1 Intamjam evalhoc sicvita yatepiyam najan acmamay, tacja actiyam. Avanjec sicpilhyinamam coo.
2 Quip elaylhojo ayilhtingyavoyam, actomja appayvam acyimnatem ayinyema Dios.
3 Invitalhquic alyinmayam ayinyema Dios, acvaycmo nelha lhopactic, lhama anco.
4 Inlingalhquic ayilhtingyavoyam acyimnatem anco, acyiplomo alyinmayam cotningvoyam nelha.
5 Pilapcasquic ninlinga ayilhtingyavoyam ayinyema Dios, avanjec simpilapquiscama, mongmovan ongilyasingvomoc.
6 Incanyalhquic yingmin alyayem (piyam apóc) copalamoc as nalhpop. Incanyalhquic yingmin acmamay copalamoc as nalhpop, ayinyema apcanama Dios Visqui ingac.
7 Ningilanyalhquic onlhic, yoyam comoc ingvalhoc aptomjaclha Dios.
8 Inquilyilhanmec asoc navjac, colaylhic avalhoc mataymong alyilhanmomaclha.
9 Nilhqueyja ayinyema alhcajayam acyimnatem, nipyam ayinyema acmatsamangi.
10 Dios apvatipnapma actimesquisa yingmin acyimnatem, cayjec anco, malha mataymong.
11 Aptimescasquic yipjopay alpasyam lhalhma anco, yoyam cotyamoc tacja nalhpop.
12 Apcapajasquic Dios yipjopay lhalhma anco, alyiplovquisa apcanamaclha Visqui ingac.
13 Yoyam cotalhcac singmasmaclha Dios. Cotalhcac sat najan apyanmongsayclha Dios nintemaclha inganco as nalhpop.
14 Lhip Job, ingyeylhojo. Ilanojo as asoc simpilapquiscama ayinyema Dios.
15 ¿Apyasamco ya lhquip aptomjaclha Dios? ¿Apyasamco ya ayinyemayaclha alyinmayam?
16 ¿Apyasamco ya lhquip allhingam yipjopay, najan aptemaclha apyascamco Dios?
17 Aplingamcoc lhip mataa acmajat naysicsa ayilhcajacmo alhcajayam.
18 Apvanqui ya lhquip epasmoc epaclhenic netin, actomja acyimnatem, malha tava apac.
19 Ingilyascasingvom. ¿Co laa ontimjic ongilatingmojo? Ningileyvec yatescamalhma, mongvanquejec ongilatingmojo.
20 Naysicsa silyataycam, ¿soc enlhit eltimnasquiclhac sat Dios? ¿Soc enlhit qui?
21 Am ongvitac mataa acnim, ayajapvaa inlhojo yipjopay. Ningvita inyicje acnim, alhcajacmo inlhojo alhcajayam.
22 Invitalhquic ayitsay olhma payjoc nilhqueyja, actomja apmopvan apanco Dios. Intiyacmec ingilvalhoc ningvita.
23 Mongvanquejec ongilyasingvomoc aptemaclha Dios apyimtalhnamo, aptomja apyimnatem, najan apmopvan, najan appeyvomo. Metvacsejec mataa actemaclha acpeyvomo.
24 Incaymalhquic apyovoclhojo enlhit eltimjic apquilayo Dios. Mepqui apquilaneyo Dios enlhit aptimesomap apanco apyascamco— nic nat aptomjac Eliú.
© © Biblia en Enhlet (Lengua Norte) © Paraguayan Bible Society, 1995.
