Aplom pac Jonás
1 Am nic nat colcac apvalhoc Jonás, apvita aptomjaclha Dios Apyimtalhnamo. Aplovquic nic nat Jonás.
2 Aptomjac nic nat Jonás apcanya Dios, apquilmalhna: —Lhip Dios Apyimtalhnamo, ingyeylhojo sicpayvam. Eycaso siclhanma siclhoc alhta siyinyemayaclha coo. Inlhenquic alhta evalhoc ongvinyejic sat tingma Tarsis. Acyasamcoc coo, lhip aptemaclha apcasicjayquiclho mocjam, aptemaclha apquimlaycmo, aptemaclha acmasilhte aplom pac. Aptemaclha lhip appayquimquiscama apvalhoc, acvaa inlhojo amyaa apyanmongsayclha lhip apquiltemaclha apancaoc enlhitaoc. 3 Dios Apyimtalhnamo, imascos sat lhip sictiyascam coo, ongvitsapoc sat co, nojemyov nasa coo — nic nat aptomjac Jonás.
4 Apcatingmavoc nic nat Dios Apyimtalhnamo: —¿Apvanqui ya lhquip elvoc? ¿So actomja yi? — nic nat aptomjac Dios Apyimtalhnamo.
5 Apyinyovquic nic nat tingma Jonás. Apnacmec nic nat siclho actiyapmaclha acnim. Apquillanac nic nat jamilh, yoyam elhic pisquisca. Apquiljalhnec nic nat yavamlha cotnejic natingma. 6 Apquictincasquic nic nat yamit alyava ava Dios Apyimtalhnamo. Incapquic nic nat pisquisca apcatic Jonás, casilhtojoc sat aclom apvalhoc. Inpayjeclhec nic nat apvalhoc Jonás, apvita yamit alyava ava. 7 Secaseclha ilhnic nat intomjac. Aptimescasquic nic nat Dios Apyimtalhnamo lhama ascoc, actaclhá yamit alyava ava. Inyamamquic nic nat yamit. 8 Natamin actiyapma ilhnic nat acnim apcapajasa Dios Apyimtalhnamo alhcajayam acyiplomo acmajat. Acnim nic nat incajac Jonás, inmasquec nic nat apyimnaa. Inlhenquic nic nat apvalhoc ingyitsapoc.
—Intasi, inyicje siyitsepma, am colhno sictiyascam mocjam — nic nat aptomjac Jonás.
9 Apcatingmavoc nic nat Dios Apyimtalhnamo: —¿So actomja yi? ¿Apvanqui ya lhquip elvoc, apvita inlhojo yamit acyamamco? — nic nat aptomjac.
Apcatingmavoc nic nat Jonás: —Eje, evanquic olvoc, evanquic coo ongvitsapoc — nic nat aptomjac.
10 Aptomjac nic nat Dios Apyimtalhnamo apcanya Jonás: —Am alhta ecniclhac lhip yamit alyava ava. Am alhta ingyictincasac lhip as yamit. Inquictinquic alhta lhama alhtaa. Inquitsepquic alhta moc alhtaa. Ayovsec lhip apvalhoc apvita inlhojo. 11 Avanjec acmayovsa evalhoc coo sicvita inlhojo apyovoclhojo tingma Nínive, tingma apvanyam apanco. Apnam as tingma ciento veinte mil apquitcavoc (sicaa) najan aplhamoclhojo apnatoscama — nic nat aptomjac Dios Apyimtalhnamo.
© © Biblia en Enhlet (Lengua Norte) © Paraguayan Bible Society, 1995.
