Actemaclha macmescama Dios acvisay singasicjayquiclha
1 Apvanquic enlhit etnejic macmescama Dios lhama vayqui, tasic najan vayqui inquinavo, cotnejic sat macmescama Dios singasicjayquiclha. Mepqui ayimpejic acmasom sat cotnejic aptoscama. 2 Incaymalhquic enlhit eyantemiclha aptoscama carpa tingma, epquinic sat apmic netin apcatic aptoscama. Ingyajic sat payjoc apatong carpa tingma. Elilhpajac sat ema netin najan niyava altar sacerdotes.
3 Enlhit aptoscama acmatnam cotnejic sat acno macmescama Dios malvatnama talha. Colhic sat alvatna talha acpilhmoc avalhoc vayqui. 4 Najan alyayem, najan acpilhmoc niyava alyayem najan niyava lomos, najan niyava ajicjic, comyetic sat najan ajicjic najan alyayem ac. 5 Elvitic sat talha sacerdotes as asoc netin altar, alvatnamó lhama talha vayqui acmatnam acyanmongam melyascalhma.
6 Apvanquic enlhit etnejic macmescama Dios lhama nipquesic, tasic najan nipquesic apquinavo, cotnejic sat macmescama Dios singasicjayquiclha. Mepqui apyimpejic acmasom sat cotnejic aptoscama.
7-16 Incaymalhquic enlhit eyantemiclha aptoscama nipquesic, tasic najan yataay carpa tingma, epquinic sat apmic netin apcatic aptoscama. Ingyajic sat payjoc apatong carpa tingma. Elilhpajac sat ema pac netin najan niyava altar sacerdotes. Colhojoc sat macmescama Dios malvatnama talha acyanmongam melyascalhma. Colhic sat alvatna talha aptipilhmoc apvalhoc nipquesic najan yataay. Najan alyayem pac, najan aptipilhmoc niyava alyayem pac najan niyava lomos, najan nipyava apicjic, najan apyipacyic (najan aptipilhmoc apyipacyic), comyetic sat netin altar, najan maa apitic najan alyayem pac. Elvitic sat talha sacerdotes as asoc netin altar, alvatnamó lhama talha nintom macmescama Dios.
17 Comasquejec sat mataa singanamaclha nac jay, elyiplovcasojoc sat mataa enlhit najan aptovana naysicsa apquileyvam lhalhma anco. Noeltovaoc nasa acpilhmoc (aptipilhmoc), noeltovaoc nasa ema ac vayqui, najan ema pac yataay najan nipquesic — nic nat aptomjac Moisés.
© © Biblia en Enhlet (Lengua Norte) © Paraguayan Bible Society, 1995.
