Tingma apquilmiyovmacpilha enlhit apquilsilhnanomap
(Nm 35.6-34Dt 4.41-43Dt 19.1-13)1 Aptomjac nic nat Dios Visqui ingac apcanya Josué: 2 —Ipamejitquis sat lhip apquilmolhama Israel, yoyam elponquinsic tingma apquilmiyovmacpilha, acno siyanama siclhoc alhta apcanyacpo Moisés. 3 Apmatnec sat ancoc enlhit ayinyema accidente mepqui aplom. Apvanquic ingyinyejic enlhit apcajem poc, payjoc tingma apmiyovmacpilha. Emyovacpoc sat maa, apvaa inlhojo apya'mascam yoyam ingyajic. 4 Apvaac sat ancoc enlhit apcajem yoyam emyovacpoc, incaymalhquic payjoc tingma apatong epeyvescasiclha amyaa napatavo apquilayo apquilvanyam. Natamin emyovacpoc sat as enlhit. Elhic sat natingma actemaclha apmaclha. 5 Apvaac sat ancoc enlhit apya'mascam, copvanquejec eyanmongsiclha aptemaclha apcajem. Elmeyvoc sat apquilvanyam apquilayo, ayinyema apcajem enlhit mepqui aplom. 6 Incaymalhquic enlhit apmiyovmap metyepejec mataa tingma apvanyam, acvaycmo acnim macyicpilquemo napatavo enlhitaoc apcaneyquiclhilha. Acvaycmo acnim apquitsepma apquimja apmamyi sacerdote. Etajiclhac sat mocjam apquinyemayaclha, elhic sat mocjam tingma pac nipyesicsa apquilmolhama— nic nat aptomjac apcanyacpo Josué.
7 Apquilponquincasquic nic nat israelitas tingma apquilmiyovmacpilha, apquilvisay: tingma Cedes yoclhilhma Galilea, payjoc inquilhe alvinatem Neftalí. Najan tingma Siquem, payjoc inquilhe Efraín. Najan tingma Quiriat-arba, moc apvisay Hebrón, payjoc inquilhe Judá. 8 Najan maa tap vatsam Jordán yoclhilhma actamopeycaoc, payjoc tap Jericó actiyapmaclha acnim, apquilponquinquisa tingma Beser, apquileyvomaclha apquilmolhama Rubén. Najan yoclhilhma Galaad apquilponquinquisa Ramot, apquileyvomaclha apquilmolhama Gad. Najan yoclhilhma Basán apquilponquinquisa Golán, apquileyvomaclha apquilmolhama Manasés. 9 Eycaso apquilvisay tingma apquilmiyovmacpilha enlhitaoc israelitas najan metnaja israelitas apquilpalhaviyam nipyesicsa maa. Emyovacpoc sat moclhama aptomja apcajem poc mepqui aplom, actemaclha accidente. Apvaac sat ancoc enlhit apya'mascam apmolhama apmatnam, copvanquejec eyanmongsiclha aptemaclha apcajem. Colhic sat siclho acpeyvescasquiclha amyaa.
© © Biblia en Enhlet (Lengua Norte) © Paraguayan Bible Society, 1995.
