Acvamlha acyovoclhojo yoclhilhma Canaán
1 Aptomjac nic nat Dios apcanya Moisés:
2 Ingyapajas sat lhip, colhic altimnasa israelitas. Iyascasingvom sat lhip yavamlha eltimjic: Quilhvoc sat elmoc quellhip yoclhilhma Canaán. Eltime sat apquileyvomaclha quellhip. Eycaso acvamlha navayc yoclhilhma Canaán:
3 Nicja yoclhilhma payjoc nipiyam acvisay Zin yoclhilhma actamopeycaoc najan yoclhilhma apancaoc co Edom. Natamin acvaycmo yingmin acvanyam Mar Muerto, moc acvisay Yingmin Apac, payjoc navá nipiyam. 4 Natamin mocjam nipiyam acvaycmo Acrabim, moc acvisay Aleyvomaclha Yitaja, acvaycmo yoclhilhma Zin najan Cades-barnea. Yiplovcoc mocjam tap acvaycmo Hasar-adar acvaycmo Asmón. 5 Payjoc Asmón mocjam tap acvaycmo vatsam ayitcoc nicja yoclhilhma Egipto, najan nelha maa yingmin acvanyam acvisay Mediterráneo.
6 Nicja yoclhilhma payjoc actalhningvamlha acnim acvisay yingmin Mediterráneo.
7 Nicja yoclhilhma payjoc nilhqueyja ayenmo yingmin Mediterráneo acvaycmo inquilhe Hor. 8 Mocjam tap inquilhe Hor acvaycmo siclho Hamat, najan tap acvaycmo Zedad. 9 Mocjam tap Zedad acvaycmo Zifrón, acvisay nicja nilhqueyja acvaycmo Hazar-enán.
10 Nicja yoclhilhma payjoc actiyapmaclha acnim acvisay Hazar-enán acvaycmo Sefam, 11 najan maa tap Sefam acvaycmo Ribla, payjoc Aín nicja actiyapmaclha acnim. Mocjam tap ayenmo yingmin acyayengviyam acvisay Cineret, 12 najan maa tap nicja vatsam Jordán acvaycmo nelha Mar Muerto, moc acvisay Yingmin Apac.
Eycaso acvamlha acyovoclhojo yoclhilhma apquileyvomaclha quellhip — nic nat aptomjac Moisés.
13 Aptomjac nic nat Moisés apyascasingvocmo israelitas: —Eycaso yoclhilhma singmescama Dios, ellhovamcoc apquilmolhama nueve tribus y media eltimjic apquileyvomaclha. Ellhovamcoc sat moclhama tribu ayinyema suerte sicas. 14-15 Apquillhocac alhta siclho apquilmolhama Rubén, najan Gad, najan media tribu Manasés, ningiltimem dos tribus y media. Apquiltimec apquileyvomaclha apancaoc payjoc vatsam Jordán actiyapmaclha acnim, ningatoc Jericó — nic nat aptomjac Moisés.
16 Aptomjac nic nat Dios apcanya Moisés:
17 Sacerdote Eleazar najan Josué eltimjic sat apquilmilasictem yoclhilhma nipyesicsa quellhip. 18 Elane sat quellhip epasmoc mataa lhama apvisqui moclhama tribu apquilmolhama naysicsa apquilmilasictem. 19 Elane sat enlhit apquilanyomap elpasmoc:
Caleb, Jefone apquitca nipyesicsa apquilmolhama tribu Judá. 20 Semuel, Amiud apquitca nipyesicsa apquilmolhama tribu Simeón. 21 Elidad, Quislón apquitca nipyesicsa apquilmolhama tribu Benjamín. 22 Buqui, Jogli apquitca nipyesicsa apquilmolhama tribu Dan. 23 Haniel, Efod apquitca nipyesicsa apquilmolhama Manasés (José). 24 Kemuel, Siftán apquitca nipyesicsa apquilmolhama tribu Efraín (José). 25 Elizafán, Parnac apquitca nipyesicsa apquilmolhama tribu Zabulón. 26 Paltiel, Azán apquitca nipyesicsa apquilmolhama tribu Isacar. 27 Ahiud, Selomi apquitca nipyesicsa apquilmolhama tribu Aser. 28 Pedael, Amiud apquitca nipyesicsa apquilmolhama tribu Neftalí — nic nat aptomjac Moisés.
29 Eycaso apquilvisay enlhit apquilanyomap elmilascoc yoclhilhma Canaán apquileyvomaclha israelitas, ayinyema apcanama Dios.
© © Biblia en Enhlet (Lengua Norte) © Paraguayan Bible Society, 1995.
