1 Actamila anco nintom ayitcoc acyiplomo actamilaycam ingvalhoc, am colhno acyivey nintom naysicsa fiestas acyiplomo ningilnapomalhca.
2 Colhic sat ayaco enlhit aptimesaycam, evenacpoc sat apvisqui apquitca coyacmo inlhojo etnajam. Emiclhac sat apquilnatam, acno apquilmayclha apquilnatam apvisqui apquitquic.
3 Talha actomja ayalhnascama plata najan oro alyinmom. Visqui ingac aptomja appiquinayclha ayalhnaclhojo ingilvalhoc nincoo.
4 Nasoc sat ancoc ningilmasomcaa najan ningmovancaa amyaa, ongilaylhojoc sat mataa amyaa acmasom.
5 Colhic sat acvena Visqui ingac, acyitna inlhojo ningvenéycam enlhit mepqui asoc. Onlingamcojoc sat acyanmongayclha nintemaclha inganco, acyitna inlhojo ningyisponcama enlhit, yoyam etjanyac acmasom.
6 Ningilinyejemo nincoo ningilvanyam, ningvita inlhojo intovana. Apquilinyejemo mataa apquitcavoc, apquilvita inlhojo incanayc.
7 Mongvanquejec ongilyatam actamila, acyitna inlhojo acyeyjamelhma ingvalhoc. Mongvanquejec ontimjic movan amyaa, acyitna inlhojo actamilaycam ingvalhoc.
8 Ningiltamjo inyicje colhamiclha asoc ingancaoc, ayinyema ningmescama nasa soborno solyayem, ongilyinimsalhcac sat nincoo.
9 Comasquejec sat aptimem ingmoc, acyitna inlhojo ningasicjayquiclha ingmoc. Comascoc sat aptimem ingmoc, acyitna inlhojo nintipquiscama apvisay ingmoc.
10 Lhama singascama asoc, comoc sat ingvalhoc ningiltomja ningilyascamco. Comejec sat ingvalhoc cien singilyicpilhqueteycaoc, ningiltomja inlhojo acyeyjamelhma.
11 Nintemaclha ninginmelhaycam poc, coyiplovjoc sat ningilnapomalhca. Cotlapsic sat ningvita acyanmongayclha nintemaclha ningilsilhnanomalhca inganco.
12 Tasi inyicje ongiltajanyac asoc navjac aclom oso, ayitamsama ayitquic, am colhno nintajanyey enlhit acyeyjamelhma naysicsa aptemaclha apanco.
13 Comasquejec mataa ninlingaycamco acmasom, acyitna inlhojo ninginmelhaycam enlhit singasicjayo, ningyanmongsayclha acmasom, ningvita inlhojo aptemaclha aptamila.
14 Ningilatingmomalhca acyitsomalhca pongmit represa acyitipsomalhca yingmin acvanyam. ¡Mongilpasmejec mataa nincoo! ¡Pac ongilavojo ningilatingmomalhca!
15 Anit nintemaclha meyisponcama Dios: Ningmasma ingmoc apsilhnanomap apanco. Moc najan: Ninginmelhaycam ingmoc mepqui apsilhnanomap apanco.
16 Apquiltamjo inyicje enlhit acyeyjamelhma eyinyoc acyanmongam, emoc actemaclha apyascamco. Mongvanquejec ontimjic ningyascamco, acyitna inlhojo acyeyjamelhma ingvalhoc.
17 Enlhit aptomja singamliyam mataa apvisay ingmoc. Naysicsa ninlingaycamco acyimtalhnama, eltamjacpoc sat apvisay ingyipma.
18 Ningilpasmec sat ancoc naysicsa apmaycaoc nasa solyayem ingmoc, onlhojoc sat nincoo acyeyjamelhma.
19 Ningvenéycam ingmoc, coyiplovjoc sat actemaclha ningilnapomalhca. Ongilsilhnanalhcac inganco, acyitna inlhojo ningyimtalhnesomalhco inganco.
20 Mongiltimjic mataa ningiltamila, acyitna inlhojo acyinimquiscama ingvalhoc. Ningilyataycam actemaclha ningyinimquiscama conyemac sat ningilsilhnanomalhca inganco.
21 Mepqui acpayjayclha ingvalhoc, ningvita inlhojo inquitca (nintamongvoyam) acyeyjamelhma. Inlingamcoc mataa ingvalhoc, ningvita nintamongvoyam aptemaclha meyascalhma (ayanem).
22 Acpayjayclha ingvalhoc actomja acyimnatescama ingyimpejic. Acmayovsa ingvalhoc actomja acmascoscama ningyimnatem.
23 Apmec tacja solyayem soborno enlhit apyicpilquemo apmapsom. Aptomja eyca aptovascama actemaclha acpeyvomo, najan aptemaclha appeyvescasquiclha.
24 Inlhenquic mataa ingvalhoc, yoyam coyangvomoc acyascamco ingilvalhoc. Am colhenac ingvalhoc actema nac jay, acyitna inlhojo acyeyjamelhma ingvalhoc.
25 Avanjec mataa aclingaycamco ingvalhoc, ningvita inlhojo nintamongvoyam acyeyjamelhma apvalhoc (meyascalhma).
26 Somco inyicje singilpejesquiyam acmasom, mepqui ningilsilhnanomalhca inganco. Somco inyicje elyicpilhquetacpoc enlhit appeyvomo, mepqui apsilhnanomap apanco.
27 Mongiltomja ningillhamasomalhca, acyitna inlhojo acyascamco ingvalhoc. Ningiltomja mataa ningiltamilcasomalhco inganco, ningilvisay ningyascamco.
28 Apvanquic enlhit acyeyjamelhma elhojoc enlhit apyascamco, incaymalhquic evanma, mepqui mataa apquilyataycam.
© © Biblia en Enhlet (Lengua Norte) © Paraguayan Bible Society, 1995.
