1 ¿Apyasamco ya lhquip yavamlha eltimsic apquitcavoc yataay nipvajac? ¿Apvita ya lhquip aptimquiscama apquitcoc popyit apyapmoc?
2 ¿Apyasamco ya lhquip apvamlha piltin aptomja aplovso, eltimsic apquitcavoc?
3 Apyitnacmec mataa apyapmoc, apquiltiyacmec apquitcavoc.
4 Apquilyimnaquic mataa apquitcavoc. Apquilvanamyic amyip, mepqui apquiltajemo.
5 Inquileyvec anco yamelyeyjaycoc navjac, cotnaja nintoscama. ¿Soc enlhit appanamayclho alhta?
6 Coo ayinyema coleyoc amyip yamelyeyjaycoc navjac najan yancomilh.
7 Am coyispac altamjaycam tingma apvanyam. Am coljalhnoc apquilpayvam apquillhinquiscama.
8 Inquileyvec netin inquilhe najan lhalhma anco, actingyey actom paat.
9 ¿Apcanayqui ya lhquip cotnesam lhip tingma vayqui inquinavo navjac? ¿Apcanayqui ya lhquip coyancac alhtaa lhip tingma pac?
10 ¿Apvanqui ya lhquip elhingsic, coyinyovacsic vayqui alhpejic najan sovo alhpejic?
11 ¿Apcanayqui ya lhquip acyimnatem anco vayqui navjac, cotnajam sat amyip?
12 ¿Apcanayqui ya lhquip coyinyovacsic carro aclaneyo acyilhna, ingyicjecsic sat lhip?
13 Aptemaclha lhapin. Appayesquic aplhimpancoc, acno alhimpancoc siyana.
14 Apninquinquic appóc netin lhopactic. Acmajat actomja acyetaponquiscama apquitcoc.
15 Am eyasamcoc lhapin, colhic sat acpalhcata appóc, colhic acminyilha.
16 Am etamilcasac apyapmoc lhapin apquitcavoc, mepqui apmasma apquitcavoc.
17 Dios ayinyema mepqui apyascamco lhapin. Mepqui aptemaclha aptamila lhapin.
18 Apquinyec mataa lhapin. Apcasmasquic lhapin, apvita inlhojo nolhing apcapoc.
19 ¿Lhip ya ayinyema apyimnatem apanco nolhing, najan actamila apva apyispoc?
20 ¿Lhip ya ayinyema apnilhtingam nolhing, malha sova? Najan appayvascama apvajic.
21 Apmetmec apmic lhopactic, malha apquitsovascama. Apmopvan etjanyac apquilnapomap.
22 Mepqui apcay nolhing, mepqui apquinyem apvita inlhojo sovo acvinatem.
23 Invitalhquic yanca alhancoc nolhing apcapoc, najan sovjeva pac najan sovo acvinatem.
24 Cat apquinyem nolhing apcapoc. Am ingyajalhnoc aplinga inlhojo appayvascama trompeta.
25 Appayvec nolhing, aplinga inlhojo appayvascama. Inticjancasquic mocjay apquilnapomacpilha enlhit. Aplingac mataa appayvam acyimnatem ayinyema apvisqui najan apnaymacoc.
26 ¿Lhip ya apyascasingvoyam nata navjac quilyacmejit, ayimpay payjoc nipiyam?
27 ¿Lhip ya apcapajascama mama apyivey, ellanac aplhancoc nitnoc anco?
28 Apyancac netin mataymong acvinatem, acnim anco najan alhtaa, ayitsicsic acyitna aplhancoc.
29 Apquilyajam mocjay, etingya apyamonquilhma.
30 Apquiljalhnec mama apquitcavoc eltovamcoc ápac acyiplomo ema. Apvitacpec mataa mama apyapmoc, payjoc acyitnamaclha asoc ápac najan payjoc enlhit apticyovam — nic nat aptomjac Dios.
© © Biblia en Enhlet (Lengua Norte) © Paraguayan Bible Society, 1995.
