Mocjam Job appayvam
1 Apcatingmavoc nic nat Job: 2 Nasoc anco aplhanma lhip. Mepqui ningilpeyvomo mataa napato Dios.
3 Ningiltamjoc sat ancoc ongilatingmalhcac napato Dios, mongvanquejec ongilatingmojo lhama singilmalhnaycam, singilmalhneclho inlhojo mil actemaclha asoc.
4 Avanjec mataa apmopvan apanco Dios, najan apyascamco apanco, mongvanquejec ongilinmelham. Onlingamcojoc sat acyimtalhnama ayinyema ningilinmelhaycam.
5 Elhingsic sat nicja acyovoclhojo inquilhe acvinatem naysicsa aplom pac Dios. Etvacsic sat acyovoclhojo inquilhe, apquiltamjo inlhojo etvacsic.
6 Inyovjam as nalhpop, ayinyema apyovjescama Visqui ingac, colpilhyinamoc sat avjaoc as nalhpop.
7 Apmiyovquic sat ancoc acnim, cotyepejec sat maa, najan apyová, mongvityejec sat.
8 Apvamlha pac Dios apquillanay nic nat netin, elhong apanco netin yingmin.
9 Apquillanac nic nat apyová, apquilvisay Osa Mayor, najan poc Orión, najan poc Pléyades, najan poc aplhamoclhojo nipiyam.
10 Avanjec aptamjaycam simpilapquiscama, mongvanquejec onsavojo ningyasingvoyam.
11 Apyeycajac Dios Visqui ingac motay coo. Apyeycajac mepqui sicyascamco.
12 Apnatamquic maa, mongvanquejec ongilyacsilhma, mongvanquejec ongilanic: ¿So actomja yi?
13 Apvanquic elvoc Visqui ingac cotningvoyam nelha, colangvomoc sat anaymacoc sinavocpo Rahab.
14 Movanquejec otjanyac maa, movanquejec ongvinmelham Dios Visqui ingac.
15 Movanquejec ongvatingmojo sictomja sicpeyvomo. Olmalhnac sat, yoyam jeyasicjiclhojoc sat mocjam.
16 Yitnec sat ancoc nimpeyvescasquiclha, meljalhnojoc sat sicpayvam Visqui ingac.
17 Piyam apquilhcajayam jeyajic sat coo, olngamcojoc sat selyimsem mepqui acvisay.
18 Colngamcojoc sat acyimtalhnama evalhoc, seyamposcama Visqui ingac.
19 Apyimnatem apanco, am olhno coo. Mongvanyejec sat epasmoc nimpeyvescasquiclha.
20 Sicpeyvomo coo, mepqui sicsilhnanomalhca ajanco. Coo sicpayvam ayinyema sicsilhnanomalhca ajanco napato Visqui ingac.
21 Mepqui sicsilhnanomalhca ajanco coo, altamjo inyicje ongvitsapoc.
22 Inlhenquic mataa evalhoc: Ongmatong (onticyoc) sat ningno poc, najan apsilhnanomap apanco, najan mepqui apsilhnanomap apanco.
23 Pilapcasquic sat ancoc ningvita acmasom, yoyam ellingamcojoc enlhit. Apquitsovasoc Dios Visqui ingac, apvita inlhojo apquilmasquingvoyam enlhit.
24 Apquiltimesacpec mataa apquilviscaa enlhit apquilmapsomcaa, melpeyvomo nac enlhit apquilyicpilquemo. ¿Co laa ayinyema? Nasoc anco ayinyema Visqui ingac.
25 Inquilvonquipquic acnim sictiyascam coo, malha alinyem intomjac. Mepqui mataa selinyejemo, mepqui acpayjayclha evalhoc coo.
26 Malha barco ayinyem nayingmin intomjac alvonquepma acnim. Malha mama apyivey aptiyam coning, epatjetic apyamonquilhma, intomjac alvonquepma acnim.
27 Inlhenqui inyicje evalhoc: Jelvoncamoc sat acyimtalhnama, ongvitsovacsojoc sat mocjam.
28 Pilapcasquic sicvita mataa acmasom, mejemyovejec sat mocjam Visqui ingac, seyanem sicsilhnanomalhca ajanco napato maa.
29 Movanquejec otnesquisic ajanco sicpeyvomo, seyanem inlhojo sicsilhnanomalhca ajanco Visqui ingac.
30 Acliquic sat ancoc emeoc yingmin najan jabón, najan asoc ayalhnascama emeoc.
31 Jetnesquisic sat sicpasyam coo Visqui ingac, selovquisa congne asoc apac, sictemaclha sictanoncama coo (sictanovmalhca ajanco).
32 Altamjo inyicje Dios etnejic enlhit apanco, yoyam ongilpamejitsalhcojoc najan colhic sat acpeyvescasquiclha nintemaclha incanit.
33 Altomja inyicje otac enlhit singyicpilquemo, yoyam jingyicpilcojoc sat incanit.
34 Elvaticsic sat Visqui ingac jelyicpilhquetic coo, molngamquejec sat mocjam aptemaclha setvascama coo, mepqui ayay evalhoc sat cotnejic.
35 Altamjo inyicje olyatam mepqui ayay evalhoc. Ayinayc coo mepqui sicsilhnanomalhca ajanco napato Visqui ingac — nic nat aptomjac Job.
© © Biblia en Enhlet (Lengua Norte) © Paraguayan Bible Society, 1995.
