Actemaclha alapongmateyquiclha
1 Aptomjac nic nat Dios apcanya Moisés:
2 Ingyane sat Aarón epquinic sat siete calevascama netin alapongmateyquiclha, colsacsic sat olhma — nic nat aptomjac. 3 Apquilyajaclhoc nic nat Aarón aplhanma Moisés acno apcanama Dios. Appiquinquic nic nat calevascama netin alapongmateyquiclha, colsacsic sat olhma. 4 Alapongmateyquiclha actomja allanomalhca oro najan martillo acticpamalhca, ayenmo avjac acvaycmo ayitsicsic pétalos. Apquillanac nic nat Moisés alapongmateyquiclha, acno apcanama siclho Dios.
Levitas apquilponquinomap
5 Aptomjac nic nat Dios apcanya Moisés:
6 Ingyane sat melpalhavomejec mataa levitas nipyesicsa apnaymacoc israelitas. Ilponquinquis sat lhip levitas. 7 Eycaso actema nac jay apponquinquiscama: Ingyilhpaja sat apyimpeoc yingmin singilalhnascama. Natamin elaptic sat apva actemaclha afeitar acyovoclhojo apyimpeoc. Elyimyecsic sat apava, eltimjic sat apquilalhnayo napato Dios, mepqui apquiltanovmap. 8 Eltingya sat ofrenda vayqui inquinavo, yoyam comatong macmescama Dios, najan harina alpalhquemalhca aceite, cotnejic sat ofrenda. Mocjam moc vayqui inquinavo macmescama Dios colhic alvatna talha acyanmongam melyascalhma. 9 Ilane sat lhip levitas elvoclha carpa apponquinomap, ilane sat ingyaniclhac maa apyovoclhojo israelitas. 10 Elninquinic sat israelitas apmeoc apyitsicsaoc levitas. 11 Etnejic sat Aarón selmescama levitas, malha ayinyema israelitas mepqui apquilmasma. Eltimjic sat levitas seltimesaycam coo. 12 Natamin elninquinic sat levitas apmeoc ayitsicsaoc (apcatic) vayqui inquilinava. Lhama vayqui comatong sat macmescama Dios, moc vayqui comatong sat malvatnama talha acyanmongam melyascalhma, colhic sat alalhnayo apyimpeoc levitas, mepqui aptanoncama Dios. 13 Ingyaniclhac sat levitas apnaclha Aarón najan apquitquic, eltimjic sat apquilponquinquiscama, acno macmescama Dios. 14 Otnejic ajancaoc levitas, melpalhavomejec sat israelitas. 15 Eltimesam sat mataa levitas congne carpa apponquinomap. Cotnejic sat lhip selmescama levitas apquilponquinomap. 16 Apquilvamlha maa silyacyescama coo nipyesicsa israelitas, yoyam jeltimesam mataa. Apquiltomjac selmesomap, malha siclhoy israelita apquitca aptiyam apmamyi. 17 Coo ajanco apyovoclhojo apquitquic israelitas appaliyam apmamyi, acno apnatoscama acpaliyam amamyi, coo ajanco. Apquilitsepquic alhta egipcios appaliyam apmamyi, yiplovcoc silyacyescama israelitas apquitquic appaliyam apmamyi. 18 Alyacyesquic coo nipyesicsa israelitas, eltimjic ajancaoc levitas. 19 Alyacyesquic coo levitas nipyesicsa israelitas, etnejic apvisqui apancaoc Aarón najan apquitquic, jeltimesam sat mataa congne carpa apponquinomap, mepqui apquilpalhcomap israelitas. Colhic sat ayasicjayquiclha mocjam apyovoclhojo israelitas napato Dios. Colapvanquejec israelitas elantilhic carpa apponquinomap, ellingamcojoc sat acmasom — nic nat aptomjac Dios.
20 Apsovjoc nic nat Moisés najan Aarón najan israelitas apcanama siclho Dios apquillhenacpo levitas. 21 Apquilalhnasquic nic nat apyimpeoc levitas, apquilyimyesquic nic nat apava apquilantalhnama. Apnalaclhec nic nat Aarón carpa apponquinomap, elponquinsic napato Dios, actemaclha macmescama Dios apquilponquinomap. 22 Natamin nic nat apquilmiyaclho moclhama levitas, yoyam eltimesam congne carpa apponquinomap, acno apquilanyomap eltimjic. Apvisqui apancaoc nic nat Aarón najan apquitquic. Acno apcanama siclho Dios apnaclha Moisés, eltimjic apquilponquinomap levitas.
Acvamlha años yoyam eltimesam
23 Aptomjac nic nat Dios apcanya Moisés:
24 Vocmec sat ancoc veinticinco años aptiyascam levita apvanquic etnesam congne carpa apponquinomap. 25 Vocmec sat ancoc cincuenta años aptiyascam levita, elvaticsic sat aptimesaycam. 26 Apvanqui inyicje levita apvanyam etnejic aplhalhma poc, copvanqueje eyca etnesam malha apcanyomap. Eycaso apquiltemaclha levitas, yoyam eltimesam congne carpa apponquinomap — nic nat aptomjac.
© © Biblia en Enhlet (Lengua Norte) © Paraguayan Bible Society, 1995.
