayo lhip Visqui ajac naysicsa ningminaycmascama.
Olngacsic sat nipyesicsa enlhitaoc lhalhma anco.
4 Avanjec anco singasicjayo lhip, malha acvaycmo nitnoc anco.
Avanjec anco singamliyam lhip, malha acvaycmo yipjopay.
5 Dios Visqui ajac.
Lhip apmaclha netin, nitnoc anco.
Gloria mayayo lhip lhalhma anco as nalhpop.
6 Jingilvomquis tap nincoo (jingmiyov) ayinyema lhip apmopvan.
Elvomsacpoc sat tap apnaymacoc lhip apquilasicjayo.
Jingilatingmojo (jingilatingmam).
7 Aptomjac alhta Dios congne tingma apponquinomap:
—Payjeclhec evalhoc coo.
Omlascoc sat nipyesicsa enaymacoc, elmoc sat tingma Siquem.
Omlascoc sat yoclhilhma Sucot, elmoc sat enaymacoc.
8 Coo ajanco yoclhilhma apquilmolhama Galaad najan Manasés.
Efraín apquilmolhama apquiltomja malha selmasma coo, seltamilquiscama.
Judá apquilmolhama apquiltomja malha silasinancama coo.
9 Moab apquilmolhama apquiltomja malha yingmin alhancoc acpayjem.
Edom apquilmolhama apquiltomja malha sictoyam tiyayipejic (otnejic ajanco).
Olpalhamam sat sictimem sicyimnatem nipyesicsa co Filistea — nic nat aptomjac Dios Visqui ingac.
10 ¿Soc sat jeyantemiclha tingma Edom, apvisay acma apjalhtam?
11 Lhip Dios Visqui ingac aptomja singilyamasma (singiltanoncama).
Am etnajac mocjam ningillhalhma ningillanay quimpocjacme.
12 Jingilpasim nincoo ontimjic ningilyimnatem.
Copvanquejec lhama enlhit jingilpasmoc.
13 Singilpasmom Dios Visqui ingac ontimjic ningilyimnatem.
Cotlapsic sat ongvita.
Enatovasacpoc sat cotnaja ingmoc.
© © Biblia en Enhlet (Lengua Norte) © Paraguayan Bible Society, 1995.
