Job appayvam
1 Apcatingmavoc Job: 2 Incaymalhquic inyicje ompiquinic balanza, ongilyasamcojo acvamlha acyajapmo evalhoc coo, najan siclingaycamco acyimtalhnama, mongvanquejec ongilyipsitic.
3 Acyitsomalhca lhopactic mongmovan ongilyipsitic. Inquillhinganacmec sicpayvam.
4 Eyajac alhta yanca pac Dios Visqui apyimtalhnamo. Intalhnec evalhoc veneno acyipitcay yanca pac. Avanjec siclingaycamco ayay evalhoc coo, ayinyema Dios.
5 Mepqui acpáyvam mataa nintoscama yamelyeyjaycoc, acyitna inlhojo actom amyip. Mepqui acpáyvam mataa vayqui inquinavo, acyitna inlhojo actom paat amyip.
6 ¿Am ongyispac mataa nintom mepqui yasic, atsi ya ontoc tataa apoc ongvitic?
7 Am oyispac actema nac lha. Am colcac evalhoc siclingaycamco acyimtalhnama, acno moyisponcama as nintom.
8 Altamjo inyicje Dios Visqui ingac ingyajalhnoc silmalhnancama, najan allheneycam evalhoc coo.
9 Altamjo inyicje jeyajic Dios, emascocsic sat sictiyascam as nalhpop.
10 Colhic sat actamilquisquiyam evalhoc naysicsa siclingaycamco. Sictemaclha sicyiplovquiscama mataa singanamaclha Dios Visqui ingac.
11 Masquec coo sicyimnaa, movanquejec otyisam sat mocjam.
12 Am otnajac sicyimnatem, malha mataymong najan malha bronce acyimnatem.
13 Am otaac lhama, yoyam epasingvota, paj lhama yoyam jevomsic tap coo.
14 Incaymalhquic otac enaymacoc, molvaticsejec sat sicyiplovquiscama singanamaclha.
15 Quellhip enaymacoc apquiltomja seyinimquiscama, malha alvata mepqui yingmin.
16 Naysicsa acmamayaclha ningvita inyicje ayinyem yingmin acpaysacmo.
17 Naysicsa acmajat najan mepqui acmamay coymac sat alvata, mongvityejec sat yingmin.
18 Apquilyinyovquic amay enlhit apquillhingam, elyiplaclha alvata maa. Apquilmasquingvocmec alhta yoclhilhma actamopeycaoc, melvitay yingmin.
19 Avanjec apquilquitamsama yingmin as alvata, enlhit apquilinyema Tema najan co Sabá.
20 Am alhta elvitac yingmin, apquilyinimsomacpo enlhit, acyascacmo apquilvalhoc.
21 Innoc moc apquiltemaclha quellhip. Apquilacac quellhip, apquilvita inlhojo actemaclha siclingaycamco acmasca.
22 Am oltamjoc jelmecsic asoc, am ongvanayc quellhip jelvomsic sat tap.
23 Am ongvanayc quellhip elyinyoc acyanmongam nipyesicsa cotnaja ingmoc selmam siclho, yoyam jelapajacsic mocjam.
24 Jelyascasingvom sat quellhip, ovanmac sat coo. Jellhicmos sat sictemaclha sicsilhnanomalhca ajanco.
25 Mongvanquejec ongvenam actemaclha acpeyvomo, quellhip apquiltomja sevenéycam coo.
26 Naysicsa aclingaycamco acyimtalhnama evalhoc, apquiltomja sevenéycam quellhip.
27 Am elmiyavac quellhip aptomja apyeyjeycam. Apquilyinyovquic quellhip aptimem poc acyanmongam solyayem.
28 Quip jelanojo quellhip, jeltimnas sat, acyitna inlhojo sicmovan amyaa.
29 Elvatsaoc sat apquiltemaclha copeyvomo, elyasingvom sictemaclha sicpeyvomo coo.
30 Jave sicmovan amyaa. Acyasamcoc coo actemaclha acpeyvomo najan actemaclha copeyvomo — nic nat aptomjac Job.
© © Biblia en Enhlet (Lengua Norte) © Paraguayan Bible Society, 1995.
