Apquiltimnaycam Juan yapasquiscama inyap yoclhilhma actamopeycaoc
(Mt 3.1-12Mr 1.1-8Jn 1.19-28)1 Quince años alhta invocmoc aptimem apvisqui César Tiberio. Poncio Pilato eyca aptomja alhta yatapvisqui yoclhilhma Judea. Herodes aptomja alhta apvisqui yoclhilhma Galilea. Herodes apyalhing Felipe aptomja alhta apvisqui yoclhilhma Iturea najan yoclhilhma Traconite. Lisanías aptomja alhta apvisqui yoclhilhma Abilinia. 2 Apquilimja apmamyi sacerdotes alhta Anás najan Caifás. Aplingac alhta Dios appayvam Juan, Zacarías apquitca. Apnaycmo alhta yoclhilhma actamopeycaoc. 3 Aptiyasam alhta Juan yoclhilhma tacjalhit vatsam Jordán. Aptomjac alhta apquilanya enlhitaoc:
—Elyanmonquis siclho apquilvalhoc. Natamin colmascosalhcac sat melyascalhma. Eltingya sat yapasquiscama yingmin —alhta aptomjac Juan.
4 Innoc actomja vaycajac appayvam ilhnic nat Isaías, profeta Dios aplingascama:
Appameteycam enlhit apquilpalhamaycam yoclhilhma actamopeycaoc:
“Elanesquis amay, yoyam eyacsic Visqui ingac.
Elpeyvacsojo amay pac.
5 Colapeclhac sat moclhama alvoyam congne.
Colhic sat alvayvesantamo moclhama inquilhe.
Colhic sat alpeyvaseclho amay altajaycaoc.
Colhic sat alpayesaclha amay lhop alyipjaycaoc.
6 Aplhamoclhojo enlhitaoc elvitac sat singvomquiscama tap ayinyema Dios”
—nic nat aptomjac Isaías.
7 Apquicjingvocmec alhta enlhitaoc apnaclha Juan. Apquililtamjoc alhta colhic acyapascasamco yingmin. Aptomjac alhta apquilanya Juan:
—Yitnec quellhip apquilvalhoc malha yamacyeyva ayitcaoc. ¿Soc ayinyema altimnascama elinyejic quellhip acyanmongayclha ayinyema Dios, yoyam covac sat? 8 Eltamilsojo sat apquiltemaclha, yoyam cotnatsalhquejec sat actomja apquilyanmonquiscama apquilvalhoc. Nocoltime nasa apquilvalhoc: “Abraham ingyapam nincoo”. Actomjac coo siyanya quellhip: Apvanquic Dios Ingyapam etnesquisic apquitquic Abraham as mataymong. 9 Inyitnec quilhvo tava quipmenaoc yamit. Am sat ancoc cotamilac acyilhna moclhama yamit, colyatemenalhcac sat, cotlhalhcac sat natilh —alhta aptomjac.
10 Yejemoc alhta apquilmalhnacpo Juan:
—¿Jalhco sat ontimjic nincoo?
11 Apcatingmavoc alhta Juan:
—Apyitnec sat ancoc apcanit apquilantalhnama quellhip, imques sat lhama poc enlhit mepqui appava. Yitnec sat ancoc aptoycaoc quellhip, imques sat poc mepqui aptom —alhta aptomjac.
12 Apquilvaac alhta enlhit apquilmam solyayem. Apquililtamjoc alhta, yoyam elyapasquisic yingmin Juan, apquilpamejitsa:
—Singillhicmoscama, ¿jalhco sat ontimjic nincoo? —alhta apquiltomjac.
13 Apcatingmavoc alhta Juan:
—Noelma nasa solyayem acyeycajangvaycmo —alhta aptomjac.
14 Apquilmalhningvaac alhta najan singilpilhtetemo:
—¿Jalhco sat ontimjic nincoo lha? —alhta apquiltomjac.
Apcatingmavoc alhta Juan:
—Noellatim nasa enlhit asoc apanco. Noelyamnam nasa enlhit. Noelvanamcojo nasa acyanmongam apquiltamjaycam —alhta aptomjac.
15 Aplhenacpec alhta Juan apcanyacpo Cristo. Ayinyemaclha apquiljalhnomacpec alhta mataa Cristo najan allhanma mataa apquilvalhoc. 16 Apcatingmavoc alhta Juan:
—Acyapascasamqui inyicje quellhip yingmin. Elhingmac sat lhama enlhit. Apmeyjec apanco, molhno coo. Acyaponcanalhquic oljalhyovasquisic alhataoc tiyayipeoc. Sat eyquima elyapasquisamcoc quellhip Espíritu Santo najan talha. 17 Apmaycam pala acpayjem apmic. Ingyimpocsic sat motajap apyimpeoc. Ingyicjecsic sat motajap apactic congne tingma. Evatniclhac sat apyimpeoc talha ma incasponejec sat —alhta aptomjac.
18 Inlhamoc alhta apquiltimnaycam apquiltimnasamcaa mataa apnaymacoc tasic amyaa. 19 Apcasquic alhta Juan apvisqui Herodes, ayinyemaclha apmaclho apyalhing aptava acvisay Herodías. Ayinyema najan aptemaclha acmasom Herodes. 20 Am alhta elyajaclhoc apvisqui. Apyanquiscacmoc alhta mocjam aptemaclha. Apnesquic alhta Juan singilpilhtetomaclha.
Macyapasquiscama yingmin Jesús
(Mt 3.13-17Mr 1.9-11)21 Yicpintama apmomap Juan apsovjacpoc alhta enlhit apquilyapascasamco yingmin. Innec alhta acyapasquisa yingmin Jesús. Naysicsa apquilmalhnancama acyaptalhco netin. 22 Apvayventamo alhta Espíritu Santo tacjaplhit Jesús. Malha valhaay intomjac. Ayinyema alhta netin appayvam:
—Lhip nac sictamongvoyam siyasicjayo, acyispaquic lhip —alhta intomjac appayvam.
Apquictingam apmamyi apquinyemayaclha Jesús
(Mt 1.1-17)23 Apvocmec alhta treinta años Jesús apquenmo siclho apquillhicmoscama. Apcanyacpec alhta apquitca apanco José, Elí alhta apquitca. 24 Matat nic nat apquitca, Jana nic nat apquitca, José nic nat apquitca, 25 Matatías nic nat apquitca, Amós nic nat apquitca, Nahum nic nat apquitca, Esli nic nat apquitca, Nagai nic nat apquitca, 26 Maat nic nat apquitca, Matatías nic nat apquitca, Semei nic nat apquitca, José nic nat apquitca, Judá nic nat apquitca, 27 Joana nic nat apquitca, Resa nic nat apquitca, Zorobabel nic nat apquitca, Salatiel nic nat apquitca, Neri nic nat apquitca, 28 Melqui nic nat apquitca, Adi nic nat apquitca, Cosam nic nat apquitca, Elmodam nic nat apquitca, Er nic nat apquitca, 29 Josué nic nat apquitca, Eliezer nic nat apquitca, Jorim nic nat apquitca, Matat nic nat apquitca, 30 Leví nic nat apquitca, Simeón nic nat apquitca, Judá nic nat apquitca, José nic nat apquitca, Jonán nic nat apquitca, Eliaquim nic nat apquitca, 31 Melea nic nat apquitca, Mainán nic nat apquitca, Matata nic nat apquitca, Natán nic nat apquitca, 32 David nic nat apquitca, Isaí nic nat, Obed nic nat apquitca, Booz nic nat apquitca, Salmón nic nat apquitca, Naasón nic nat apquitca, 33 Aminadab nic nat apquitca, Abram nic nat apquitca, Esrom nic nat apquitca, Fares nic nat apquitca, Judá nic nat apquitca, 34 Jacob nic nat apquitca, Isaac nic nat apquitca, Abraham nic nat apquitca, Taré nic nat apquitca, Nacor nic nat apquitca, 35 Serug nic nat apquitca, Ragau nic nat apquitca, Peleg nic nat apquitca, Heber nic nat apquitca, 36 Sala nic nat apquitca, Cainán nic nat apquitca, Arfaxad nic nat apquitca, Sem nic nat apquitca, Noé nic nat apquitca, Lamec nic nat apquitca, 37 Metusalén nic nat apquitca, Enoc nic nat apquitca, Jared nic nat apquitca, Mahalaleel nic nat apquitca, Cainán nic nat apquitca, 38 Enós nic nat apquitca, Set nic nat apquitca, Adán nic nat apquitca, apquinyema nic nat Dios.
© © Biblia en Enhlet (Lengua Norte) © Paraguayan Bible Society, 1995.
